धनगढी- कैलालीमा प्रधानमन्त्री केपी शर्मा ओलीको समर्थनमा निकालिएको र्यालीमा झडप भएको छ। लम्की बजारमा र्यालीपश्चात आयोजना गरिएको कोणसभामा तत्कालीन नेकपा एमालेका जिल्ला कमिटी सदस्य नरबहादुर खड्काले सम्बोधन गर्ने क्रममा झडप भएको हो।
खड्काले ‘प्रचण्ड’का बारेमा आफूलाई थाहा भएको भनेपछि त्यहाँ रहेका युवाहरू आक्रोशित भएका थिए। भिडमा आएका युवाहरूले ‘कसैको नाम लिएर किन बोलिरहेको छस्’ भन्दै आक्रोशित भएका थिए।
भीडमा दुई पक्षबीच झडप हुने अवस्था आएपछि प्रहरीले साम्य पारेको जनाइएको छ। हस्तक्षेप गरेपछि केहीबेर स्थिति तनावपूर्ण भएको थियो।
केही युवाहरूले भने ओलीले राजीनामा दिनुपर्ने भन्दै ओलीको समर्थनमा उत्रेका युवाहरूमाथि हातपात गरेको जनाइएको छ। सोमबार लम्कीमा केही युवाहरूले प्रधानमन्त्री केपी शर्मा ओलीको समर्थनमा र्यालीसहित नारा लगाएका थिए।
भारतीय विस्तारवाद मुर्दावाद भन्दै युवाहरूले लम्की बजारमा र्याली प्रर्दशन गरेका थिए। आफूहरू प्रधानमन्त्री ओलीको साथमा रहेको भन्दै उनीहरूले प्रधानमन्त्रीलाई पदबाट हटाउने चलखेल भएको भन्दै राष्ट्र निर्माणमा ओलीको साथ अनिवार्य भएको उनीहरूले बताए।
ओली समर्थनमा निस्किएको र्याली कोणसभामा परिणत भएपछि विभिन्न व्यक्तिहरूले ओलीको समर्थनमा आवाज उठाएका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।