काठमाडौं–महानगरीय ट्राफिक प्रहरी महाशाखाले काठमाडौं उपत्यकामा लागू गरिएको जोर-बिजोर नियममा थप कडाइ गरेको छ। सरकारले कोरोना भाइरसको जोखिम न्यूनीकरणका लागि जोर-बिजोर प्रणाली लागू गरेको छ।
महाशाखाले जोर–बिजोर प्रणालीको पूर्णपालना गराउन ५६ वटा चेकप्वाईन्टहरू राखेको छ। मंगलबारमात्रै जोर-बिजोर प्रणालीको उल्लंघन गरी सञ्चालन गरेका १६११ वटा दुई पाङ्ग्रे, ४१५ भाडाकार (ट्याक्सी) र ३१९ वटा साना तथा ठूला सवारी गरी जम्मा २३४५ वटा सवारी साधनलाई उपत्यकाका विभिन्न स्थानबाट नियन्त्रणमा लिएको महाशाखाका प्रमुख प्रहरी वरिष्ठ उपरीक्षक भीमप्रसाद ढकालले जानकारी दिए।
उनले मंगलबारै दुई जना सवार २०८३ वटा मोटरसाईकललाई पनि नियन्त्रणमा लिई सम्झाईबुझाई छाडिएको बताए। एसएसपी ढकालले विभिन्न बहानामा सवारी साधन चलाउनेहरुको संख्या बढेको कारण थप चेकजाँच गरी कडाइ गरेको बताए।
सरकारबाट भएका निर्णयहरू पूर्ण रूपमा पालन गर्न, अनिवार्य मास्कको प्रयोग गर्न, भीडभाड नगर्न, अत्यावश्यक सेवा र कामबाहेक सवारी साधन नचलाउन र सर्वसाधारणलाई घरबाट ननिस्कनसमेत महाशाखाले आग्रह गरेको छ।
काठमाडौँ उपत्यकामा जेठ ३० गतेदेखि मंगलबारसम्म जोर बिजोर प्रणाली उल्लंघन गर्ने ४१,५०८ वटा सवारी साधन नियन्त्रणमा लिईसकेको महाशाखाले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
