काठमाडौं- नेकपा अध्यक्ष पुष्पकमल दाहाल 'प्रचण्ड'ले पार्टीमा देखिएका विभिन्न घटनाक्रमले शुभसंकेत नदेखिएको बताएका छन्। उनले सबै सचेत भई पार्टी एकताको पक्षमा उभिनुपर्ने अवस्था आएको बताए।
बिहीबार राष्ट्रपति विद्यादेवी भण्डारीलाई भेटेर फर्किएपछि स्थायी कमिटी सदस्यलाई प्रचण्डले यस्ताे ब्रिफिङ गरेका हुन्। प्रधानमन्त्री केपी ओलीले चालु संसद आधिवेशन स्थगित गर्ने निर्णय गरेपछि हुन सक्ने पछिल्ला राजनीतिक घटनाक्रमका विषयमा प्रचण्डले विस्तृत रुपमा सुनाएको एक स्थायी कमिटी सदस्यले बताए।
‘संसद अधिवेशन स्थगित गर्ने निर्णय गरेपछि प्रधानमन्त्री ज्यूसँग छलफल गरें। लगत्तै राष्ट्रपति ज्यूलाई गएर भेटे,’ प्रचण्डको भनाई उदृत गर्दै ती स्थायी कमिटी सदस्यले भने, ‘संसद अधिवेशन स्थगित भएका बेला दल फुटाउन सहज हुने अध्यायदेशलगायत अन्य कुनै अध्यादेश प्रमाणित नगर्न अनुरोध गरेको छु। राष्ट्रपति र प्रधानमन्त्री दुवैले कुनै अध्यादेश नल्याउने भन्नु भएको छ।’
पार्टीभित्रको घटनाक्रम सकारात्मक रुपमा अघि नबढेको बताउँदै प्रचण्डले सबैले सकारात्मक भूमिका खेल्नु पर्ने बताए। नेकपा स्थायी कमिटी बैठकमा सहभागी हुन बालुवाटार पुगेका उनी त्यतैबाट राष्ट्रपतिलाई भेट्न शीतलनिवास पुगेका हुन्।
दिउँसो २ बजेर ३७ मिनेटमा बालुवाटारबाट निस्किएका प्रचण्ड राष्ट्रपतिसँग छलफलगरी ३ बजेर ३४ मिनेटमा मात्रै फर्किएका थिए।
राष्ट्रपित भेट्न जानुअघि अध्यक्ष प्रचण्डसहित झलनाथ खनाल, माधव नेपाल, वामदेव गौतम महासचिव विष्णु पौडेललगायत नेता प्रधानमन्त्री ओलीबीच छलफल भएकाे थियाे। प्रधानमन्त्रीसँग लामो छलफल चलेपछि राष्ट्रपतिलाई भेट्न प्रचण्ड शीतलनिवास पुगेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
