काठमाडौं-सलहका यसअघि नेपाल प्रवेश गरेका झुण्डहरु तितरबितर भए पनि भारतबाट फेरि अर्काे समूह नेपाल आउन सक्ने देखिएको छ।
प्लान्ट क्वारेन्टाइन तथा विषादी व्यवस्थापन केन्द्रका अनुसार हाल भारतको उत्तर प्रदेशको कानपुर र इटावाको बीचमा पर्ने औरैया आसपासका क्षेत्रमा रहेका २ वटा झुण्डहरु करिब १५० हेक्टर क्षेत्रफलमा फैलिएका छन। यी झुण्डहरु हावाको बहावसँगै पूर्वतर्फ वाराणसी र मुजफ्फरपुर-दरभंगा आसपास क्षेत्र हुँदै धनुषा, महोत्तरी, सर्लाही क्षेत्रबाट नेपालतर्फ समेत प्रवेश गर्न सक्ने प्रक्षेपण केन्द्रले गरेको छ।
पानी परेका बेला तथा रातिको समयमा स्थानान्तरण नगर्ने भए पनि उक्त झुण्डहरु धनुषा, महोत्तरी तथा सर्लाही र आसपासका क्षेत्रमा १ देखि २ दिनभित्र आइपुगिसक्ने देखिएको छ। त्यस्तै सुदूरपश्चिम प्रदेशमा दक्षिण तथा पश्चिमबाट र प्रदेश ५ का दक्षिण-पश्चिमका भूभागबाट २ देखि ३ दिनमा नेपालभित्र प्रवेश गर्न सक्ने सम्भावना रहेकाले निरन्तर निगरानी गरी आवश्यक सावधानी तथा पूर्वतयारी गर्नसमेत केन्द्रले आग्रह गरेको छ।
यसैगरी राजस्थानका विभिन्न स्थानमा ठूलो संख्यामा रहेका झूण्ड पनि दक्षिण-पश्चिमी वायुसँगै नयाँदिल्ली आसपासका क्षेत्र हुँदै उत्तर प्रदेशका मुरादावाद, बरेली तथा शाहजहाँपुरतर्फ अगाडि बढ्न सक्ने पूर्वानुमान छ। हावाको बहाव उत्तर-पश्चिमतर्फ बगिरहँदा सलहका ती झुण्डहरु नेपाल आउनसक्ने केन्द्रले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
