फिचर

जब बालुवाटारले धान्न सकेन शान्तिपूर्ण आन्दोलन [फोटो फिचर]

ऋग्वेद शर्मा बिहीबार, जेठ २९, २०७७ १३:१५

काठमाडौं- बिहीबार बिहान बालुवाटारमा सरकारको काम गराइप्रति विरोध प्रदर्शन भयो। साढे १० बजेदेखि जम्मा हुन थालेका प्रदर्शनकारी ११ बज्दासम्म हजारौँको संख्यामा पुगिसकेका थिए। कोरोना महामारीविरुद्ध सरकारको काम गराइ र भ्रष्टाचारका विषयमा उनीहरुले विरोध गरिरहेका थिए।

अब त अत्ति भयो, खर्च होइन उपलब्धी देखाउ, न पारदर्शिता न दुरदर्शिता सधैँ कस्तो लाचारिता?, लाज लाग्दैन हिसाब खै, क्वारेन्टिन कि कालघर? जस्ता नारा लेखिएका प्ले कार्ड प्रदर्शनकारीले बोकिरहेका थिए।

निश्चित दुरीमा सुरु भएको प्रदर्शनमा प्रदर्शनकारीको संख्या बढेसँगै दुरी बनाउन मुस्किल देखियो। शान्तिपूर्ण रुपमा बसिरहेका प्रदर्शनकारीलाई प्रहरीले माइकिङमार्फत फर्कन निर्देशन दिइरहेको थियो। प्रदर्शनकारीहरु पनि शनिबार माइतीघरमा बेला हुने भन्दै तितरबितर हुन थालिसकेका थिए। तर सडकको बढ्दो भिड प्रहरीले सम्हाल्न सकेन।

बालुवाटारतर्फबाट प्रदर्शनकारीलाई भाटभटेनीतिर प्रहरीले पेल्दै लगेपछि भिड एकै ठाउँमा थामिनसक्नु भयो। प्रहरी बालुवाटार र भाटभटेनीमा रहेका प्रदर्शनकारी टंगालसम्म पुगे। त्यहाँ चौबाटोतिर प्रदर्शनकारीहरु छरिए। प्रहरीले पानीको फोहोरा प्रयोग गर्‍यो। लाठी चार्ज सुरु भयो। दर्जनौँ अश्रुग्यास प्रहार भए। थामिन मुस्किल हुने गरी प्रदर्शन भड्कियो। केही प्रदर्शनकारी घाइते भए।

गएको मंगलबार पनि पिसिआर टेस्ट बढाउनुपर्ने लगायतका माग राखेर बालुवाटारमा प्रदर्शन भएको थियो। त्यसबेला पानीको फोहरा र केही लाठी चार्जपछि प्रदर्शन नियन्त्रणमा आएको भए पनि बिहीबार अवस्था फरक रह्यो। आन्दोलन त्यस्तो समयमा भड्कियो जतिबेला प्रदर्शन सकिएको थियो।

तस्बिरमा हेर्नुहोस्