काठमाडौं- त्रिभुवन विश्वविद्यालयका आंशिक प्राध्यापकहरूले पारिश्रामिक नदिएको भन्दै आजैबाट नपढाउने निर्णय गरेका छन्। आंशिक प्राध्यापक संघले आइतबार एक विज्ञप्ति निकाल्दै भोको पेट लिएर काँचको सिसाका अगाडि उभिन नसक्ने बताएको छ।
विज्ञप्तिमा भनिएको छ, ‘विश्वविद्यालयको लाज ढाकिदिन अब हामी सक्ने अवस्थामा नरहेको बताउँदै नेपाल आंशिक प्राध्यापक संघ आजका मितिदेखि विश्वविद्यालयका सम्पूर्ण शैक्षिक गतिविधिमा संलग्न नरहने व्योहोरा जानकारी गराउँदछ।’
आंशिक प्राध्यापक संघले २०७७/०१/१९ गते नेपाल आंशिक प्राध्यापक संघले ज्ञापनपत्र बुझाएको थियो। वैशाख मसान्तसम्ममा समस्याको हल दिन आग्रह गरिएको उक्त समयमा पनि पारिश्रमिक पाउने कुनै आश्वसन नआएपछि नपढाउने निर्णय लिने बाध्य हुनुपरेको आंशिक प्राध्यापक संघले बताएको छ।
उपकुलपतिले अनौपचारिक रूपमा एक साताको समय मागेकोमा उक्त समय पनि सकिइसकेको यतिका समय बितिसक्दा पनि न विश्वविद्यालय न राज्य कतैबाट पनि आंशिक प्राध्यापकहरूको समस्या समाधानका लागि कुनै पहल नभएको विज्ञप्तिमा उल्लेख छ।
लकडाउन भएपछि त्रिभुवन विश्वविद्यालयले प्राध्यपकहरूलाई अनलाइनबाट पढाउने निर्णय गरेको थियो। आजसम्म अनलाइनबाटै पढाइरहेका आंशिक प्राध्यापकहरूले २०७६ सालकै पारिश्रामिक पाएका छैनन्।
सरकारले आंशिक प्राध्यापकहरूको दीर्घकालीन व्यवस्थापनका लागि त्रि.वि.वि.ले माग गरेको १४२० दरबन्दीलाई मिति २०७४/०८/०८ गते तत्कालीन मन्त्रीपरिषद्ले स्वीकृत गरेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।