काठमाडौं- बाहिरी जिल्लाबाट काठमाडौं उपत्यका प्रवेशको मुख्य नाका समेत रहेको चन्द्रागिरि नगरपालिकामा कोरोना संक्रमणले भयावह रुप लिन थालेको छ।
नगरपालिकाका अधिकांश संक्रमितहरु प्रभावित क्षेत्रबाट आएका व्यक्तिहरू भएको नगर प्रमुख (मेयर) घनश्याम गिरिले बताए। ‘हाम्रोे नगरपालिकामा अधिकांश प्रभावित जिल्लाबाट आएकाहरुमा कोरोना देखिएको छ, विस्तारै उनीहरुका परिवार र सम्पर्कमा आएका व्यक्तिहरुमा समेत कोरोना देखिन थालेको छ’ मेयर गिरिले नेपाल लाइभसँग भने।
६० जनामा कोरोना संक्रमण
शनिबारसम्म प्रभावित जिल्लाबाट आएका तथा उनीहरुका परिवार र सम्पर्कमा आएका ६० जना नगरबासीहरुमा कोरोना पुष्टि भएको नगरपालिकाले जनाएको छ।
आइतबारको तथ्यांक प्राप्त नभएको बताइएको छ। संक्रमितको सम्पर्कमा आएका नगरपालिकाका ४ जना स्वास्थ्यकर्मीहरुमा समेत कोरोना देखिएको मेयर गिरिले बताए।
‘फ्रन्टलाइनमा खटिएका ४ जना स्वास्थ्यकर्मीलाई कोरोना पुष्टि भएपछि हामीले उनीहरुको सम्पर्कमा आएका व्यक्ति तथा परिवारको कोरोना परीक्षण गराएका थियौं’ मेयर गिरिले भने, ‘सम्पर्कमा आएका अन्य व्यक्तिहरुको पिसिआर रिपोर्ट नेगेटिभ देखियो भने परिवारका सदस्यहरुमा कोरोना पोजिटिभ देखियो।’
प्रभावित जिल्लाबाट आएकाहरुमार्फत् बिस्तारै समुदायमा कोरोना फैलन सुरु गरेसँगै कन्ट्याक्ट ट्रेसिङ तथा पिसिआरको दायरालाई फराकिलो बनाइएको नगरपालिकाले जनाएको छ।
फ्रन्ट लाइनमा खट्ने व्यापारी, सरसफाइको काम गर्ने कर्मचारी, स्वास्थ्यकर्मी, जनप्रतिनिधि तथा संक्रमितको सम्पर्कमा आएका व्यक्तिहरुको क्रमशः कोरोना परीक्षण गराउँदै लैजाने योजना बनाएको मेयर गिरिले बताए।
४ वटा वडामा कोरोना संक्रमण बढी
नगरपालिकाका वडा नम्बर ११, १२, १३ र १४ मा कोरोना संक्रमण अन्यको तुलनामा बढी देखिएको छ। बाहिरी जिल्लाका मानिसहरू कोठाभाडामा बस्ने नगरपालिकाका स्थानमा कोरोना संक्रमण फैलिएको मेयर घनश्याम गिरिले बताए।
‘बाहिरी जिल्लाबाट आएर कोठा भाडामा बसेका वडा तथा अलि बढी चहलपहल हुने स्थानमा कोरोना देखिएको छ’ मेयर गिरिले भने।
कोरोना संक्रमितका लागि नगरपालिकामा दुई अस्पताल
कोरोना उपचारका लागि नगरपालिकाका दुईवटा अस्पताल छन्। बलम्बुस्थित एपिएफ अस्पताल र दहचोकस्थित मनमोहन अस्मापतालले कोरोना संक्रमितहरुका लागि सेवा प्रदान गर्दै आएका छन्।
‘मनमोहन अस्पतालमा साढे ३ सयदेखि ५ सयसम्म आइसोलेसन बेड क्षमता छ। एपिएफ अस्पतालमा साढे २ सय बेड छन्’ मेयर गिरि भन्छन्, ‘भनेपछि हामीसँग ७ सयभन्दा बढी बेड नगरपालिकामा आइसोलेसनका लागि छ।’
यी दुवै अस्पतालमा नगरबासीहरुलाई पहिलो प्राथमिकता दिनेगरी नगरपालिकासँग सहमति भएको बताइएको छ। हालसम्म आइसोलेसन बेडको अभाव नगरपालिकामा नभएको नगरपालिकाका मेयर घनश्याम गिरिले बताए। संक्रमितको चाप बढ्दै गएमा थप आइसोलेसन सेन्टर सञ्चालन गर्ने योजना समेत नगरपालिकाले बनाएको उनले बताए।
होम आइसोलेसनलाई विशेष प्राथमिकता
नगरपालिकाले होम आइसोलेसनलाई विशेष प्राथमिकतामा राखेको छ।
संक्रमितको अवस्था जटिल बन्दै गएमा तथा होम आइसोलेसनमा बस्ने वातावरण नभएमात्र संक्रमितहरुलाई अस्पताल पुर्याइने व्यवस्था गरिएको छ।
मेयर घनश्याम गिरि भन्छन्, ‘संक्रमितहरुको अवस्था जटिल भएमा मात्रै हामी उहाँहरुलाई अस्पताल लैजान्छौं। होइन भने होम आइसोलेसनमा नै बस्न भनेका छौं। होम आइसोलेसनमा बस्न सम्भव नभएका तथा अस्पताल बस्नुनपर्नेहरुका लागि होटल समेत व्यवस्था गरिएको छ।’
हालसम्म सबैजसो बिरामीको अवस्था सामान्य रहेको नगरपालिकाले जनाएको छ। जटिल अवस्था भएर आइसियुमै लैजानुपर्ने अवस्था पनि कसैको नभएको मेयर गिरिले जानकारी दिए।
कोरोना रोकथाममा साढे २ करोड खर्च
कोरोना रोकथाम तथा नियन्त्रणका लागि सक्दो पहल गरिएको नगरपालिकाले जनाएको छ।
साढे २ करोडभन्दा बढी रकम कोरोना रोकथाम तथा नियन्त्रणका लागि खर्च भएको मेयर घनश्याम गिरिले बताए।
‘हामीले निश्चित योजना तथा कार्यक्रममा छुट्याएको बजेटको रकमलाई नै कोरोना रोकथाम तथा नियन्त्रणका लागि डाइभर्ट गर्नुपरेको अवस्था छ’ उनले भने, ‘नगरपालिकाको आफ्नो आन्तरिक स्रोतबाट साढे २ करोडभन्दा बढी रकम कोभिड नियन्त्रणका लागि खर्च भइसकेको छ।’
क्षमताले भ्याएसम्म कोरोना नियन्त्रणका लागि काम गरिरहेको उनको भनाइ छ।
हाल सरकारले काठमाडौं उपत्यकामा निषेधाज्ञा घोषणा गरिसकेको छ। नगरपालिका पूर्ण रुपमा सिल छ। अत्यावश्यक काम बाहेक घरबाहिर ननिस्किन नगरबासीहरुलाई आग्रह गरिएको छ। खाद्यान्न, खानेपानी, ग्याँसलगायत अत्यावश्यक सामग्रीका पसल पनि बिहान ५ बजेदेखि ८ बजेसम्म खोल्न दिइएको नगरपालिकाले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
