सिन्धुपाल्चाेक- सिन्धुपाल्चोकमा शिक्षक र प्रहरीमा कोरोना संक्रमण देखिएपछि दुई ठाउँमा सिल गरिएको छ। जुगल गाउँपालिका वडा नम्बर ५ र सुनकोशी गाउँपालिका वडा नम्बर ७ सिल गरिएको हो।
जिल्ला कोभिड १९ विपद् व्यवस्थापन केन्द्रको बैठकले अर्को निर्णय नभएसम्मका लागि यी दुई वडा सिल गर्ने निर्णय गरेको हो। गाउँपालिकामा कार्यरत दुई शिक्षकमा कोरोना पोजेटिभ देखिएपछि जुगल गाउँपालिकाको कार्यालय पनि बन्द गरिएको छ।
सल्यानबाट साउन १७ गते जुगल आएका जुगल ५ का सेतीदेवी मावि र रत्नराज्य माविका दुई शिक्षकमा कोरोना देखिएको थियो। ५ नम्बर वडामा नै गाउँपालिका कार्यलय रहेकाले गाउँपालिका कार्यालय पनि बन्द गरिएको छ।
भदौ १ गतेदेखि भर्ना अभियान सञ्चालन गर्ने र भदौ १५ देखि विद्यालयमा पठनपाठन सञ्चालन गर्ने सरकारको निर्णयअनुरुप सल्यानबाट ती शिक्षक जुगल आएका हुन्। उनीहरुले सल्यानबाट आउँदा थानकोटमा पिसिआर परीक्षणका लागि स्वाब दिएका थिए। उनीहरु सिन्धुपाल्चोक आएको ६ र ७ दिनपछि दुवै जनामा कोरोना पोजेटिभ देखिएको रिपोर्ट आएको थियो। उनीहरुले विद्यालयका अन्य शिक्षकसँग भेटघाट गर्नुका साथै बस्ने घर, खाना खाने होटल र एक पास्नीमा समेत संलग्न भएको पाइएपछि सम्पर्कमा आएकाकाे पनि स्वाब संकलन सुरु गरिएकाे छ।
त्यस्तै सुनकोशी गाउँपालिका ७ घर भएका एक प्रहरीमा पनि कोरोना संक्रमण देखिएको छ। वडा नम्बर ७ का ३५ वर्षीय पुरुषमा कोरोना संक्रमण देखिएपछि उनको सम्पर्कमा आएकाहरुको स्वाब संकलन थालिएको छ। दुई किलोस्थित क्षेत्रीय क्वारेन्टाइन रहेको सिर्जनशीलमा स्वाब संकलन सुरु भएकाे हाे। उनी साउन १६ गते घर आएर १८ गते फर्किएका थिए। २१ गते बनेपामा स्वाब संकलन गर्दा उनको काेराेना रिपाेर्ट पोजेटिभ आएको थियो।
ती पुरुषमा कोरोना पोजेटिभ देखिएपछि उनको घर रहेको जामुनेका ४० भन्दा बढी व्यक्तिहरुको कन्ट्याक्ट ट्रेसिङमार्फत स्वाब संकलनको काम थालिएको छ। उनी बनेपाको प्रहरी कार्यालयमा कार्यरत छन्।
सुनकोशी गाउँपालिकाको जिरी जाने सडकको उत्तरतर्फ १ किमिदेखि लप्सेखोलासम्म, पश्चिममा १ किमिदेखि २ किमिसम्म, पूर्वमा उक्त स्थानको लप्सेखोलासम्म र दक्षिणतर्फ पितामे टोलसम्मको चार किमिभित्र सिल गरिएको छ।
शिक्षक र प्रहरीले स्थानीय धेरै जनासँग भेटघाट गरेको पाइएकाले कन्ट्याक्ट ट्रेसिङ गरेर रिपोर्ट नआउन्जेलसम्म आजकै मितिबाट दुवै ठाउँमा सिल गरिएको हो। सुनकोशी गाउँपालिका ७ जामुनेका स्थानीयको कन्ट्याक्ट ट्रेसिङ गरी आज स्वाब संकलन गरिएको छ भने जुगल वडा नम्बर ५ को पनि गर्ने तयारी भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
