बाबियाचौर- म्याग्दीको धौलागिरी गाउँपालिकाको दोस्रो गाउँसभाबाट स्थानीय सरकार सञ्चालनसम्बन्धी विभिन्न ७ वटा विधेयक पारित भएको छ।
गाउँपालिकाका अध्यक्ष थमसरा पुनको अध्यक्षतामा बुधबार सम्मपन्न गाउँसभाबाट सर्वसम्मत रुपमा विधेयक पारित भएको कार्यपालिकाका प्रवक्ता झकबहादुर छन्त्यालले जनाए। शिक्षा, सहकारी, कृषि व्यवसाय प्रवर्धन तथा व्यवस्था, न्यायिक समितिबाट उजुरीको कारबाही र किनारा गर्दा अपनाउनुपर्ने कार्यविधि सम्बन्धमा व्यवस्था गर्न बनेको ऐन, २०७५ पारित भएको हो।
शिक्षा विधेयकमा शिक्षकको दरबन्दीलाई स्थानीयकरण गरी हेरफेर, आन्तरिक सरुवाबढुवा गर्ने उल्लेख छ। यसैगरी कृषि व्यवसाय तथा प्रवर्धन विधेयकले गाउँपालिका क्षेत्रमा सहकारीमार्फत जडीबुटी खेती प्रवर्धन गर्ने व्यवस्था गरिएको छ।
यसैगरी, गाउँपालिकाको प्रशासकीय कार्यविधि, स्थानीय स्वास्थ्य तथा सरसफाइ र आर्थिक कार्यविधि नियमित गर्न बनेको ऐन २०७५ पारित भएको प्रवक्ता छन्त्यालले जानकारी दिए।
संविधानअनुसार स्थानीय तहले विभिन्न २२ वटा कानुन बनाउनुपर्नेछ।
यस्तै, धौलागिरी गाउँपालिकाको न्यायिक समितिले पूर्णता पाएको छ। उपाध्यक्ष रेशम छन्त्यालको संयोजकत्वमा रहेको समितिको सदस्यमा वडा ६ का सदस्य लोकबहादुर पुन र वडा २ का सदस्य सुवादेवी पुर्जा चयन भएका छन्।
गाउँसभाले अवैध यार्सागुम्बा निकासी र पैठारी नियन्त्रणका लागि सघन निगरानी गर्ने र स्थानीय निकासी कर निर्धारण गर्ने निर्णय गरेको छ। गाउँपालिका क्षेत्रबाट यार्सागुम्बा निकासी गर्दा प्रतिकिलो ५ हजार रुपैयाँ राजस्व तिर्नुपर्ने निर्णय भएको छ। वडा १ का वडाध्यक्ष झकबहादुर छन्त्याल र कार्यपालिका सदस्य देउप्रसाद छन्त्यालले यार्सागुम्बाको चोरी पैठारी नियन्त्रणका विषयमा प्रस्ताव राखेका थिए।
गाउँसभाले भैपरी आउने चालू शीर्षकबाट पुँजीगत र चालू खर्च शीर्षकमा बजेट रकमान्तर गरेको छ। सोमबार र मंगलबार मुनास्थित गाउँपालिकाको कार्यालयमा बसेको कार्यपालिका बैठकमा गाउँसभामा प्रस्ताव गरिने विधेयकको कार्यसूचीका विषयमा छलफल भएको थियो।
विधेयक पारित भएपछि गाउँपालिकालाई संविधानले दिएको अधिकार प्रयोग गरेर काम गर्न सहज हुने प्रमुख प्रशासकीय अधिकृत अर्जुन शर्माले बताए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
