काठमाडौं- कोरोना भाइरसको संक्रमण बढेको भन्दै जिल्ला प्रशासन कार्यालय ललितपुर र भक्तपुरले पनि काठमाडौंकै जस्तो केही गतिविधि संचालन गर्न रोक लगाउने आदेश जारी गरेका छन्।
ललितपुर र भक्तपुरका प्रमुख जिल्ला अधिकारीहरू क्रमशः नारायणप्रसाद भट्ट र हुमकला पाण्डेले आदेश जारी गर्दै साउन ३० देखि लागू हुने गरी जमघट हुने गरी धार्मिक कार्य गर्न, भिडभाड गर्न र नाराजुलुस लगाउन प्रतिबन्ध लगाएका हुन्। यस्तो प्रतिबन्ध भदौ १५ सम्म लागू हुनेछ।
यस्तै कुनै पनि तालिम तथा गोष्ठी गर्नसमेत दुवै जिल्लाका प्रशासनले रोक लगाएका छन्। तोकिएका गतिविधि निषेध गरिएको समयमा संचालन गरे कारबाही गरिने समेत प्रशासनले स्पष्ट पारेको छ।
प्रशासनले जारी गरेको आदेश उल्लंघन गरे स्थानीय प्रशासन ऐन, २०२८ को दफा ६ (३) बमोजिम कारबाही गर्ने विज्ञप्तिमा उल्लेख छ। ऐनअनुसार आदेश उल्लंघन गर्ने व्यक्तिलाई प्रहरीले गिरफ्तार गर्नेछ। गिरफ्तार गरिएका व्यक्तिलाई तुरून्त प्रहरीले प्रमुख जिल्ला अधिकारी समक्ष पेश गर्नुपर्नेछ।
प्रमुख जिल्ला अधिकारीले ती व्यक्तिलाई उपयुक्त सम्झेको संक्षिप्त कार्यविधि अपनाई एक महिनासम्म कैद वा एक हजार रूपैयाँसम्म जरिवाना वा दुवै सजाय गर्न सक्नेछन्। उक्त सजायको आदेश चित्त नबुझेमा उच्च अदालतमा पुनरावेदन लाग्नेछ।
प्रशासनले रोक लगाएका गतिविधि
-खुल्ला स्थानमा मानिसहरु भेला जम्मा हुन, भीडभाड गर्न, सभा जुलुस गर्न।
-भीडभाड हुने गतिविधि जस्तै जात्रा, महोत्सव संचालन गर्न।
-दैनिक हुने नित्य पूजा बाहेकका सम्पूर्ण धार्मिक गतिविधिहरु।
-उद्योग व्यापार, व्यवसाय अन्तर्गतका स्वास्थ्य मापदण्ड विपरितका क्रियाकलापहरु।
-चाडपर्व लगायतका धार्मिक सांस्कृतिक कार्य गर्नका लागि हुने जमघटहरु।
-शैक्षिक संस्थाहरु संचालन गर्न।
-सबै प्रकारका सभा, गोष्ठी, तालिम सेमिनार, सिनेमा हल, पार्टी
-प्यालेस, मनोरजन स्थल, शैलून, ब्यूटी पार्लर, स्पा, स्वीमिङ्ग पुल, जिमखाना समूहमा खेलिने खेलकुद र खेल प्रस्तुति, पुस्तकालय, संग्रहालय, चिडियाखाना संचालन गर्न।
-फुटपाथ, खुल्ला ठाउँ र ठेला गाडा, साइकलमा संचालन हुने विभिन्न व्यवसाय, कवाडी संकलन गर्न।
-उद्योग व्यवसाय संचालनका लागि स्वास्थ्य मापदण्ड विपरीत श्रमिकरकामदारको ओसार पसार गर्न।
-टेक वे बाहेक होटल, रेस्टुराँ सञ्चालन गर्न।
ललितपुर प्रशासनको आदेश
भक्तपुर प्रशासनको आदेश
काठमाडौं प्रशासनको आदेश
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1746520246.jpg)
-1764146706.png)
