जब कोरोना भाइरस महामारी र त्यससँगै सुरु भएको लकडाउनले स्पेनमा नराम्रोसँग प्रभाव पारिरहेको थियो, तब असाध्यै चिन्ता लागिरहेको थियो। केही सयमसम्म त धेरैको अनुमान थियो कि ला लिगा अब यत्तिकै सकिन्छ।
हामी त्यो समय निकै निराशावादी भइरहेका थियौँ। तर विस्तारै विस्तारै मानिसहरु ठीक हुँदै गए। कोरोनाको जोखिम पनि विस्तारै कम हुँदै गयो। र फुटबललाई लिएर पनि निर्णय भयो अब ला लिगा हुन्छ।
सुरु सुरुमा सानो समूहमा फुटबल अभ्यास गर्दा अनौठो भइरहेको थियो। विस्तारै त्यसमा पनि सुधार हुँदै गयो। गएको हप्तादेखि त हामी सामूहिक रुपमा नै अभ्यासमा सामेल भइरहेका छौँ। अब सबै कुरा नियन्त्रणमा छ जस्तो नै लाग्छ।
हामी असाध्यै नाजुक गतिमा शून्यबाट सयसम्म गयौँ। अब हिँड्दै गर्दा हामी अगाडिका लागि पनि नयाँ बाटो बनाउँदै छौँ।
हामी अहिले राति अबेर पनि खेलाडीहरुसँग कुराकानी गरिरहेका हुन्छौँ। जे जस्तो अवस्था आइरहेको छ त्यो सबैलाई विचार गरेर क्लबका अध्यक्षसँग कसरी अगाडि बढ्ने भन्नेबारे कुराकानी हुन्छ। जस्तो कि, मड्रिडमा हामी बस्ने भनिएको होटल अभ्यास सुरु हुने बेलामा पनि पुनः सञ्चालनमा आइसकेको थिएन। तत्कालै होटल सञ्चालन गरिहाल्ने जस्तो कुनै योजना पनि थिएन। हामी आफै मात्रै पनि कुनै होटलमा बस्न सक्ने स्थिति थिएन। किनभने होटलमा बसेर मात्र पनि भएन, उचित खानपानको व्यवस्था गर्न सक्नुपर्छ। प्रत्येक खेलअघि कस्तो खानेकुरा खाने पनि तालिकाअनुसार काम गर्नुपर्छ।
समाधान गर्नुपर्ने त्यस्ता विषयहरु निकै भए, जुन महत्वपूर्ण देखिँदैनन् तर तीनको महत्व ठूलो परिरहेको हुन्छ।
हामीसँग समय निकै कम छ, जसले गर्दा तनाव बढी भइरहेको छ। खेलमा कहिले फर्कने होला भनेर उत्सुक त सुरुदेखि नै थियौँ। सुरुमा अहिले भइरहेको फरक परस्थितिमा सबै कुरा अचम्म लाग्न सक्छ। किनभने दर्शकबिनाको रंगशाला त केही हराइरहेको जस्तो नै हुनेछ। हामीहरुको खेल हाम्रा समर्थकको समर्थनमा टिकेको हुन्छ। र खेलमो आइरहेको अवस्थाको परिवर्तन र निरन्तरता पनि दर्शकको समर्थनमा निर्भर रहेको हुन्छ।
हामी अहिले खेलाडीहरुको निकै नजिक रहेर काम गरिरहेका छौँ र उनीहरुको समस्या बुझेर साथ दिइरहेका छौँ। जो परिवारको साथमा छन् उनीहरुलाई याद गर्नु नपरे पनि एक्लै रहेका धेरै खेलाडीहरुलाई निकै साथ दिनुपर्ने अवस्था अहिले आइरहेको छ। त्यसैले हामीले धेरै चासो दिइरहेका छौँ।
जस्तो कि जनवरीमा मात्र स्टोकबाट गेटाफे आएका खेलाडी पिटर इटोबोको परिवार संकटको समयमा नाइजेरिया नै फर्किए। यहाँ एक्लै रहेका पिटरलाई हाम्रो साथको खाँचो निकै रह्यो। त्यसैले हामीले उनीसँग नियमित कुराकानी गरिरहेका थियौँ।
