काठमाडाैं- नेपालले नयाँ नक्सा जारी गरेपछि भारतले कूटनीतिक नोट नै पठाएर विरोध गरेको खुलेको छ। भारतले पठाएको सो पत्रका बारेमा परराष्ट्र मन्त्रालयले राष्ट्रियसभाको प्रत्यायोजित व्यवस्थापन तथा सरकारी आश्वासन समितिमा जानकारी पठाएको छ।
बिहीबार बसेको समितिको बैठकमा सभापति रामनारायण बिडारीले नेपालले नयाँ नक्सा जारी गरेपछि भारतले पठाएको कूटनीतिक नोटबारे जानकारी गराएका हुन्। सरकारले भने यो विषयलाई अझै गोप्य राखेको छ।
‘नयाँ नक्सा जारी भएकोमा भारतले विरोध गरेको छ’, बिडारीले भने, ‘हाम्रो दाबीलाई उसले कूटनीतिक नोटमार्फत् अस्वीकार गरेको छ।’ भारतले असार १० गते कूटनीतिक नोट लेखेर विरोध गरेको जानकारी परराष्ट्रले दिएको बिडारीको भनाई छ।
साथै बिडारीले भारतले नेपाली भूमिलाई उसको नक्सामा राखेपछि नेपालको परराष्ट्र मन्त्रालयले भारतसँग वार्ताका लागि तीनपटक चिठी लेखेको तर भारतले प्रतिक्रिया पनि नदिएको पाइएको बताए।
भारतले अघिल्लो वर्ष कार्तिकमा आफ्नो नयाँ राजनीतिक नक्सा जारी गर्दै नेपाली भूभाग पनि आफ्नैतिर समेटेको थियो। नेपालले विरोध जारी नै रहेको बेलामा फेरि गत वैशाखमा उसले नेपाली भूमि हुँदै मानसरोवर जाने सडक उद्घाटन गरेको थियो। प्रतिक्रियामा नेपालले जेठ ७ गते नयाँ नक्सा जारी गरेको थियो। कालापानी, लिपुलेख र लिम्पियाधुरा क्षेत्र समेटेर नेपालले आफ्नो निशान छाप परिवर्तन गर्न संविधान नै संशोधन गरिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
