भरतपुर महानगरले संचालन गरेको क्वारेन्टाइन। इन्साइटमा मेयर रेनु दाहाल।
काठमाडौं- चितवनको भरतपुर महानगरपालिकाका स्थानीयले कोरोना संक्रमित, संक्रमण न्यूनीकरणमा खटिने कर्मचारी र जनप्रतिनिधिमाथि नै दुर्व्यवहार गरेका छन्। संक्रमतिको संख्या बढेसँगै अस्पतालका बेड भरिन थालेपछि महानगरपालिकामा छुट्टै आइसोलेसन बनाउन लाग्दा स्थानीयले आफूमाथि नै आक्रमण गरेको महानगरकी मेयर रेनु दाहालले बताएकी छन्।
‘केही दिन अगाडि एउटा टोलमा आइसोलेसन बनाउने भनेर हेर्न गएकी थिएँ। स्थानीयले नाराबाजी गरे। हामीमाथि ढुंगामुढासमेत प्रहार भयो,’ मेयर दाहालले नेपाल लाइभसँग भनिन्।
कोरोना संक्रमितप्रति स्थानीयसमेत अराजक बन्दै गएको र फ्रन्टलाइनमा खटिनेहरुप्रति नै दुर्व्यवहार बढेको भन्दै मेयर दाहालले चिन्ता व्यक्त गरिन्।
महानगरभित्र मंगलबारसम्म २ सय ३६ जनामा कोरोना भाइरसको संक्रमण पुष्टि भइसकेको छ। बुधबारको पूर्ण विवरण भने प्राप्त भइनसकेको महानगरको भनाइ छ।
महानगरका १ संक्रमितको मृत्यु
सुरुमा भारतलगायत अन्य मुलुकबाट आएका व्यक्तिमा देखिएको कोरोना हाल समुदायमा फैलिसकेको छ। महानगरमा २३६ संक्रमित मध्ये १ जनाको मृत्यु भएको छ। ६८ वर्षीय पुरुषको मृत्यू भएको हो।
महानगरमा ७३ जना संक्रमित कोरोना जितेर घर फर्किसकेका छन्। १६२ जना अस्पताल तथा होम आइसोलेसनमा छन्।
३५ स्वास्थ्यकर्मी कोरोना संक्रमित
क्यान्सर अस्पताल, भरतपुर अस्पताल, निजी अस्पताल तथा मेडिकलका स्टाफसमेत कोरोना संक्रमित भएका छन्। महानगरपालिकामा ३५ जना स्वास्थ्यकर्मीहरु संक्रमित भएको जनस्वास्थ्य शाखाका प्रतिनिधि दीपक श्रेष्ठले जानकारी दिए।
भरतपुर महानगरमा देखिएका कोरोना संक्रमित अधिकांश दीर्घरोगी तथा संक्रमितको सम्पर्कमा आएकाहरु भएको महानगरले जनाएको छ। सुरुमा प्रभावित क्षेत्रबाट आएकाहरूमा देखिएको कोरोना संक्रमण हाल उनीहरुका परिवार तथा आफन्त र सम्पर्कमा आएका व्यक्तिहरुमा देखिन थालेको छ।
होम आइसोलेसनमा बस्नेको संख्या बढ्दै
अस्पताल भरिँदै गएपछि लक्षण नभएका अधिकांश संक्रमितलाई होम आइसोलेनमा राख्न थालिएको छ। लक्षण नदेखिएका तथा जटिल अवस्था नभएकालाई होम आइसोलेनमा राख्ने संघीय सरकारको नीति अनुरुप नै होम आइसोलेसनमा राखिएको हो।
अस्पतालमा भर्ना भइसकेकाहरुको अवस्था सामान्य भए पनि बेड छाड्न नमान्ने प्रवृत्तिका कारण कतिपय अवस्थामा गम्भीर बिरामीलाई राख्नसमस्या समेत सिर्जना हुन थालेको महानगरपालिकाले जनाएको छ।
होम आइसोलेनमा रहेका संक्रमितहरुमा जटिल अवस्था देखियो भने उनीहरुलाई तत्काल एम्बुलेन्समार्फत् अस्पताल लैजाने व्यवस्था गरिएको छ। जसका लागि महानगरले २४ सै घण्टा एउटा एम्बुलेन्स उपलब्ध गराएको छ।
हाल कोरोना नियन्त्रणका लागि महानगरले अत्यावश्यक कामबाहेक घरबाहिर निस्कन कडाइ गरेको छ। संक्रमितको सम्पर्कमा आएकाहरुको कन्ट्याक्ट ट्रेसिङ गरेर पिसिआर परीक्षण गर्ने कामलाई समेत तीब्र बनाइएको महानगरपालिकाकी उपमेयर पार्वती शाह ठकुरीले बताइन्।
धेरै भीडभाड हुने क्षेत्रमा समेत पिसिआर परीक्षण गर्ने तयारी गरिएको उपमेयर ठकुरीको भनाइ छ।
स्वास्थ्यकर्मीको मनोबल बढाउन प्रोत्साहन भत्ता
भरतपुर महानगरपालिकाले फ्रन्टलाईनमा खटिएर काम गर्ने स्वास्थ्यकर्मीहरुको मनोबल बढाउन प्रोत्साहन भत्ताको व्यवस्था गरेको छ।
महानगरपालिका मातहतका स्वास्थ्यकर्मीहरुलाई प्रोत्साहन स्वरुप काममा खटिएको आधारमा आधारभूत तलबको ५० प्रतिशतदेखि शतप्रतिशतसम्म थप भत्ता उपलब्ध गराएको महानगरकी मेयर रेणु दाहालले बताइन्।
फ्रन्टलाईनमा खटिने स्वास्थ्यकर्मीहरुलाई केन्द्र सरकारले प्रोत्साहन भत्ता उपलब्ध गराउने बताएपनि उपलब्ध नगराएको उनले बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779880470.png)
-1764146706.png)
-1779545841.jpg)
