काठमाडौं– अनुशासन समितिले गरेको कारबाहीप्रति कांग्रेसमा असन्तुष्टि बढ्दै गएको छ। अनुशासन समितिले शनिबार गरेको कारबाहीप्रति नेता डा शेखर कोइराला र डा मिनेन्द्र रिजालले असन्तुष्टि व्यक्त गरेका छन्।
कोइरालाले अनुशासन समितिले आधारहीन र मनगढन्ते तर्क अगाडि सारेर तीन नेतालाई कारबाही गरिएको ट्विटमा उल्लेख गरेका छन्। ‘कांग्रेस पार्टीबाट निष्काशन गरिनु दुर्भाग्य हो। उहाँहरुले पार्टी र लोकतन्त्रका पक्षमा बगाउनु भएको रगत पसिनाको अवमूल्यन गर्ने काम भएको छ,’ नेता कोइराला भन्छन्।
क्रियाशील नेताहरुलाई पार्टीबाट निष्काशन गर्ने कार्यले कार्यकर्तामा गलत सन्देश जाने कोइरालाको तर्क छ। एकातिर अन्य पार्टीबाट आएकालाई प्रवेश गराउने अर्कोतिर आफ्नो सम्पूर्ण जीवन पार्टीमा व्यतीत गरेका वरिष्ठ नेताहरुलाई पार्टीबाट निष्काशन गर्ने कार्य जायज नहुने नेता कोइरालाको तर्क छ।
अर्का नेता डा मिनेन्द्र रिजालले अनुशासन समितिले गरेको कारबाहीप्रति असन्तुष्टि जनाएका छन्। पार्टीले उदार लोकतान्त्रिक चरित्र गुमाउने आशंका बढेको उनले ट्विटमार्फत् जनाएका छन्।
कारबाहीको निर्णयले मन तरंगित र झनै गह्रौं भएको उनले उल्लेख गरेका छन्। बिपीले निर्माण गरेको कांग्रेसले लोकतान्त्रिक चरित्र गुमाउने पो कि भन्ने उनमा आशंका छ। कारबाहीमा परेका व्यक्तिका नाम र सजायले तरंगित भएको उनले उल्लेख गरेका छन्।
कांग्रेस केन्द्रीय अनुशासन समितिले पूर्वमन्त्री गोविन्दराज जोशी, पूर्व राज्यमन्त्री पुष्करनाथ ओझा र डडेल्धुराका कार्यालय सचिव रामबहादुर विष्टलाई अनुशासनको कारबाही गरेको थियो। अनुशासन समितिको शनिबारको बैठकले जोशी र ओझालाई पाँच वर्षका लागि पार्टीबाट निष्काशन गर्ने निर्णय गरेको थियो। विष्टलाई तीन वर्षको लागि पार्टीबाट हटाइएको छ।
गत फागुनको १९ मा कारबाही किन नगर्ने भन्दै स्पष्टिकरणका लागि तीन महिनाको समायवधि दिइएको थियो। तनहुँ–१ मा गत निर्वाचनमा पार्टीको आधिकारिक उम्मेदवार विरुद्ध जोशीले उम्मेदवारी दिएका थिए। वरिष्ठ नेता रामचन्द्र पौडेलको वागी उम्मेदवार जोशी बनेका थिए।
कैलालीका नेता तथा पूर्व राज्यमन्त्री ओझाले पार्टी सभापति शेरबहादुर देउवाकी पत्नी आरजु देउवालाई गत निर्वाचनमा असहयाेग गरेको आरोप थियो।साथै,ओझाले संस्थापन पक्षका विरुद्धमा अभिव्यक्ति दिएको आरोप लगाइएको थियो।
कारबाहीमा परेका त्रयले अनुशासन समितिमा पेश गरेको स्पष्टिकरण चित्तबुझ्दो नभएको जनाएको छ। कारबाहीका लागि अनुशासन समितिलाई प्रमाणका रुपमा अडियो भिडियोलाई आधार बनाइएको समतिले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
