ललितपुर- ललितपुरका ६ वटै स्थानीय सरकारका प्रमुखले कोरोना संक्रमितको उपचारमा अग्रमोर्चामा खटिरहेका स्वास्थ्यकर्मीलाई सम्मान तथा आदरपूर्वक व्यवहार गर्न अपिल गरेका छन्।
संक्रमितको उपचारमा खटिएका स्वास्थ्यकर्मी समेत संक्रमित भइरहेको समयमा उनीहरुलाई बसोबास गर्ने क्षेत्र, निजी निवास तथा होस्टलमा स्थानीय जनता लगायत छिमेकीहरुबाट मानसिक तथा भौतिक सजायसमेत दिएका विषयमा ६ वटै स्थानीय तहका प्रमुखले संयुक्त विज्ञप्ति निकाल्दै ध्यानाकर्षण भएको बताएका हुन्।
ललितपुर महानगरपालिकाका प्रमुख चिरीबाबु महर्जन, महालक्ष्मी नगरपालिकाका प्रमुख रामेश्वर श्रेष्ठ, गोदावरी नगरपालिकाका प्रमुख गजेन्द्र महर्जन, महांकाल गाउँपालिकाका प्रमुख रामचन्द्र दाहाल, कोन्जोसोम गाउँपालिकाका प्रमुख गोपिलाल सिंतान र बागमती गाउँपालिकाका प्रमुख वीरबहादुर लोप्चनले संयुक्त विज्ञप्ति जारी गर्दै स्वास्थ्यकर्मीको सेवाको सम्मान गर्दै आदरपूर्वक व्यवहार गर्न अपिल गरेका हुन्।
कोरोना संक्रमितको संख्या वृद्धि भएसँगै स्वास्थ्यकर्मी पनि संक्रमित हुने क्रम बढेको र उनीहरूमाथि दुर्व्यवहारका घटना समेत उतिकै बढ्दै आएका छन्। शनिबार मात्र काठमाडौंको मध्यबानेश्वरका युवाले चिकित्सकलगायत स्वास्थ्यकर्मी बस्नका लागि लिइएको होस्टलअघि पुगेर हुलहुज्जत गरेका थिए। तर यो विषयमा काठमाडौंका स्थानीय सरकारहरूले भने सार्वजनिक रूपमा कुनै प्रतिक्रिया जनाएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
