धनगढी- जिल्ला प्रशासन कार्यालय कैलालीले बुधबार एक सूचना जारी गर्दै कैलाली जिल्लाभर पुनः लकडाउन गर्ने निर्णय गरेको छ। बिहीबार राती १२ बजेदेखि भदौ १४ गतेसम्म अत्यावश्यक सेवा बाहेक सबै गतिविधि पूर्ण रुपमा बन्द गर्ने निर्णय भएको जनाएको छ।
बिहीबार राति १२ बजेदेखि १४ गरेसम्मका लागि निषेधाज्ञा लगाइने भएको छ। कैलालीका प्रमुख जिल्ला अधिकारी यज्ञराज बोहराको अध्यक्षतामा बसेको जिल्ला संकट व्यवस्थापन समितिको बैठकले यस्तो निर्णय गरेको हो।
यो अवधिमा औषधि, खाद्यवस्तु र अत्यावश्यकीय वस्तु खरिदको कामका लागि बाहेक बाहिर निस्कन पाइने छैन। अत्यावश्यक कामका लागि बाहिर निस्किँदा मास्क अनिवार्य लगाउनुपर्नेछ।
अत्यावश्यकीय सामग्री ढुवानी, स्वास्थ्यकर्मी र सुरक्षा निकाय बाहेक सवारी सञ्चालनमा रोक लगाइएको छ। सम्पुर्ण व्यापार व्यवसाय समेत सञ्चालनमा समेत रोक लगाइएको छ।
यस्तै डिपार्टमेन्ट स्टोर, सैलुन, ब्युटिपार्लर, जिमखाना, फुटपाथमा संचालन हुने व्यापार, होटल तथा रेस्टुरेन्ट खोल्न नपाइने निर्णय समेत भएको छ।
खाद्यान्न, तरकारी, दूध, फलफुल, मासुको हकमा सुरक्षाका मापदण्ड पालना गरी खोल्न सकिने जिल्ला संकट व्यवस्थापन केन्द्रको बैठकले निर्णय गरेको छ।
जिल्लाभित्र प्रवेश निषेध गरिने निर्णय पनि भएको छ। अत्यावश्यक कार्यालयमा कार्यरत कर्मचारीले भने फोटोसहितको परिचयपत्रका आधारमा सवारी संचालन गर्न दिइने भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