असाध्यै एक्लो र दुःखी महसुस गरिरहेको उनले हामीलाई बताएका थिए। किनभने उनी एक्लै थिए र स्पेनिसमा राम्ररी कुराकानी गर्नसक्ने पनि भइसकेका थिएनन्। उनको अवस्थाले मलाई पनि असाध्यै नराम्रो महसुस भयो। किनभने लकडाउन सुरु हुनुभन्दा अघि उनले मलाई नाइजेरिया जान अनुमति पनि मागेका थिए। तर मैले उनलाई अनुमति दिइनँ।
किनभने क्लबको नीति नै त्यस्तै थियो। क्लबले कसैलाई पनि घर फर्कने अनुमति नदिनु जो जहाँ छन् त्यही बस्न भन्नु भनेको थियो। हुन पनि रोकिएको लिग कहिले सुरु हुन्छ भन्ने यकिन नहुँदा खेलाडी पठाउन सम्भव पनि थिएन। हामीले कोरोना भाइरसले अवस्था यस्तो खराब हुनेछ भनेर सुरुमा त सोच्दै सोचेनौँ।
लकडाउनको समयमा बेलाबखत हामीले खेलाडीहरुसँग भिडियोमार्फत कुराकानी पनि गरेका थियौँ। त्यसमा फुटबलकै कुरा गर्ने अवस्था त निकै कम रह्यो। मलाई थाहा छ मैले सधैँ राम्रो ढंगले बुझाउन सकिन पनि होला। तर एक प्रशिक्षकमा रुपमा मात्रै होइन क्लबमा सिनियर भएका हिसाबले पनि मैले खेलाडीदेखि प्रशिक्षण टिमका अरु सदस्यलाई पनि मनोबल गिराउन हुन्न भनेर हौसला दिइरहनु पर्छ। किनभने हामीले सकेसम्म राम्रो मनस्थिति बनाएर फेरि मैदानमा फर्कन त छँदैछ।
लकडाउनको समयमा खेलाडीहरु अनेक उपाय अपनाएर फिट राखिराख्न हामीले निकै प्रयत्न गरिरह्यौँ। घर बसेर गर्न मिल्ने विभिन्न कामहरु दिइरहेका हुन्थ्यौँ। जसको घरमा नै जिम या अरु वर्कआउट गर्न समस्या थियो उनीहरुलाई हामीले केही सामानहरु पनि दियौँ। जसको उनीहरुले राम्रो प्रयोग गरे। खेलाडीहरुले व्यायाम गरिरहेको भिडियो र उनीहरुको तौलको मापन हामीलाई नियमित रुपमा पठाइरहेका हुन्थे। केही खेलाडीहरुलाई पनि आफ्नो तौलमा नियन्त्रण बनाइराख्न समस्या पनि परेको थियो।
हामी जब अभ्यासको सुरुवाती चरणमा फर्किएका थियौँ तब फुटबलसँग नै अभ्यास निकै कम थिए। शारीरिक अभ्यासमा धेरै ध्यान दिइएको थियो। हाम्रो विशेष चासो शारीरिक रुपमा फिट रहने हिसाबका व्यायामहरु थिए। केही अभ्यासका विषयहरु नमिल्दा केही खेलाडीमा चोटको समस्या पनि देखियो। हामीले खेलाडीहरुको अवस्था बुझेर प्रशिक्षण गर्नका लागि नियमित स्वास्थ्य जाँच र अभ्यासका दौरान थकानको अवस्था पनि विचार गर्नुपर्ने हुन्छ।
लामो समय खेलबाट बाहिर रहेका खेलाडीहरुमा एक्कासी अभ्यास बढाउँदा चोटको समस्या बढ्न सक्ने भएकाले हामीले कतिपय योजनामा रहेका अभ्यासहरु पनि फेर्दै लग्यौँ। किनभने गरिरहेका कामहरुमा केही परिवर्तन गर्नुपर्छ भन्ने देखिएको थियो। त्यसपछि हामीले बल ‘टच–पास–सुट’ मा ध्यान दिएर अभ्यासलाई अगाडि बढायौँ।
