विराटनगरमा काेराेना संक्रमितकाे संख्या दिनदिनै बढ्दै गएकाे छ। विराटनगरको स्थिति भयावह बनेकाे छ। विराटनगरमा संक्रमित बढ्नुमा खुला सिमाना हुनु र विदेशबाट आएका व्यक्तिकाे पहिचान हुन गाह्रो हुनु नै प्रमुख कारण हुन्।
अहिलेसम्म विराटनगर महानगरपालिका वडा नम्बर ९ मा सबैभन्दा धेरै कोरोना संक्रमित देखिएका छन्। साउन १६ गते लकडाउन गर्नु भन्दा अघिसम्म १ सय ३ जना संक्रमित थिए। त्यसयता दिनकै ५० देखि ६० जनाको दरले संक्रमित बढ्न थालेका छन्। यसले वीरगञ्जपछि विराटनगरको स्थिति भयावह देखिएको हाे।
कोरोना भाइरस रोकथाम न्यूनीकरण र नियन्त्रयणको लागि हामीले गर्न सक्ने भनेको काम लकडाउन गर्ने, हुलमुल हुन नदिने, परीक्षणको दायरा फराकिलो बनाएर संक्रमित व्यक्तिको सम्पर्कमा आएकालाई परीक्षण गर्नु हो। अहिले हामीले सबै काम गरिरहेका छौँ। स्रोत र साधनले भ्याएसम्म सकेको काम गरेका छौँ। अगामी दिनमा हामीले सैलुन, सबै प्रकारका पसल, हुलमुल हुने सरकारी कार्यलयमा परीक्षणको गर्दैछौँ । त्यहीअनुसार कन्ट्याक्ट ट्रेसिङ पनि गर्छाैं।
हाम्रो वित्तीय अवस्था अन्य महानगरपालिकाको जस्तै छ। कोरोना नियन्त्रणका लागि प्रदेश र संघबाट केही सहयोग पाएका छैनौँ। भनिन्छ नि 'खुकुरीको घाउ अचानोलाई थाहा हुन्छ' यो अवस्थामा कसैलाई आरोप नलगाइकन काम गर्नु पर्छ। बरु हामी केही बाटो पिच गर्दैनौँ। केही पूर्वाधारहरु बनाउँदैनौँ। तर, नागरिकको स्वास्थ्यमा हेरविचार गर्छाैँ। त्यसका लागि मैले ४ करोड छुटाएको छु।
कुुनै क्षेत्रमा कोरोना संक्रमित भेटिएपछि त्यो संक्रमितको सम्पर्कमा आउन सक्ने परिवार र उसको सम्पर्कमा आएकालाई प्राथामिकता दिएका छौँ। कन्ट्याक्ट ट्रेसिङ गर्दा त्यो टोलमा धेरै कोरोना संक्रमित देखियो भने टोलै सिल गरेर त्यो टोलको संक्रमितको सम्पर्कमा आएकाहरुको कन्ट्याक्ट ट्रेसिङ गरेका छाैं।
विराटनगरमा समुदाय स्तरमा कोरोना फैलिसक्यो। हामीसँग लेभल वानको उपचार गर्न सक्ने मात्र क्षमता छ। अन्यलाई धरानस्थित बिपी कोइराला स्वास्थ्य विज्ञान प्रतिष्ठानमा लैजानु पर्छ।
मैले एउटा योजना बनाएको छु, ५० शय्या क्षमताको अस्पताल बनाउने। संविधानअनुसार स्थानीय तहले अस्पताल बनाउन पाउँदैन, तर जनता मर्न दिन त भएन नि! प्रदेशले नगरेपछि हामीले त गर्न पर्यो नि!
सकेसम्म समन्वय गरेर नत्र स्थानीय तह नै अस्पताल बनाउन सक्छ र बनाउँछ पनि। हामीसँग केही संख्यामा आइसियू र ४ वटा भेन्टिलेटर छ। कोरोना लागेका बिरामी मात्रै होइन, अन्य बिरामीलाई पनि आइसियूमा राख्नु पर्यो भने सकिने अवस्था छैन। भएका स्रोत र साधनलाई उपयोग गर्दै नागरिकको स्वास्थ्यमा विराटनगर महानगरपालिका तयार छ।
(विराटनगरका मेयर भीम पराजुलीसँग प्रजु पन्तले गरेको कुराकानीमा आधारित)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
