भीमदत्तनगर- सुदूरपश्चिम प्रदेश सरकारले हालसम्म कोरोना परीक्षणका लागि पिसिआर र आरडिटी ‘कीट’ खरिदका लागि १ करोड ३४ लाख ८ हजार रूपैयाँ खर्च गरेको छ।
केही दिनअघि प्रदेश सरकारले कोरोना रोकथाम, उपचार र व्यवस्थापनमा ५८ करोड ४८ लाख रकम खर्च गरेको विवरण सार्वजनिक गरेको थियो। प्रदेश सरकारले कोरोनाको परीक्षण दायरा बढाउनका लागि आवश्यक मेसिन तथा परीक्षण कीट खरिदमा भने ठोस पहल र खर्च गरेको देखिँदैन।
प्रदेश स्वास्थ्य आपूर्ति व्यवस्थापन केन्द्रले दिएको जानकारीअनुसार पिसिआर विधिबाट परीक्षणका लागि प्रदेश सरकारले २ हजार ४ सय थान कीट खरिद गरेको छ। टेण्डर प्रक्रिया मार्फत पिसिआरका लागि प्रतिकिट ४ हजार ५ सयका दरले खरिद गरिएको हो।
‘२ हजार ४ सय किटमा १ करोड ८ लाख रकम खर्च भएको देखिन्छ।’ केन्द्रका जनस्वास्थ्य निरीक्षक लक्ष्मीकुमार श्रेष्ठ भने‚ ‘केन्द्रका स्वास्थ्य तथा जनसंख्या मन्त्रालय र नेपाली सेनाबाट प्राप्त कीट प्रदेश जनस्वास्थ्य प्रयोगशाला र सोझै यहाँ सञ्चालनमा रहेको प्रयोगशालामा उपलब्ध भएको हो।’
‘आरडिटी कीट खरिदमा अहिलेसम्म २६ लाख ३८ हजार रकम खर्च भएको देखिन्छ।’ उनले भने‚ ‘आरडिटी टेस्ट कीट प्रतिथान ९ सय ५० रूपैयाँ परेको छ।’
त्यसैगरी यहाँका स्थानीय तहरुले पनि आरडिटी परीक्षणका लागि कीट खरिद गरेर परीक्षण गरिरहेका छन्। ‘पालिकाहरूको तथ्यांक यहाँ आइपुगेको छैन।’ उनले भने‚ ‘पालिकाहरुले पनि स्वास्थ्यकर्मी खटाएर आरडिटी परीक्षण दायरा बढाएका छन्।’ यहाँको प्रदेश सरकारले डोटी र बैतडीमा समेत पिसिआर मेसिन जडान गरेर परीक्षणको दायरा बढाउने भनेपनि जडानको गति भने सुस्त छ। तीन स्थानका लागि प्रयोगशालाको सामान धनगढी आउने क्रम जारी रहेको निर्देशनालयको भनाइ छ।
हाल धनगढीको पशुपन्छी अन्वेषण केन्द्रमा सञ्चालनमा रहेको पिसिआर प्रयोगशालामा दैनिक बढीमा २ सय ५० जनाको मात्रै परीक्षण हुने गरेको प्रयोगशालाका प्रमुख रमेश शाहीले बताए। उनले प्रयोगशालामा हाल ५ हजार थान परीक्षणका लागि कीट मौज्दात रहेको जानकारी दिए।
प्रदेशमा सञ्चालनमा रहेको एकमात्रै प्रयोगशालाले हालसम्म १० हजार बढीको कोरोना परीक्षण गरेको छ। यहाँ परीक्षणको चाप बढेपछि केन्द्रीय जनस्वास्थ्य प्रयोगशाला टेकू स्वाब परीक्षणका लागि पठाउने गरिएको छ। बुधबार साझँसम्म सुदूरपश्चिममा २ हजार ६ सय ११ जनामा कोरोनाको सङक्रमण देखिएको छ।
यहाँ हालसम्म पिसिआर विधिबाट १८ हजार ८ सय ७५ जनाको कोरोना परीक्षण गरिएको छ भने आरडिटी विधिबाट हालसम्म १ लाख १३ हजार १ सय ८४ जनाको परीक्षण गरिएको प्रदेश स्वास्थ्य निर्देशनालयले जनाएको छ। सुदूरपश्चिममा हालसम्म ४ सय ९५ जना कोरोना संक्रमणबाट निको भएर घर फर्किसकेका छन्। त्यसैगरी यहाँ पिसिआर विधिबाट परीक्षणका लागि लिइएको ५ हजार ९६ जनाको रिपोर्ट आउन बाँकी रहेको छ।
त्यसैगरी हालसम्मको कोरोना परीक्षणमा २० देखि २९ वर्षीया युवामा सबैभन्दा बढी संक्रमण देखिएको निर्देशनालयको तथ्याङ्कमा उल्लेख छ। सो उमेर समूहमा १ हजार १ सय ७० जनामा कोरोना सङ्क्रमण पुष्टि भएको छ।
सुदूरपश्चिममा स्थानीय सङक्रमण नफैलिएको दाबी गरिएपनि कोरोना सङक्रमण पुष्टि भएकाहरुलाई पनि होम क्वारेन्टाइनमा राख्न सङ्क्रमण फैलिने चिन्ता सर्वत्र छ। त्यसैगरी नागरिकस्तरबाट चन्दा संकलन गरी डडेल्धुरा अस्पतालमा स्थापना गरिएको पिसिआर मेसिनबाट कोरोना परीक्षणको अन्तिम तयारी भइरहेको छ।
प्रदेशमा कोरोना भाइरसको रोकथाम उपचार र व्यवस्थापनका लागि खडा गरिएको कोषबाट ४२ करोड ४८ लाख रकम र प्रदेश सरकारको थप १५ करोड रकम कोभिड–१९ को उपचार रोकथाम र व्यवस्थापनका लागि खर्च भएको छ।
कोभिड–१९ को सुरुको चरणमा प्रदेशका स्थानीय तह धनगढी उपमहानगरपालिकालाई ५ लाख, ३३ नगरपालिकालाई ४ लाख र ५४ गाउँपालिकालाई ३ लाख रकमका दरले रकम उपलब्ध गराइएकामा दोस्रो चरणमा राहत वितरण गर्न १५ करोड २६ लाख र तेस्रो चरणमा केही दिनअघि मात्र क्वारेन्टाइन र आइसोलेसनको व्यवस्थापन गर्नका लागि ६ करोड बजेट उपलब्ध गराइएको प्रदेश सरकारको भनाइ छ।
यस्तै कोरोना भाइरस रोकथाम र व्यवस्थापनकै लागि प्रदेशको नेपाल प्रहरी, सशस्त्र प्रहरी बल, नेपाली सेना, जिल्ला प्रशासन र राष्ट्रिय अनुसन्धानलाई समेत गरी १ करोड ५० लाख रकम उपलब्ध गराइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
