सुर्खेत- दैलेखको क्वारेन्टाइनमा नै मृत्यु भएका एक जना पुरुषमा कोरोना संक्रमण भएको पुष्टि भएको छ। दुल्लु नगरपालिका-७ पटांगिनी बजारमा रहेको नेपाल विद्युत प्राधिकरण भवनमा शनिबार बिहान उनको मृत्यु भएको थियो।
क्वारेन्टाइनमा रहेका उनी बिहान ७ एक्कासी ढलेका थिए। त्यसको केही समयमा नै उनको मृत्यु भएको थियो। योसँगै कोरोना भाइरसका कारण नेपालमा मृत्यु हुनेको संख्या सात पुगेको छ।
कर्णाली प्रदेश सामाजिक विकास मन्त्रालयले साँझ जारी गरेको प्रेस विज्ञप्तिअनुसार उनको स्वाब परीक्षणका क्रममा कोरोना पोजेटिभ देखिएको हो। ‘कोभिड १९ सँग सम्बन्धित लक्षणहरु नभएको तथा आज बिहान ७ बजे एक्कासी ढल्नुभएको र केही समयमा उहाँको मृत्यु भएको साथै प्रयोगशाला परीक्षणमा नतिजा पोजिटिभ आएको,’ मन्त्रालयका स्वास्थ्य शिक्षा अधिकृत नवराज कँडेलद्वारा जारी विज्ञप्तिमा उल्लेख छ।
ती व्यक्तिको जुम्लास्थित कर्णाली स्वास्थ्य विज्ञान प्रतिष्ठानको प्रयोगशालामा नमुना परीक्षण गरिएको थियो। प्रतिष्ठानको अस्पतालका निर्देशक डा मंगल रावलका अनुसार ती व्यक्तिको मृत्यु हुनुभन्दा पहिला नै स्वाब संकलन गरिएको थियो।
‘उहाँको स्वाब १५ गते नै संकलन भएको हो,’ उनले भने, ‘मन्त्रालयको विज्ञप्तिमा केही त्रुटि भएकोले सच्याउने काम भइरहेको जानकारी आएको छ।’ मन्त्रालयको विज्ञप्तिमा मृत्युपछि स्वाब संकलन गरिएको उल्लेख छ।
यो सहित नेपालमा कोरोना भाइरसको संक्रमण देखिएकाको मृत्युको संख्या ७ पुगेको छ।
संघीय स्वास्थ्य तथा जनसंख्या मन्त्रालयले शनिबार दिउसो सार्वजनिक गरेको तथ्यांक अनुसार नेपालमा कोरोना संक्रमितको संख्या १ हजार ४ सय १ पुगेको छ। संक्रमितमध्ये हालसम्म २१९ जना निको भइसकेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।