सुर्खेत- नेपाल सरकारले गत चैत ११ गतेदेखि घोषणा गरेको लकडाउन साउन ६ गते राति १२ः०० बजेदेखि खुला गरेपछि नागरिकलाई राहत मिलेको छ। यद्यपि लकडाउनको राहतमा सरकारले निर्देशन दिएका विषयमा गम्भीर नभएर नागरिकको स्वास्थ्यमा आघात पुग्ने पनि त्यत्तिकै खतरा छ।
समाजका सबै ठाउँमा कोरोना संक्रमण नियन्त्रण आउन सकेको छैन तर मुलुकका सबै क्षेत्र खुला भइसकेका छन्। कोरोना संक्रमण भने नियन्त्रणमा आएकै छैन। कर्णाली स्वास्थ्य विज्ञान प्रतिष्ठान जुम्लाले गरेको आरडिटी पिसिआर परीक्षणमा बुधबार कालिकोट रास्कोट नगरपालिकाका ६ र दैलेख अस्पतालमा गरिएको परीक्षणमा दैलेख ठाँटीकाँध गाउँपालिकाका १६ गरी २२ जना कोरोना सङ्क्रमित भेटिए।
बिहीबार पनि दैलेख अस्पतालले गरेको आरटी पिसिआर परीक्षणमा २४ र प्रदेश अस्पताल सुर्खेतमा सुर्खेतका ५ र सल्यानका १ गरी थप ३० जना व्यक्तिमा कोरोना संक्रमण पुष्टि भएको सामाजिक विकास विकास मन्त्रालय स्वास्थ्य सेवा महाशाखाका प्रमुख डा लक्ष्मीनारायण तिवारी मिडिया ब्रिफिङद्वारा जानकारी दिए।
दैलेखमा २४, सुर्खेतमा ५ र सल्यानमा १ थपिसँगै आजसम्म कर्णालीमा संक्रमित हुनेको सङ्ख्या १ हजार ८ सय १३ पुगेको महाशाखा प्रमुख डा तिवारीले बताए। कोरोना संक्रमण पुष्टि भएका ८६ प्रतिशत संक्रमित निको भएर घर फर्के पनि संक्रमण नियन्त्रणमा आउन नसकेको उनको भनाइ छ।
बुधबार दैलेख अस्पतालले सार्वजनिक गरेको आरटी पिसिआर परीक्षणको रिपोर्टअनुसार कोरोना सङ्क्रमण समुदायस्तरसम्म फैलिएको छ। स्वास्थ्य सेवा कार्यालय दैलेखका कोरोना सम्पर्क व्यक्ति थीरप्रसाद रेग्मीले समुदायस्तरमा कोरोना सङ्क्रमण छ वा छैन भनी दैलेख ठाँटीकाँध गाउँपालिकाका ४९ व्यक्तिमा नमूना परीक्षण गरिएकामा १६ व्यक्तिमा कोरोना संक्रमण देखिएको बताए।
उनका अनुसार संक्रमित व्यक्ति उक्त गाउँपालिकाका १ र ६ वडाका थिए। यो अवस्थालाई नियाल्दा उनीहरु कोरोना प्रभावित क्षेत्रबाट नआएर गाउँकै व्यक्ति भएको जनाइएको छ। यसबाट समुदायका अन्य नागरिकमा समेत कोरोना संक्रमणको आशंका बढेको छ।
कर्णाली प्रदेश अस्पताल सुर्खेतका निर्देशक डा डम्बर खड्काले सरकारले लकडाउन खुला गरिसकेकाले अब नागरिक आफैं अनुशासित भएर यो रोगबाट बच्नुपर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1774336446-1774337130.jpeg)
-1764146706.png)
