काठमाडौं- सशस्त्र प्रहरी बलले अवैध १५ लाख रुपैयाँ बरामद गरेको छ। बारास्थित सशस्त्र प्रहरी बल नेपाल न. १२ गण अन्तर्गको बोर्डर आउट पोस्ट (बिओपी) गोलागञ्जबाट खटिएका टोलीले उक्त रकम बरामद गरेको सशस्त्रका एसपी दिगविजय सुवेदीले जानकारी दिए।
सीमा नाकामा हुने अवैध चोरी निकासी नियन्त्रण गर्ने क्रममा शनिबार बिहान ४ बजे उक्त रकम बरामद गरिएको हो। बारा सिम्रौनगढ नगरपालिका अमरपुर नाकाको नहरचोकको बाटो हुँदै एक जना व्यक्तिले अन्दाजी ३३ हजार बराबरको रेडिमेड फेन्सी कपडा र नगद १५ लाख रुपैयाँ लिएर नेपाल आउँदै गर्दा उक्त रकम बरामद भएको हो।
बिओपी गोलागञ्जबाट सशस्त्र प्रहरी निरीक्षक कबिर मल्लको कमाण्डमा खटिगएको टोलीलाई देख्नासाथ सामान र नगद पैसा सोही स्थानमा छाडी ती व्यक्ति भारततर्फ भागेका थिए।
विशेष सुराकीको आधारमा सशस्त्र प्रहरीको टोलीलाई त्यस इलाकातर्फ गस्ती गर्न पठाएको र सामान सहित रकम फेला पार्न सफल भएको सशस्त्र प्रहरी बल न १२ गणका गणपति सशस्त्र प्रहरी उपरीक्षक दिगविजय सुबेदीले बताए।
यसअघि पनि सशस्त्र प्रहरीले सिमरौनगढ इलाकाबाट एक लाख नक्कली नेपाली रुपैयाँ र सिमरा जितपुर इलाकाबाट १२ लाख स्रोत नखुलेको नेपाली रुपैयाँसहित भारतीय नागरिकलाई नियन्त्रणमा लिएको थियो।
तीन दिनअघि मात्रै बारा जिल्लाकै बिश्राममपुर गाउँपालिका क्षेत्रबाट ठूलो परिमाणमा लागु औषधसहित केही मानिस पक्राउ परेका थिए।
सशस्त्र प्रहरी बल नेपाल न. १२ गण बाराले कोभिड १९ नियन्त्रणको लागि बारा जिल्लामा सात वटा बिओपी बाट १७ फरवार्ड पोस्ट निर्माण गरी कार्य गर्दै आएको छ। लक डाउन कार्यन्वयनको क्रममा बारा जिल्लामा सशस्त्र प्रहरी बलको परिचालन मजबुत तथा सिमानाकामा भएको कडाइको कारण तस्करहरु धमाधम पक्राउ पर्न थालेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
