काठमाडौं- लकडाउनको मोडालिटी परिवर्तनबारे सरकारले अझसम्म आधिकारिक रूपमा कुनै निर्णय लिन सकेको छैन। मोडालिटी परिवर्तन गर्ने गरी मन्त्रिपरिषद्लाई सिफारिस गर्न बसेको कोरोना भाइरस रोग रोकथाम तथा नियन्त्रण उच्चस्तरीय समिति बैठकले यसबारे कुनै पनि निर्णय गर्न नसकेको हो।
आइतबार राती साढे ११ बजेसम्म चलेको बैठकमा लकडाउनको स्वरुप परिवर्तनबारे छलफल भएको तर छलफलको क्रम नसकिएको प्रधानमन्त्री कार्यालयका सचिव नारायणप्रसाद बिडारीले जानकारी दिए।
प्रधानमन्त्री केपी शर्मा ओलीसमेत सहभागी बैठकले लकडाउनको स्वरुप परिवर्तनबारे ठोस निष्कर्ष निकाल्ने अपेक्षा गरिएको थियो। तर बैठकमा कुनै निर्णय हुन नसकेपछि पुनः बैठक बसेर छलफल गर्ने भन्दै बैठक टुंग्याइएको सचिव बिडारीले सञ्चारकर्मीहरूलाई जानकारी दिए।
समितिमा विभिन्न क्षेत्रबाट सुझाव र निर्देशनहरू प्राप्त भएको तर छलफल जारी नै रहेको समितिका सदस्यसचिवसमेत रहेका सचिव बिडारीको भनाइ छ। बैठक अनिर्णित बनेसँगै लकडाउनको स्वरुप परिवर्तन हुनेबारे अन्यौल कायमै हुन पुगेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
