म्यानमारबाट फर्किएका नपाली त्रिभुवन अन्तर्राष्ट्रिय विमानस्थलमा।
काठमाडौं– भारतबाहेक तेस्रो मुलुकमा समस्यामा परेका झण्डै ५ हजार नेपालीलाई स्वदेश फर्काइएको छ। आइतबार साँझ ५ बजेसम्म विभिन्न १६ वटा मुलुकबाट ४ हजार ९ सय ३९ नेपाली स्वदेश फर्काइएको हो।
सेनाका अनुसार सबैभन्दा पहिला जेठ २२ मलेसियामा समस्यामा परेका १ जना नेपालीलाई उद्धार गरिएको थियो। त्यसयता आइतबार साँझ ५ बजेसम्म मलेसियाबाट ३६१, म्यानमार २६, युएईबाट ६३७, जापान २४८, बंगलादेश ५७०, कतारबाट १९२, अस्ट्रेलियाबाट ११, कुवेतबाट १,२१४, अफगानिस्तान १८, हङकङ ७, कोरिया २२८, माल्दिभ्स ३१०, ओमान ३१३, साउदी ४१०, सिंगापुर १४६, थाइल्याण्ड २४८ नेपाली स्वदेश फर्काइएका हुन्।
३२ जना अस्पताल भर्ना
विदेशबाट फर्काइएकामध्ये ३२ जना अस्पतालमा भर्ना भएका छन्। अस्पतालमाा भर्ना भएकामध्ये कतिपयमा कोरोनाको आशंका गरिएको छ। कतिपयमा कोरोना पुष्टि भइसकेको छ भने कोरोना बाहेक विभिन्न जटिल अवस्थाका बिरामी समेत स्वदेश फर्किएर अस्पतालमा भर्ना भएका छन्।
अस्पताल भर्ना हुनेहरुमा कुवेतबाट फर्किएका २४ जना, जापानबाट फर्किएका २ जना र युएईबाट फर्किएका ६ जना छन्।
होम क्वारेन्टाइनमा ४९७
शनिबारसम्म स्वदेश फर्काइएका ४ हजार २ सय १७ जनामा ४ सय ९७ जनालाई होम क्वारेन्टाइनमा राखिएको छ। ३ सय ३६ जनालाई विभिन्न स्थानीय क्वारेन्टाइनमा राखिएको छ। होटल क्वारेन्टाइनमा ३ सय १३ जना राखिएको छ भने प्रदेशमा २ हजार ७ सय ४२ पठाइएको कोरोना संकट व्यवस्थापन केन्द्र (सिसिएमसी) ले जनाएको छ।
पिसिआर परीक्षणको नेगेटिभ रिपोर्ट भएकालाई सिधै होम क्वारेन्टाइनमा राखिएको र आरडिटी रिपोर्ट नेगेटिभ भएका तथा रिपोर्ट नभएकाहरुलाई अन्य विभिन्न क्वारेन्टाइनमा राखिएको सिसिएमसीका सचिव महेन्द्र गुरागाइँले बताए।
सरकारले कोरोनाका कारण समस्यामा परेका विभिन्न ३० वटा मुलुकबाट तत्काल २४ हजार नेपाली स्वदेश फर्काउन सूची तयार पारेको छ। सो सूचीमा रोजगारी गुमाएका, खान बस्न समस्या परेका, बिरामी, गर्भवती, भिजिट भिसामा गएर अलपत्र परेका, जेष्ठ नागरिक, बालबालिका, आफन्तको मृत्यू भई काजकिरियाका लागि स्वदेश फर्कनुपर्ने अवस्थाका व्यक्तिहरुलाई प्राथमिकताका आधारमा स्वदेश फर्काउन थालिएको हो।
सर्वोच्च अदालतले श्रम स्वीकृति लिएर विदेश गएका श्रमिकहरु समस्यामा परी आफ्नै खर्चमा स्वदेश फर्कन नसक्ने अवस्था सिर्जना भएमा त्यस्ता व्यक्तिहरुलाई वैदेशिक रोजगार कल्याणकारी कोषको रकम प्रयोग गरी स्वदेश फर्काउन आदेश दिएको छ। सो आदेशको कार्यान्वयनका लागि श्रम मन्त्रलयले कार्यविधि तयार गर्न थालेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
