मोरङ-मोरङको पथरी शनिश्चरे र रंगेली नगरपालिकामा कोरोना संक्रमितको संख्या कम हुँदै गएको छ। पथरीमा हालसम्म १५ संक्रमित रहेकामा ९ जना निको भएर घर फर्किसकेका छन् भने बाँकी ६ जना उपचारमा छन्। पथरी नगरपालिकाका मेयर दिलिपबहादुर राईले समुदायमा फैलिएको कोरोना अहिले नियन्त्रणमा आएको बताए।
‘हामीले भारत तथा विदेशबाट आउनेलाई विशेष प्राथामिकता दिएर पिसीआर परीक्षण गरायौं,’ मेयर राईले भने, ‘समुदायका ३ जनालाई देखिएको थियो। त्यसपछि १ हजार जतिलाई कन्ट्याक्ट ट्रेसिङ गरी परीक्षण गर्दा देखिएन।’
उनका अनुसार अहिले नगरपालिकाले ७५ बेडको क्वारेन्टाइन बनाएको छ। भारतबाट आउनेहरुलाई क्वारेन्टाइनमा राखेरमात्रै घर जान दिइएको थियो। आवतजावत कम भएकाले र भारतबाट आउनेहरुलाई क्वारेन्टाइनमा राखिकाले संक्रमण नियन्त्रणमा नै रहेको मेयर राईको भनाइ छ।
त्यस्तै रंगेली नगरपालिकाले हालसम्म २ हजार ५ सय जनाको कोरोना परीक्षण गराएको छ। नगरमा १२१ जना संक्रमित देखिएका छन् भने १ सय १७ जना निको भएर घर फर्किसकेका छन। ३ जना उपचारका क्रममा छन् बाँकी एकजनाको कोरोनाका कारण निधन भएको छ।
रंगेली नगरपालिकाका मेयर दिलीपकुमार अग्रवालका अनुसार रंगेलीमा कोरोना नियन्त्रण बाहिर गएको छैन। ‘पहिले कोरोना संक्रमण धेरै फैलिएको थियो। जुन ठाउँमा देखिन्छ त्यो ठाउँ निषेध गरेर सम्पूर्ण बासिन्दाको कन्ट्याक्ट ट्रेसिङ गर्याैं’ मेयर अग्रवालले भने, ‘अहिले हाम्रोमा आत्तिन पर्ने अवस्था छैन।’
रकमान्तर गरेर खर्च गर्दै
प्रायः स्थानीय तहले विपद् व्यवस्थापन कोषमा हरेक वर्ष रकम छुट्याउने गरेका हुन्छन्। यही कोषबाट रकम खर्च गरे पनि अपुग रकम रकमान्तर गरेर कोरोना नियन्त्रण तथा न्यूनीकरणका लागि खर्च गरेको रंगेली नगरपालिकाका मेयर अग्रवालले जानकारी दिए। ‘विपद् व्यवस्थापनको रकम सुरुमा एक करोड र त्यसपछि पुनः एक करोड खर्च गर्यौं,’ अग्रवालले भने, ‘यसबाट पनि अपुग हुने रकम रकमान्तर गरेर खर्च गरेका छौँ।’
क्वारेन्टाइन र आइसोलेसन बनाउन, राहत बाँड्न पिसीआर परीक्षण गर्न, स्वास्थ्यकर्मीलाई जोखिम भत्ता दिन, एम्बुलेन्समा अधिकांश रकम खर्च भएको अग्रवालको भनाइ छ।
कोरोना संक्रमण न्यूनीकरणका लागि पथरी नगरपालिकाले अहिलेसम्म ३० लाख खर्च गरेको छ। मेयर राईका अनुसार पथरीले पनि फ्रन्टलाइनमा खटिन र कन्ट्याक्ट ट्रेसिङ गर्नमै बढी रकम खर्च गरेको छ। पथरीले अहिलेसम्म आइसोलेसन कक्ष बनाएको छैन। ‘अहिले कोरोना फैलिएको छैन,’ राईले भने, ‘भोलिका दिनमा कोरोना फैलियो भने आइसोलेसन कक्ष निमार्ण गर्छौं।’
‘संघीय सरकारले सहयोग गरेन’
दुवै स्थानीय तहले संघीय सरकारले सहयोग नगरेको बताए। रंगेली नगरपालिकाका मेयर दिलीपकुमार अग्रवाल संघीय सरकारले आदेश फर्माएको बताउँछन्। ‘समन्वय भन्ने कुरा त त्यस्तै हो,’ मेयर अग्रवालले भने, ‘संघीय सरकारले आदेश फर्माएको छ, बसेको छ प्रदेशले भने केही सहयोग गरेको छ।’
त्यस्तै पथरी नगरपालिकाका मेयर राईले संघीय सरकारले सहयोग नगरेको भन्न केही हच्किए। ‘संघीय सरकारले सहयोग गरेन भन्न त मिल्छ कि मिल्दैन थाहा छैन,’ उनले भने, ‘तर सहयोग भने आएको छैन। हामीले आफ्नै पाराले काम गरेका छौँ।’
विदेश र भारतबाट आउनेलाई अनिवार्य क्वारेन्टाइनमा
दुवै नगरपालिकाले भारत तथा विदेशबाट आउनेलाई अनिवार्य क्वारेन्टाइनमा राखिएको जनाएका छन्। पथरीका मेयर राई भारत तथा विदेशबाट आउनेलाई स्थानीयले नै जानकारी दिने गरेको बताए । त्यस्तै रंगेलीका मेयर दीलिप कुमार अग्रवाल पनि नागरिकलाई यसबारे आफूहरुले धेरै सचेत गराएको दाबी गर्छन्।
‘हामीले घरघरमा लुकेर नबस्न, विदेशबाट आउनेलाई स्थानीय तहको सम्पर्कमा आउन माइकिङ गर्यौँ ,’ अग्रवाल भन्छन्, ‘माइकिङकै कारण विदेशबाट आउने पनि सम्पर्कमा आएका छन्। उनीहरुलाई क्वारेन्टाइनमा राखेका छौँ। सिमानामा कडा गरेका छौँ।’
जनप्रतिनिधिमा हलुका बुझाइका कारण कोरोना संघीय सरकारदेखि स्थानीय तहसम्मै पुगेको रंगेली नगरपालिकाका मेयर अग्रवालको धारणा छ। कोरोना नियन्त्रणमा काम गरिरहेको दाबी गरेका उनले आफूले कोरोनालाई फ्लुको रुपमा मात्रै लिएको बताए। ‘यो फ्लु रहेछ सबैलाई हुन्छ जान्छ त्यसैले नागरिकलाई आत्तिन पर्दैन सचेत चाहिँ हुनु भनेको छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