खेलाडीहरुमा अभ्यास सकाउँदाको थकान पहिलेको भन्दा निकै ज्यादा भइरहेको छ। यस्तोमा हामीले अभ्यासपछिको ‘आइस थेरापी’ मा हरेक खेलाडीलाई व्यक्तिगत रुपमा विचार गरिरहेका छौँ। किनभने तापक्रम वृद्धि पनि हरेक दिन भइरहेको छ। हामीले खेल खेल्ने बेलामा पनि ३० डिग्रिको तापक्रममा खेल्नुपर्ने छ। जुन र जुलाईमा त अझ त्यो तापक्रम अझ बढ्नेछ।
हिजोआज अभ्यास सकाउँदा मैले पनि ज्यादै बढी थकानको महसुस गरिरहेको छु। अहिलेको समय अलि तनावयुक्त नै छ। सबै तयारी पूरा गर्नका लागि समय पर्याप्त छैन। त्यो तनावपूर्ण अवधि अझ आउनेवाला नै छ। सबैभन्दा राम्रो अवस्थामा फर्किएर मैदानमा जानुपर्छ भन्ने थाहा हुँदाहुँदै पनि सबै अवस्था मिलिरहेको छैन।
फिफाले अहिलेको परिस्थितिलाई विचार गरेर बनाएको एकै खेलमा पाँच खेलाडी परिवर्तन गर्न पाउने नियमले केही सजिलो हुनेछ। त्यो नियमलाई हामी कसरी उपयोग गर्नेछौँ भन्ने बारे हामीले स्पष्ट योजना बनाएर अगाडि बढिरहेका छौँ। यो नियमको अवस्था पनि हामी जस्तो सानो क्लबहरुका लागि ठूला क्लबमा भन्दा भिन्न हुन्छ नै। सुरुवातदेखि खेल्ने र परिवर्तन गरिने खेलाडीमा भिन्नता निकै रहन्छ। तर खेल कसरी अगाडि बढ्छ र थकानको अवस्था कस्तो रहन्छ भन्नेमा परिवर्तन कसरी गर्ने भन्ने निर्भर रहन्छ।
मैले पहिलेदेखि भनिरहेको र अहिले पुगेको राम्रो कुरा के भने हामीसँग २३ खेलाडी उपलब्ध छन्। जसको मतलब कुनै पनि खेलाडी पछाडि पर्ने छैनन्। तर मैले अहिलेसम्म बुझिरहेको छैन किन को को खेलाडी खेल्दै छन् भन्ने विषय एक दिन अघि नै वा कहिले काहिँ त दुई दिन अघि नै सार्वजनिक गर्नुपर्छ?
हामीले बुन्डेस लिगाका खेलहरु हेर्दा के देखिरहेका छौँ भने घरेलु मैदानमा समर्थक बिना खेल्दा फाइदा अवे टिमलाई भइरहेको छ। त्यही कुरा विचार गरेर केही टिमहरुले आफ्नो शैलीहरु पनि अवश्य परिवर्तन गर्नेछन्। रेलिगेसनमा संघर्ष गरिरहेका टिमहरुलाई पनि यो नयाँ अवस्था माथि उक्लने मौका हुनसक्छ। विश्वास छ, खेल हुने समयमा अहिले अनुमान गरिएका भन्दा अझ आश्चर्यजनक विषयहरु देखिनेछन्।
(स्पेनिस क्लब गेटाफेका प्रशिक्षक जस बोर्दालासले अहिलेको समयमा फुटबलमा फर्कन कस्तो अवस्था भइरहेको छ भन्नेबारे बिबिसी स्पोर्टमा गरेको कुराकानी यहाँ नेपालीमा अनुवाद गरिएको हो। ५६ वर्षका बोर्दालास गेटाफेमा चौथो वर्ष प्रशिक्षण गरिरहेका छन्। उनको क्लब अहिले ला लिगामा पाँचौँ स्थानमा छ। शुक्रबार राति ११ः१५ मा गेटाफे र ग्रानडाबीच खेल हुँदैछ।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
