धनुषा- प्रदेश-२ स्थित धनुषा र महोत्तरी जिल्लामा निषेधाज्ञा खुकुलो पारिएको छ। जिल्ला प्रशासन कार्यालय धनुषाका प्रमुख जिल्ला अधिकारी प्रेमप्रसाद भट्टराईले न्यून आय भएकाहरुलाई जिविका चलाउनै गाह्रो परेको र कोरोना संक्रमितको दर पनि घट्दै गएकाले निषेधाज्ञा खुकुलो पारेको जानकारी दिए।
‘हामीले निषेधाज्ञा जनजीवन सहज हुनेगरी एक साताका लागि पुनः बढाएका छौं,’ प्रमुख जिल्ला अधिकारी भट्टराईले भने, ‘स्वास्थ्यका मापदण्ड पुरा गरेर खोल्न पाइने पसल र गर्न हुने/नहुने काम छुट्याएका छौं।’
धनुषा जिल्ला प्रशासन कार्यलयले उपलब्ध गराएको तथ्याङ्कअनुसार जिल्ला भर अहिलेसम्म १ हजार ७ सय कोरोना संक्रमित छन् भने अहिलेसम्म ११ सय निको भइसकेका छन्। ५ सय जना अझै संक्रमित छन्। धनुषा जिल्लामा अहिलेसम्म १६ जनाको कोरोना संक्रमणका कारण मुत्यु भएको छ।
महात्तरी जिल्लाले अहिलेसम्म कोरोना संक्रमितको सङ्ख्या १३ सय कटेको छ। जसमा निको हुनेमा ९ सय जना रहेका छन् भने मृत्यू हुनेको सङ्ख्या ११ रहेको छ। जिल्ला प्रशासन कार्यालयले एक साताअघि गरेको निषेधाज्ञा सोमबारबाट सकिँदैछ। प्रमुख जिल्ला अधिकारी कृष्ण बहादुर कटुवाल बाहिरी जिल्लाबाट आवतजावातमा कडाइ गर्ने तर जिल्लामा भने आवातजावात सहज बनाइने बताउँछन्।
‘व्यापार व्यवसाय गर्नेहरुको समस्यालाई पनि मध्यनजर गर्दै केही खुकुलो गर्ने भएको छौं,’ कटुवालले भने, ‘बाहिरी जिल्लाको आवात जावातलाई भने अनुमतिबिना प्रवेश गर्न दिइने छैन।’
पसल र होटलमा पनि खुल्ने
धनुषा जिल्लाका प्रमुख जिल्ला अधिकारी प्रेमप्रसाद भट्टराईका अनुसार धनुषामा दिउँसो २ बजेसम्म खाद्य वस्तु, इन्धन, खाना पकाउने ग्यास, तरकारी, हार्डवेयर, कपडा पसलहरु खोल्ने निर्णय गरेको जानकारी दिए। ‘ज्वरो नाप्ने, मास्क, स्यानिटाइजरको प्रयोग गरी दिउँसो २ बजेसम्म पसल र होटलहरू खोल्न पाइने व्यवस्था गरेका छौं,’ भट्टराईले भने‚ ‘यसको अनुगमन दैनिक रुपमा चेम्बर कमर्श अफ धनुषा, उद्योग वाणिज्य संघले गर्नेछन् र दिनकै जिल्ला प्रशासन कार्यलयमा रिपोर्ट बुझाउनेछन्।’ धनुषामा शनिबार औषधि पसल बाहेक सबै पसलहरु बन्द हुनेछन्।
प्रजिअ भट्टराईका अनुसार पिसिआर रिपोर्ट निगेटिभ भएकाहरुले होटलबाट खानेकुरा होम डेलिभरी गर्न सक्ने ग्राहकले नै होटलबाट लैजान सक्ने तर होटलमा बसेर जमघट गरेर बस्न पाइनेछैन।
महोत्तरी जिल्लाले धनुषाले भन्दा पनि निषेधाज्ञा खुकुलो गरेको छ। दुवै जिल्लामा गुदी हाट बजार लगाउन नपाइने, जमघटमा सहभागी हुन नपाइने‚ मन्दिरमा पुजापाठ लगाउन नपाइने‚ नाका प्रवेशमा कडाइ गरेपनि महोत्तरीमा पसलहरु भने ५ बजेसम्म खुल्नेछन्। जिल्लाभित्र भने आउजाउ गर्न कडाइ हुनेछैन।
दुवै जिल्लाका धेरै भीडभाड हुने सरकारी कार्यलय विद्युत प्राधिकरण, मालपोत कार्यलय, जिल्ला प्रशासन कार्यलयमा पनि अत्यावश्यकभन्दा अन्य काम हुने छैन।
तीनै तहको समन्वय
धनुषा जिल्लाका प्रमुख जिल्ला अधिकारी प्रेमप्रसाद भट्टराईले प्रदेश र स्थानीय तह गरी तीनै तहको समन्वय राम्रो भएको बताए। ‘संघीय, प्रदेश र स्थानीय तह मिलेर नै पिसिआरदेखि क्वारेन्टाइन र आइसोलेसन बनाउनेदेखि बिरामीलाई अस्पतालमा ल्याउने कार्यसम्म मिलेर गरिएको छ,’ भट्टराईले भने, ‘आ-आफ्नो कार्यक्षेत्रको काम सबै मिलेर गरेका छौं।’
महोत्तरी जिल्लाले पनि समन्वयबाटै काम भएको र कोरोना नियन्त्रणमा तथा न्यूनीकरण भएको बताएको छ। ‘पहिलेका तुलानामा संक्रमित घटेका छन्,’ प्रमुख जिल्ला अधिकारी कृष्ण बहादुर कटुवालले भने, ‘तीनै तहको समन्वयले गर्दा नै संक्रमित घटेका हुन्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1766648928.png)
