काठमाडौं- कोरोना भाइरस संक्रमण पुष्टि भएको १४औं दिनमा लक्षण नभएका र सामान्य लक्षण भएकासमेतलाई अस्तपालबाट अनिवार्य डिस्चार्ज गर्ने सरकारको नीति पूर्ण रुपमा गलत भएको जनस्वास्थ्य विज्ञ डा समीरमणि दीक्षितले बताएका छन्।
परीक्षणलाई नजरअन्दाज गर्दा संक्रमितले अरुलाई सार्ने सम्भावना बढी हुने भएकाले सरकारको निर्णय पूर्ण रुपमा गलत भएको उनीहरुको भनाइ छ। संक्रमितको १० दिनपछि परीक्षण गर्नु ठिकै भएपनि सामान्य लक्षण भएका र लक्षण नभएका बिरामीलाई १४ दिनमा अनिवार्य रूपमा परीक्षण बिना घर पठाउनु नेपालको परिवेशमा सही नभएको डा. दीक्षितको भनाई छ। पहिलो पटक कोरोना देखिएको चीनमा समेत ३० दिनसम्म पनि भाइरस निष्क्रिय नभएको परिवेशमा नेपालमा १४ दिनमा विना परीक्षण छोड्ने निर्णय पूर्ण रुपमा गलत भएको उनले बताएका हुन्।
अर्का जनस्वास्थ्य विज्ञ डा. रवीन्द्र पाण्डे पनि परीक्षण नगरी संक्रमितलाई डिस्चार्ज गर्न उपयुक्त नहुने बताउँछन्।
स्वास्थ्य मन्त्रालय अन्तर्गतको आपत्कालीन स्वास्थ्य कार्यसञ्चालन केन्द्रले सातवटै प्रदेशका सामाजिक विकास मन्त्रालय र देशभरका कोभिड अस्पताललाई पत्राचार गरी १० दिनमा पीसीआर गरी पोेजेटिभ आएमा लक्षण नभएका र सामान्य लक्षण भएका संक्रमितलाई थप ४ दिन राखेर परीक्षण नै नगरी डिस्चार्ज गर्न भनेको थियो। १४ दिनपछि डिस्चार्ज नगरिए सरकारले सोधभर्ना नव्यहोर्ने चेतावनीसहित मन्त्रालयले कोभिड अस्पताल र प्रदेश सामाजिक विकास मन्त्रालयहरुलाई पत्राचार गरिसकेको छ।
यता सरकारले भने विश्व स्वास्थ्य संगठनले १० दिनपछि कुनै पनि संक्रमित व्यक्तिबाट अर्को व्यक्तिमा संक्रमण हुदैन भन्ने तथ्यहरु पेश गरेर निर्देशिका बनाएपछि सोही अनुसार निर्णय गरिएको दाबी गरेको छ।
मन्त्रालयका सहायक प्रवक्ता डा. समीरकुमार अधिकारीले डब्ल्युएचओको निर्देशिकालाई आधार बनाएर मन्त्रालयले आफ्नो निर्देशिकाहरु परिमार्जन गरिएको बताए। लक्षण नभएका व्यक्तिको हकमा १४ दिनपछि परीक्षण नगरी घर पठाउँदा कुनै समस्या नहुने उनको दाबी छ।
‘लक्षण नभएको व्यक्तिको हकमा १४ दिनपछि परीक्षण नगर घर पठाउँदा कुनै समस्या हुँदैन। अरु व्यक्तिलाई संक्रमण हुने सम्भावना हुँदैन। तथ्यहरुले १० दिनपछि संक्रमण हुँदैन भन्छ तर हामीले ४ दिन थपेको अवस्था हो। लक्षण छन भनेपनि लक्षण हराएको ३ दिनपछि संक्रमण फैलिने सम्भावना हुँदैन । परीक्षण भनेको संक्रमणको चक्रलाई रोक्न हो,’ उनले भने।
जनस्वास्थ्य विज्ञ दीक्षित दिने सहप्रवक्ता डा अधिकारीको भनाइसँग सहमत छैनन्। तराईका जिल्लाहरुमा क्वारेन्टाइनबाट परीक्षण नगरी घर पठाउँदा अहिलेको अवस्था आएको उल्लेख गर्दै उनले भने, '१५ दिनपछि पोजेटिभ हुँदैन भन्ने सोच्न थाल्यौं भने काठमाडौं र तराईका जिल्लाको जस्तै अवस्था देशभर हुन्छ। अनुसन्धान नै नगरी १५ दिनमा भाइरस जिउबाट गएको भन्न मिल्दैन। बेड बचाउन र पैसा बचाउन गर्न खोज्या होला तर एउटा बेड बचाउन गरिएको निर्णयले भोलि हजारौँ बेड थपिने अवस्था आउन सक्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766928868.png)
-1766648928.png)
