कोरोना संक्रमितको मृत्युपछि अन्तिम संस्कारको तयारी गरिँदै।
काठमाडौं- नेपालमा हालसम्म ९५ जना कोरोना भाइरस संक्रमितको मृत्यु भएको स्वास्थ्य तथा जनसंख्या मन्त्रालयले जानकारी दिएको छ।
दिउँसो सवा ४ बजे मन्त्रालयले आयोजना गरेको मिडिया ब्रिफिङमा बोल्दै मन्त्रालयका प्रवक्ता डा जागेश्वर गौतमले नेपालमा ९५ जना संक्रमितको मृत्यु भएको जानकारी दिएका हुन्।
गत २४ घण्टामा थप चार जना कोरोना संक्रमितको मृत्यु भएसँगै मृतकको संख्या ९५ पुगेको हो। महोत्तरी, धुनषा, अछाम र मोरङमा १/१ जनाको मृत्यु भएको स्वास्थ्य तथा जनसंख्या मन्त्रालयले जनाएको छ।
महोत्तरीको मटिहानी नगरपालिका वडा नं ६ का ४५ वर्षीय एक कोरोना संक्रमित पुरुषको मृत्यु भएको छ। उनको उपचारको क्रममा रामजानकी अस्पतालमा साउन २५ गते मृत्यु भएको मन्त्रालयका प्रवक्ता डा जागेश्वर गौतमले बताए। उनी क्षयरोग तथा मधुमेहका रोगी रहेको मन्त्रालयले जनाएको छ।
धनुषाको मिथिला नगरपालिका वडा नं ७ ढल्केबरका ८५ वर्षीय महिलाको पनि साउन २८ गते मृत्यु भएको छ । उनी बिपी कोइराला स्वास्थ्य विज्ञान प्रतिष्ठान धरानमा उपचाररत थिए।
अछामको रामारोशन गाउँपालिका वडा नं ५ का १८ वर्षीय एक पुरुषको मृत्यु भएको छ। उनको उपचारको क्रममा पाटन अस्पतालमा साउन २८ गते मृत्यु भएको हो। मन्त्रालयका अनुसार उनी मुटुरोगका बिरामी थिए।
यस्तै, मोरङको विराटनगर महानगरपालिका वडा नं ३ का ५७ वर्षीय एक पुरुषको साउन २८ गते मृत्यु भएको छ। उनको उपचारको क्रममा कोशी अस्पताल विराटनगरमा मृत्यु भएको हो। उनी उच्च रक्तचाप तथा मधुमेहका बिरामी रहेको मन्त्रालयले जनाएको छ।
पछिल्लो २४ घन्टामा नेपालमा थप ५२५ जनामा कोरोना भाइरसको संक्रमण देखिएको छ। २४ घन्टामा देशका विभिन्न ३८ प्रयोगशालामा गरिएको परीक्षणका क्रममा यी व्यक्तिमा कोरोना भाइरसको संक्रमण पोजेटिभ देखिएको स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले जानकारी दिएका हुन्।
यो सहित नेपालमा कोरोना संक्रमित हुनेको संख्या २४ हजार ९५७ जना पुगेको छ।
बुधबार ४८४ जनामा कोरोना भाइरसको संक्रमण देखिएको थियो।
पछिल्लो २४ घण्टामा थप १०९ जना कोरोना संक्रमणमुक्त भएका छन्। योसहित नेपालमा हालसम्म १६ हजार ८३७ उपचारपछि निको भएका छन्।
पछिल्लो २४ घण्टामा ९ हजार ८ सय ५९ जनाको पिसिआर परीक्षण भएको छ। हाल १४ हजार ७ सय ६९ जना क्वारेन्टाइनमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
