काठमाडौं- प्रधानमन्त्री केपी शर्मा ओलीले नेपालीमा आत्महत्याको दरबारे चासो राखेका छन्। प्रधानमन्त्री निवास बालुवाटारमा मनोचिकित्सहरूसँग मंगलबार भएको छलफलमा उनले यस्तो चासो राखेको भेटमा सहभागी भएका मनोचिकित्सक डा अनन्त अधिकारीले बताए।
यसका साथै पछिल्लो समय नेपालीहरू लकडाउन र निषेधाज्ञाका कारण कति विक्षिप्त छन् भनेर पनि जिज्ञासा राखेका थिए। उनले यसकाे कारण बन्दाबन्दी मात्रै हो वा अन्य कुनै कारण भएको भन्दै जिज्ञासा प्रकट गरेको समेत डा अधिकारीले बताए। सरकार नागरिकको सबैखाले स्वास्थ्यबारे संवेदनशील भएको र मानसिक स्वास्थ्यको क्षेत्र बलियो बनाउन सरकारले के गर्नुपर्छ भनेर सुझाव समेत मागेको उनले बताए।
यसपछि मनोचिकित्सकहरूले भने कोरोना संक्रमणबाट निको भएको दरलाई अलि बढी जोड दिँदै प्रसारण गर्नुपर्ने, स्वास्थ्य मन्त्रालयको दैनिक मिडिया ब्रिफिङ मात्र नभएर अन्य क्षेत्रबाट समेत नागरिकको आत्मबल बढाउने सन्देश दिनुपर्ने बताएका थिए। यसका साथै सञ्चारमाध्यमलाई पनि सकारात्मक र आत्मबल बढाउने सन्देश दिने सामग्री प्रसारण गर्न आग्रह गर्नुपर्ने बताएका थिए।
यसका साथै मनोचिकित्सा क्षेत्रमा लगानी बढाउनुपर्ने समेत छलफलमा सहभागी मनोचिकित्सहरूले सुझाव दिएको डा अधिकारीले जानकारी दिए। यसअघि छलफलमा सहभागी चिकित्सकहरूले हाल नेपालीको मानसिक स्वास्थ्य अवस्थाबारे प्रस्तुति गरेका थिए।
मानसिक स्वास्थ्यलाई सरकारले खासै प्राथमिकतामा नराखेको बताउँदै बेलैमा यसतर्फ ध्यान जान नसके यो समस्याले झन् विकराल रूप लिने धारणा आफूहरूले राखेको छलफलमा सहभागी अर्का मनोचिकित्सक डा रितेश थापाले बताए। प्रत्येक प्रदेशमा मानसिक अस्पताल हुनुपर्ने धारणा समेत आफूले प्रधानमन्त्रीसमक्ष राखेको उनको भनाइ छ।
छलफलमा आफूहरुले राष्ट्रिय स्वास्थ्य नीति पारित गर्नुपर्ने विषय समेत उठाएको उनले जानकारी दिए। करिब १ घण्टा भएको छलफलमा चिकित्सकहरुले मनोत्रास कम गर्न सके मात्र मानसिक समस्या न्यूनीकरण गर्न सकिने बताएका थिए।
छलफलमा मनोचिकित्सक संघ नेपालका अध्यक्ष डा सुदर्शन प्रधान, सह सचिव डा मीना राई, सदस्य सगुन पन्त, त्रिवि शिक्षण अस्पतालका डा. सरोज ओझालगायत सहभागी भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
