काठमाडौं- समाजवादीका सांसद डा सुरेन्द्र यादव अपहरण प्रकरणमा प्रहरीको रायको आधारमा जिल्ला सरकारी वकिल कार्यालय काठमाडौंले थप प्रमाण प्राप्त भएमा पुनः अनुसन्धान हुने सक्नेगरी तामेलीमा राख्ने निर्णय गरेको छ। जिल्ला सरकारी वकिल कार्यालय काठमाडौंका प्रमुख हरि रेग्मीले हाललाई अनुसन्धान तामेलीमा राखिएको बताए।
‘पछि प्रमाण प्राप्त भएको अवस्था र निवेदकले प्रमाण उपलब्ध गराएमा अनुसन्धान यही बिन्दुबाट गर्नेगरी पुनः जगाउने गरी तामेलीमा राखिएको छ’ प्रमुख रेग्मीले भने‚ ‘हालसम्मको अनुसन्धानबाट जे जे प्रमाण उपलब्ध भए र प्रहरीको प्रतिवेदन प्राप्त भयो त्यहीअनुसार यस्तो निर्णय भएको हो।’ तर प्रमाण प्राप्त भएको दिनमा पुनः अनुसन्धान हुन सक्ने उनले बताए। अनुसन्धान नै समाप्त नभएकाले मुद्दा चल्ने भन्दा पनि अनुसन्धान चाहीँ रोकिएको उनले बताए।
पूर्वस्वास्थ्य राज्यमन्त्रीसमेत रहेका समाजवादी पार्टी (राष्ट्रिय जनता पार्टीसँग एकता गरी जनता समाजवादी पार्टी बनाउने घोषणा भइसकेको) का सांसद डा सुरेन्द्र यादव अपहरण प्रकरणको अनुसन्धानको फाइल सरकारी वकिल कार्यालय काठमाडौंमा आइतबार प्रहरीले पेश गरेको थियो।
प्रहरीले भने अनुसन्धान सकेर फाइल सरकारी वकिल कार्यालयमा पेश गरेको दाबी गरेको थियो। तर सरकारी वकिलको कार्यालयले भने अनुसन्धान नै पूर्ण नभएको भन्दै तामेलीमा राखेको छ।
सांसद अपहरणबारे उजुरी दिन टेकु पुग्दा प्रहरीले जाहेरी लिएको थिएन। जाहेरी नलिएपछि सरकारी वकिल कार्यालयमा यादवसहितको टोली पुगेको थियो। सरकारी वकिल कार्यालयले गत वैशाख २२ गते प्रहरीले जाहेरी गर्न नमानेको विरुद्धको उजुरी दर्ता गर्दै प्रहरीलाई जाहेरी दर्ता गरेर अनुसन्धान गर्न निर्देशन दिएको थियो।
सरकारी वकिल कार्यालयबाट निर्देशन आएपछि महानगरीय प्रहरी परिसर काठमाडौंले उक्त घटनाको अनुसन्धान सुरु गरेको थियो। गत वैशाख २६ गते काठमाडौंबाट प्रहरी निरीक्षक देवी पौडेल नेतृत्वको टोली सांसद अपहरण भए भनिएको जिल्ला महोत्तरीमा गएको थियो।
मुद्दा शाखाका प्रहरी निरीक्षक पौडेलको टोली अनुसन्धान सकेर गत वैशाख ३० गते काठमाडौं फर्किएको थियो।
शुक्रबार अपराह्न काठमाडौंबाट महोत्तरी गएको टोलीले गत शनिबार बिहान सांसद यादवको महोत्तरीको सम्सीस्थित घर पुगेर मुचुल्का उठाएको थियो। मुचुल्कासँगै यादवको परिवारको सदस्यसँग समेत सोधपुछ गरिएको थियो।
अपहरण प्रकरणमा जोडिएका पूर्वमन्त्री तथा सत्तारुढ दल नेपाल कम्युनिस्ट पार्टी (नेकपा) का सांसद महेश बस्नेत, पूर्वप्रहरी महानिरीक्षक सर्वेन्द्र खनाल, नेकपाकै सांसद कृष्णकुमार श्रेष्ठ (किसन) र गुन्डा नाइके नवीन बस्नेत सांसद डा यादवको घर पुग्दाको अवस्था, त्यहाँको विवरणलगायतका विषय समावेश गरी प्रहरीले मुचुल्का उठाएको थियो।
सांसद डा यादवको घरमा मुचुल्का उठाइसकेपछि उनीहरू बसेको तथा खाना खाएको भनिएको बर्दिबासस्थित गौतम होटलमा पुगेर प्रहरीले मुचुल्का उठाएको थियो।
शनिबार सांसद यादवको घर र गौतम होटलको मुचुल्का उठाइसकेपछि प्रहरी निरीक्षक पौडेलको टोली जनकपुर गएको थियो। अपहरण प्रकरणमा साक्षी रहेका जनता समाजवादी पार्टीका नेता शेषनारायण यादवसँग समेत प्रहरीले बयान लिएको थियो।
नेता यादवलाई प्रहरी निरीक्षकको टोलीले दुई घण्टासम्म सोधपुछ गरेको थियो। सांसद यादवलाई जनकपुरबाट काठमाडौं लैजाने क्रममा सबैभन्दा पहिला उनले नेता शेषनारायणलाई फोन गरेर जानकारी गराएकाले उनीमाथि सोधपुछ गरिएको थियो।
जनकपुर र महोत्तरीको काम सकिएपछि यादवलाई काठमाडौं ल्याउँदा खाना खाएको भनिएको सिन्धुलीस्थित होटलमा समेत गएर प्रहरीले सोधपुछ गरेको थियो।
त्यस्तै महोत्तरी गएकै दिन सांसद यादवलाई राखिएको काठमाडौंको नक्सालस्थित मेरियट होटलमा प्रहरीले मुचुल्का उठाएको थियो।
यी सम्पूर्ण अनुसन्धानबाट अपहरण भएको प्रमाण फेला नपरेको भन्दै मुद्दा चलाउनु नपर्ने रायसहितको प्रतिवेदन प्रहरीले बुझाएको छ। तर सरकारी वकिलको कार्यालयले भने मुद्दा चलाउने चरणमा नै नपुगेको भनेर तामेलीमा राखेको छ। अनुसन्धान पुरा हुनका लागि त अपहरण गरेको आरोप लागेका व्यक्तिको बयानलगायत कार्य हुनुपर्ने तर त्यो चरणमै नपुगेकाले अनुसन्धान प्रमाण नपुगेको र थप प्रमाण प्राप्त भएमा अनुसन्धान गर्ने निर्णय गरेर तामेलीमा राखिएको सरकारी वकिलको रायमा उल्लेख छ।
तामेलीमा राखेका मुद्दाहरु पछि जागेका धेरै उदाहारणहरु रहेका छन्। एभरेष्ट होटलका मालिक मस्कुर अहमद लारीको लागू औषध मुद्दा पनि धेरै वर्ष तामेलीमा रहेर पुनः जागेको थियो। त्यस्तै नेपाली कांग्रेसका नेता मोहमद आलमको मुद्दा पनि तामेलीबाट जगाएर पुनः अनुसन्धान गरिएको थियो। इट्टा भट्टामा जिउँदै मानिस जलाएको आरोप लागेका सांसद आलम अहिले पुर्पक्षका लागि थुनामा रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
