सुर्खेत- कर्णाली प्रदेश सरकारले यहाँका कोरोना भाइरसबाट सङ्क्रमित व्यक्तिलाई तीन तहमा व्यवस्थापन गर्ने निर्णय गरेको छ। मुख्यमन्त्री महेन्द्रबहादुर शाहीको अध्यक्षतामा आइतबार बसेको कर्णाली प्रदेश विपद् व्यवस्थापन केन्द्रको बैठकले क्वारेन्टाइनमा १४ दिन राखेर आवश्यक परीक्षणपश्चात् सङ्क्रमित देखिएका व्यक्तिलाई तीन तहमा व्यवस्थापन गर्ने निर्णय गरेको हो।
बैठकले सङ्क्रमित तर कुनै लक्षण नदेखिएका बिरामीलाई जिल्लाका तहमा तोकिएको आइसोलेसनमा, लक्षण देखिनुका साथै सम्भावित जोखिम भएका बिरामीलाई जिल्ला अस्पताल र जटिल अवस्थाका सङ्क्रमित व्यक्तिलाई तोकिएको विशिष्टीकृत अस्पतालमा व्यवस्थापन गर्ने निर्णय भएको सामाजिक विकासमन्त्री दल रावलले जानकारी दिए।
सङ्क्रमण नदेखिएका बिरामीलाई थप २१ दिन सेल्फ क्वारेन्टाइनमा रहने सर्तमा घर पठाउने निर्णय भएको मन्त्री रावले बताए। उनका अनुसार बैठकमा सङ्क्रमित बिरामीलाई आइसोलेसन र थप उपचारका लागि अस्पतालमा पुर्याउन एम्बुलेन्स र मृतक सङ्क्रमितका शव व्यवस्थापन गर्न शव वाहनको व्यवस्थापनका लागि जिल्ला विपद् व्यवस्थापन समितिलाई लेखी पठाउने निर्णय भएको छ।
त्यस्तै, भारतबाट आउने हुम्ला, मुगु र डोल्पाका नागरिकहरूलाई सुर्खेत क्वारेन्टाइनमा व्यवस्था गरिनेछ। उनीहरूलाई डोल्पा प्रवेश गर्न नदिने गरी यार्सागुम्बा (जीवनबुटी) सङ्कलन कार्य जेठ २५ गतेदेखि खुला गर्ने र पुल टेस्टबाट सङ्क्रमण नदेखिएका सुरक्षित हुम्ला, मुगु र डोल्पामा आवश्यक सुरक्षा सावधानीसहित विद्यालय सञ्चालन गर्ने व्यवस्था/निर्णय गर्न कोभिड–१९ विपद् व्यवस्थापन कार्य सञ्चालन केन्द्र र नेपाल सरकारसमक्ष लेखी पठाउने निर्णय भएको मन्त्री रावलको भनाइ छ।
त्यसैगरी, भारतलगायत विदेशबाट प्रदेशमा प्रवेश गर्ने नागरिकलाई प्रदेशको प्रवेश नाकामा होल्डिङ एरिया व्यवस्थापन गरी आवश्यक अभिलेख व्यवस्था गर्ने, तोकिएको जिल्ला वा स्थानीय तहका क्वारेन्टाइनमा पुर्याउने व्यवस्था सुरक्षा निकायसँगको समन्वयमा आन्तरिक मामिला तथा कानून मन्त्रालयले गर्ने निर्णय बैठकले गरेको जनाइएको छ।
केन्द्रको बैठकले सम्भावित खाद्य सङ्कटलाई दृष्टिगत गरी आवश्यक खाद्य व्यवस्थापनको योजनासहित उद्योग, पर्यटन, वन तथा वातावरण मन्त्रालयले मन्त्रिपरिषद्मा प्रस्ताव पेश गर्ने, हुम्ला र डोल्पाको माथिल्लो भेगमा खाद्य व्यवस्था तथा व्यापार कम्पनीबाट तिब्बततर्फबाट हुने ढुवानीमा समस्या उत्पन्न हुने भएकाले वैकल्पिक व्यवस्थाका लागि नेपाल सरकारलाई लेखी पठाउनेलगायतका निर्णय गरेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।