काठमाडौं- सत्तारुढ नेपाल कम्युनिस्ट पार्टी (नेकपा)का महासचिव विष्णुप्रसाद पौडेलले नेकपा एकता अक्षुण्ण रहने सुनिश्चित भएको दाबी गरेका छन्। पार्टी विवाद समाधान समितिका संयोजक पौडेलले सञ्चारमाध्यमलाई प्रक्रिया दिँदै पार्टीभित्र देखिएका समस्यालाई संस्थागत ढंगले समाधान गरिने बताएका हुन्।
नेकपा अध्यक्ष केपी ओली र पुष्पकमल दाहालले पौडेलको संयोजकत्वमा गठन गरेको समितिमा स्थायी कमिटी सदस्यहरू शंकर पोखरेल, जनार्दन शर्मा, सुरेन्द्र पाण्डे, भीम रावल र पम्फा भुसाललाई राखिएको छ।
‘नेकपामा कुनै किसिमको विग्रह आउँदैन। नेकपा एकताबद्ध भएर अघि बढ्छ। नेकपाको एकता अक्षुण्ण रहनेछ भन्ने आजको समिति बनेदेखि सुनिश्चित भएको छ,’ पौडेलले भने, ‘पार्टीमा जे जस्ता समस्याहरु देखिएका छन्। ती समस्याहरुलाई सस्थागत ढंगले समाधान गर्ने ढंगले अगाडि बढ्ने छौँ।’
कार्यदलले पार्टीका समस्या पहिचान गर्नुका साथै समाधानका उपायसमेत प्रतिवेदनमा सुझाउने पौडेलले बताए। आफूहरुले समस्या समाधानका उपाय छलफलबाट पहिचान गरी अध्यक्षद्वयलाई पेस गरिने उनले बताए। प्रतिवेदनलाई आधार मानेर अध्यक्षद्वयले पार्टीमा पेस गर्ने बताएइको छ।
महासचिव पौडेलको भनाइ उनकै शब्दमा
आज खासगरी दुई जना अध्यक्षबीच गम्भीर छलफल भयो। छलफलपछि एउटा महत्वपूर्ण निष्कर्षमा पुग्नु भएको छ। हाम्रो पार्टीको आन्तरिक जीवनमा जे जस्ता समस्याहरु देखा परे, ती समस्याको सकारात्मक समाधान खोज्दै नेकपाको एकतालाई अक्षुण्ण राख्नुपर्छ। यो एकतालाई सबल तुल्याउनु पर्छ, नेपाली जनताले नेकपामाथि जुन प्रकारको आशा अपेक्षा, विश्वास र भरोसा गरेका छन् त्यो पूरा गर्नुपर्छ।
नेकपा एकताबद्ध भएर अघि बढ्नुपर्छ भन्ने निष्कर्षमा उहाँहरु पुग्नु भएको छ। हामीभित्रका समस्याहरु हाम्रो नियन्त्रणभित्रै छन्। हाम्रो काबु बाहिर छैनन्। समाधान गर्ने सामर्थ हामीसंग छ। हामी ती समस्याको समाधान गर्न सक्छौं भन्ने निष्कर्ष छ।
कतिपयले नेकपाको विग्रहको जुन कल्पना गरेका थिए। अब नेकपामा कुनै किसिमको विग्रह आउँदैन। नेकपा एकताबद्ध भएर अघि बढ्छ। नेकपाको एकता अक्षुण रहनेछ भन्ने आजको समितिदेखि सुनिश्चित भएको छ। आजका मितिसम्म जे जस्ता समस्याहरु देखिएका छन् ती समस्याहरुलाई सस्थागत ढंगले समाधान गर्नेगरी अगाडि बढ्ने छौँ।
दुई अध्यक्षको अधिकारलाई प्रयोग गर्दै ६ सदस्यीय कार्यदल गठन गर्नुभएको छ। कार्यदलले समस्या के हुन समाधान के हुन सक्छ भन्ने विषयमा विस्तारपूर्वक छलफल गरेर छिटो प्रतिवेदन पेश गर्ने छ। त्यो प्रतिवेदनलाई समेत आधार मानेर दुई अध्यक्षले औपचारिक पार्टी बैठकमा प्रस्तुत गर्नु हुने छ। पार्टीका आन्तरिक जीवनमा समस्या समाधान गर्नेगरी अगाडि बढ्नेछौँ।
आज नेकपा सम्पूर्ण नेता सबै कार्यकर्ता,सदस्य र मतदाताहरु नेकपासंग आफ्नो भविय देख्नेहरु स्वदेश तथा विदेशमा रहनु भएका सबैलाई आस्वस्त हुन आग्रह गर्दछु। नेकपा आफ्ना अभिभारा पुरा गर्दै अगाडि बढ्ने छ। नेकपा विग्रहको खोजी गर्ने शक्ति,प्रवृत्तिहरु र शक्तिहरुलाई स्पष्टसँग भन्न चाहन्छु। नेकपाभित्र खेल्ने व्यर्थका कोसिसहरु नगरे हुन्छ। नेकपा आफ्ना अभिभारा के हो भन्ने बुझ्न सक्षम छ। जनताले दिएको जिम्मेवारी पूरा गर्न प्रतिवद्ध छ।
केन्द्रीय कमिटीको दोस्रो बैठकपछि हाम्रो आन्तरिक जीवनमा देखा परेका क्रमिक रुपमा जटिल रुपमा बन्दै बन्दै गए। त्यो निक्कै जटिल अवस्थामा पुगेको सत्य हो। जसले गर्दा सरकार र पार्टीका काममा व्यवधानहरु खडा भए। पार्टीका कामहरुपनि प्रभावकारी रुपमा अगाडि बढ्न सकेनन्। अब हामी सरकार र पार्टीका कामहरु प्रभावकारी ढंगले अगाडि बढाउने छौँ। सरकार पार्टीका काम प्रभावकारी ढंगले संगसंगै राष्ट्रिय राजनीतिमा प्रस्तुत हुने छौँ। अहिले सबैको चाहना समस्याको समाधान थियो। नेकपामा जुन किसिमको समस्या प्रकट भयो। त्यो समस्या सबैका लागि चिन्ता र चासोको विषय थियो। हामी किन यस्ता समस्यामा अल्झिन बल्झिन पुग्यौं? ती समस्याका समाधानका उपाय के हुन् भनी छलफल गर्छौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
