काठमाडौं- सातै प्रदेशमा कोरोना भाइरसको जोखिम फैलिसकेको छ। सातै प्रदेशमा गरी कुल ५ सय ८४ जनामा कोरोना भाइरसको संक्रमण देखिएको छ। हालसम्म प्रदेश १, २ र प्रदेश ५ सबैभन्दा धेरै संक्रमित देखा परेका छन्। भारतसँग सीमा जोडिएका प्रदेश र जिल्लाहरू धेरै जोखिममा देखिएका छन्। यहाँमात्र सयभन्दा माथि कोरोना संक्रमित रहेका छन्। प्रदेश ३मा १ र प्रदेश ५मा २ जनाले ज्यान गुमाएका छन्। सिन्धुपाल्चोक, बाँके र गुल्मीका एक/एक जनाले कोरोना भाइरसका कारण ज्यान गुमाएका छन्।
प्रदेश- १
ताप्लेजुङदेखि ओखलढुङ्गासम्म फैलिएको यो प्रदेशमा झापा, मोरङ र सुनसरीमा संक्रमितहरू फेला परेका छन्। यी जिल्लाहरूमा भारतसँग सीमा जोडिएका कारण संक्रमितहरू फेला परेका छन्। यो प्रदेशमा ६ हजार २ सय ६२ क्वारेन्टाइन बेड संख्या रहेका छन्। यी क्वारेन्टाइनमा १४ सय १४ जना मानिस रहेका छन्। आइसोलेसनमा ५९ जना रहेका छन् भने कूल ८६ जना संक्रमित रहेका छन्।
प्रदेश २
कोरोना भाइरसको सबैभन्दा धेरै जोखिम रहेका प्रदेशमध्ये प्रदेश- २ दोस्रो नम्बरमा रहेको छ। प्रदेश- २ का अधिकांश जिल्लामा कोरोना संक्रमण फैलिएको छ। यो प्रदेशमा १ सय ७२ जना संक्रमित रहेका छन्। सप्तरी, सिराहा, धनुषा, महत्तोरी, सर्लाही, बारा, पर्सा र रौतहट गरी यी सबै क्षेत्रमा भारतसँग खुल्ला सीमा जोडिएको छ। खुल्ला सीमा भएका कारण यी जिल्लाहरू धेरै जोखिमा रहेका छन्। प्रदेश- २ मा ८ हजार ४ सय ७८ क्वारेन्टाइन बेड रहेका छन्। जसमा ५ हजार ९ सय ६ जना बसिरहेका छन्। ६ जना उपचार पनि डिस्चार्ज भएका छन्।
प्रदेश ३ बागमती
कोरोना भाइरसबाट ज्यान गुमाउने नेपालकी प्रथम महिला यही प्रदेशबाट थिइन्। सिन्धुपाल्चोक बाह्रबिसेकी एक सुत्करी महिलाले गत शनिबार कोरोना संक्रमणका कारण धुलिखेल अस्पतालमा ज्यान गुमाइन्। बागमती प्रदेशमा हालसम्म ३२ जना संक्रमित रहेका छन्।
बागमती प्रदेशमा ६ हजार ४ सय ९५ क्वारेन्टाइन बेड रहेका छन्। जसमा ४ सय ७८ जना बसिरहेका छन्। प्रायः जसो क्वारेन्टाइनमा मापदण्ड अनुसारका सुविधा छैनन्।
गण्डकी प्रदेश
गण्डकी प्रदेशमा हालसम्म ५ जना कोरोना संक्रमित देखिएका छन्। यसरी पुष्टि भएकामध्ये दुई जना उपचारपछि घर फर्केका छन्। कर्णाली प्रदेशपछि कम प्रभावित भएको प्रदेशमा गण्डकी हो। गण्डकी प्रदेशमा ४ हजार ३ सय ९९ क्वारेन्टाइन बेड रहेका छन्। जसमा ६ सय ७८ जना बसिरहेका छन्।
गण्डकी प्रदेशले पिसिआर र र्यापिड टेष्ट मार्फत परीक्षण गरिरहेको र संक्रमित जोखिममा रहेका मानिसहरूको खोजी गर्ने कार्य गरिेरहेको समाजिक विकासमन्त्री नरदेवि पुन मगरले बताइन्। ११ जिल्ला रहेको उक्त प्रदेशमा भारतसँग सीमा जोडिएका जिल्ला नहुँदा र विदेशबाट आउने मानिसहरूलाई समयमै क्वारेन्टाइनमा राख्नेलगायतका कार्य गरेकाले संक्रमण हालसम्म नफैलिएको मन्त्री मगरले दावी गरिन्। गण्डकी प्रदेशका अधिकांश क्वारेन्टाइन कामचलाउमात्र छन्। खाना र बस्न केही राम्रो भए पनि सरसफाइलगायतमा कमजोर छन्। विद्यालय, सामुदायिक र केही सरकारी भवनमा अस्थायी क्वारेन्टाइनस्थल पनि बनाइएको छ।
प्रदेश ५
कोरोना भाइरसको जोखिममा रहेको पहिलो क्षेत्र प्रदेश- ५ भएको छ । भारतसँग सिमा जोडिएका जिल्लाहरू धेरै भएकाले यहाँ धेरै संक्रमित रहेका छन्। प्रदेश- ५मा हालसम्म २ जनाले ज्यान गुमाएका छन्। यो प्रदेशमा हाल २ सय ७१ जना संक्रमित रहेका छन्।
यो प्रदेशमा २९ हजार १ सय ८३ क्वारेन्टाइन बेड रहेका छन्। जसमा १५ हजार ९ सय ८९ मानिस बसिरहेका छन्। बाँके, रुपन्देही, कपिलवस्तु, नवलपरासी, दाङ र गुल्मीमा कोरोना भाइरसका संक्रमित पुष्टि भएका छन्।
सुदूरपश्चिम प्रदेश
सुदूरपश्चिम प्रदेशमा हालसम्म १४ जना संक्रमित रहेका छन्।
सुदूरपश्चिम प्रदेशमा ९ हजार ८ सय ९० क्वारेन्टाइन बेड रहेका छन् भने यी क्वारेन्टाइनमा २६ सय २९ मानिस रहेका छन्। यी क्वारेन्टाइन कुनै पनि मापदण्डअनुसार छैनन्। क्वारेन्टाइनमा पानी, बिजुली, शौचालय र सरसफाइको व्यवस्था पनि पर्याप्त नभएको पाइएको छ। विद्यालयको एउटै कोठामा १० जनासम्म भुइँमै सुत्ने गरेका छन्। बाजुरादेखि दार्चुलासम्म ९ वटा जिल्ला समावेश भएको यो प्रदेशमा भारतमा रोजगारीमा चलेन भएकाले त्यहाँबाट फर्केका मानिसहरूका कारण जोखिम हुने भन्दै प्रदेश सरकार र स्थानीय सरकारले चिन्ता व्यक्त गर्ने गरेका छन्।
कर्णाली प्रदेश
कर्णाली प्रदेश हालसम्मको सबैभन्दा कम प्रभावित प्रदेश हो। सल्यानदेखि रुकुम पश्चिमसम्म १० जिल्ला रहेको यो प्रदेशमा हालसम्म ३ जनामात्र संक्रमित रहेका छन्। कर्णाली प्रदेशमा १० हजार ८ सय ८० क्वारेन्टाइन बेड रहेका छन्। जसमा ७ सय ३५ जना मानिस रहेका छन्। यसरी क्वारेनटाइनमा रहनेहरू अधिकांश भारतबाट रोजगारी गरेर फर्केका व्यक्तिहरू रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
