काठमाडौं- एउटा कन्साइन्मेन्टमा एक किसिमका वस्तु मात्रै राखेर आयात गर्न पाउने आर्थिक ऐनको व्यवस्था कार्यान्वयनका लागि वस्तु वर्गीकरणमा ढिलाइ भएको भन्दै अर्थ मन्त्रालयले उद्योग, वाणिज्य तथा आपूर्ति मन्त्रालयसँग असन्तुष्टि जनाएको छ।
अर्थ मन्त्रालयले वाणिज्यलाई पत्र लेख्दै वस्तु वर्गीकरण नहुँदा आर्थिक ऐनमा उल्लेख भएको विषय कार्यान्वयनमा जटिलता आएको भन्दै असन्तुष्टि जनाएको हो। अर्थ मन्त्रालयको राजस्व व्यवस्थापन महाशाखाले वाणिज्यलाई पत्र पठाएको छ।
सरकारले चालु आर्थिक वर्षको आर्थिक ऐनमा व्यावसायिक प्रयोजनका लागि मालवस्तु पैठारी गर्दा एक पटकमा एउटा कन्साइन्मेन्टबाट तोकेका वस्तु वर्गीकरण भागमा पर्ने उस्तै प्रकृतिका मालवस्तु मात्र पैठारी गर्न पाइने गरी अर्थ मन्त्रालयले तोक्न सक्नेछ उल्लेख गरेको छ। तर यो व्यवस्था कार्यान्वयनका लागि वस्तु वर्गीकरण वाणिज्यले गरिदिनु पर्ने भएकाले आर्थिक ऐन आएको एक वर्ष बितिसक्दा पनि त्यसमा भएका व्यवस्था कार्यान्वयन हुन नसकेको हो।
आर्थिक ऐनको व्यवस्था।
'अहिले एउटा कन्साइन्मेन्टमा जति पनि वस्तु आउने गरेका छन्, भन्सारको दृष्टिमा यस्तो हुनु भनेको उच्च जोखिम रहनु हो,' अर्थ मन्त्रालय स्रोतले भन्यो, 'एउटा कन्साइन्मेन्टमा एक किसिमका वस्तु आयात हुने हो भने जाँचपास सहज हुन्छ भने जोखिम पनि न्यूनीकरण हुन्छ।'
भन्सार विभागले एउटा कन्साइन्मेन्टमा ४५ किसिमका वस्तुसमेत आयात भएको भेटिएको छ। 'कतिपय अवस्थामा खाद्य पदार्थ र रसायनिक पखार्थ एउटै कन्साइन्मेन्टमा भित्रिन्छ, त्यसकारण वर्गीकरण गर्नुपर्ने भएको हो,' अर्थका अधिकारीले भने।
आर्थिक ऐनमा तोकेको भन्दा फरक मालवस्तु पैठारी भएको पाइएमा फरक पाएजति मालवस्तुमा लाग्ने महसुल र सोको शतप्रतिशत जरिवाना गरी जाँचपास गर्न सक्ने व्यवस्था गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
