वडा नम्बर १० मा कोरोना संक्रमण भयावह रूपमा फैलिएको छ। नयाँ बानेश्वर, मध्यबानेश्वर, थापागाउँ, शंखमूल, बुद्धनगर, बिजुलीबजारलगायतका वडाका धेरै स्थानमा कोरोना फैलिसकेको छ। आइतबारसम्म वडाभर ३६ जनामा कोरोना संक्रमण पुष्टि भएको छ। सोमबारको पूर्ण विवरण आएको छैन।
कोरोना पोजिटिभ देखिएका ३६ जनामध्ये ३ जना बाहिरबाट आएका छन् भने अरु बाँकी ३३ जना वडामै बसिरहेकाहरू हुन्। वडामा बस्नेहरुमध्ये कार्यालयहरूमा काम गर्ने, व्यापारी, सुरक्षाकर्मी, मजदूरी गरी त्यहीँका स्थानीयवासी र कोठाभाडामा बस्नेहरू छन्। सुरुमा बाहिरबाट आउनेहरूमा देखिएको कोरोना समुदायमा फैलिइसकेको छ।
समुदायस्तरमा कोरोना फैलिएपछि हामीले वडामा अत्यावश्यकबाहेकका सबै सेवा बन्द गर्ने निर्णय गरेका छौँ। भट्टीपसल, फुटपाथ, ठेलागाढा, सैलुन, ब्युटीपार्लर, जिमहल, पार्टी प्यालेस जस्ता भिडभाड र कोरोना संक्रमणको जोखिम हुने स्थान अर्को सूचना जारी नहुँदासम्मका लागि बन्द गरेका हौँ।
कोरोना नियन्त्रणका लागि अहिलेसम्म जेजे गर्न सकिन्छ त्यो सबै हामीले गरिरहेका छौँ। यसको औषधि नै नभएकाले सामाजिक दूरी तथा सचेतनाबाहेक अरु विकल्प छैन। माइकिङ गरेर समुदायमा घरघरमा तथा टोलटोलमा जनचेतना जगाउने काम भइरहेको छ। अत्यावश्यक कामबाहेक घरबाट बाहिर ननिस्कन सबैलाई आग्रह गरेका छौँ। मास्क, स्यानिटाइजरजस्ता स्वास्थ्य सुरक्षाका आधारभूत सेवाहरू उपलब्ध गराइरहेका छौँ। घरबाट बाहिर निस्किँदा मास्क, पञ्जा प्रयोग गर्न अनिवार्य गरेका छौँ।
संक्रमितहरू तथा सम्पर्कमा रहेका व्यक्तिहरूको खोजी गरिरहेका छौँ। यसमा वडाको स्वास्थ्य टोली अहोरात्र खटिएको छ। अहिले वडाका ३६ बिरामीहरूमध्ये कतिपय टेकु तथा पाटन अस्पतालमा हुनुहुन्छ भने कतिपय होम आइसोलेसनमै बस्नु भएको छ।
संक्रमितहरुलाई अस्पतालले उपयुक्त खानपानको व्यवस्था नगरेको बिरामीहरुको आरोप छ। कोरोना संक्रमण भएको अवस्थामा रोगप्रतिरोधात्मक क्षमता विकासका लागि धेरै पोसिलो खानेकुरा खानुपर्छ भनिएको छ। तर अस्पतालमा बिहान ब्रेकफास्ट, सादा खाना, दिउँसो सामान्य खाजा र बेलुका सादा खानाबाहेक केही नदिएको गुनासो धेरैले सुनाउनु भएको छ। यस्तो खानपानले त संक्रमितहरूलाई झन् कमजोर बनाउँछ। र झनै जोखिम बढाउँछ। झोलिलो पदार्थ, फलफूल माछामासु खानुपर्ने बिरामीहरूले अस्पतालमा मन लागेको बेला पानीसमेत खान नपाउने गुनासो छ।
पछिल्लो समय त अस्पतालको सेवा राम्रो नहुँदा कतिपय संक्रमितहरू होम आइसोलेसनमा बस्न रुचाउनु भएको छ। हामीले पनि सुरक्षित भएर होमआइसोलेसनमा बस्न सक्ने वातावरण छ भने उहाँहरूलाई सुरक्षित भएर होम आइसोलेसनमै बस्न भनेका छौँ। यसरी होम आइसोलेसनमा बसेको अवस्थामा सास फेर्न अप्ठ्यारो भयो भने वा अन्य स्वास्थ्य समस्या देखिन थाल्यो भने हामीले तत्काल खबर गर्न भनेका छौँ।
उहाँहरू सबैलाई एम्बुलेन्स नम्बर पनि उपलब्ध गराएका छौँ। गाह्रो भयो भने उहाँहरूले तुरुन्त एम्बुलेन्स बोलाएर अस्पताल जान सक्नुहुन्छ। वडाको स्वास्थ्य टोलीले पनि दैनिकजसो फोनमार्फत् सान्त्वना तथा परामर्श दिने गरेको छ। म स्वयं पनि दैनिकजसो सबै संक्रमितहरूको सम्पर्कमा रहने गरेको छु।
अहिले संक्रमितहरूका लागि सान्त्वना पनि औषधिजस्तै भएको छ। उहाँहरुलाई दिनमा एकपटक फोन गरेर नआत्तिनुस् केही हुँदैन। तातोपानी खानुस् र घरेलु उपाएहरु अपनाउनुस् भनेर सान्त्वना दिँदा पनि आफूहरुलाई आधा जति समस्या घटेको बताउनुहुन्छ।
एकजना सुरक्षाकर्मीमा कोरोना संक्रमण भएपछि उहाँ आत्तिनु भएको थियो। मैले केही हुँदैन। विस्तारै निको हुन्छ नआत्तिनुस् भनेर ढाडस दिइरहेँ। सिटामोल तातोपानीसँगै घरेलु उपाय अपनाउन भनेँ। संक्रमण भएको दुई दिनमै आफूमा देखिएको समस्या आधा घटेको उहाँले बताउनु भयो।
यसरी अन्य संक्रमितहरुसँग पनि नजिकिएर जतिसक्दो आत्मबल बढाउन प्रोत्साहन गरिरहेको छु। यसबाट धेरैजनाले आफूलाई हल्का महसुस भएको बताउनु भएको छ। आफू वडाको अभिभावक भएको हिसाबले पनि मैले सोहीअनुसार काम गरिरहेको छु। अब कोरानाको औषधि नआएसम्म संक्रमितहरूलाई सान्त्वना दिनु र सचेत गराउनुको विकल्प पनि देखेको छैन।
(काठमाडौं महानगरपालिका-१० का वडाध्यक्ष केसीसँग नेपाल लाईभकर्मी निर्मला घिमिरेले गरेको संवादमा आधारित)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771481179.png)
-1764146706.png)
