काठमाडौं- त्रिवि शिक्षण अस्पताल, महाराजगञ्जमा कोरोना संक्रमण देखिएपछि अस्पतालका आवासीय चिकित्सक, नर्सलगायत अन्य कर्मचारीलाई घरबेटीले तनाव दिन थालेको गुनासो आएको छ।
अस्पतालमा संक्रमित देखिएपछि अस्पतालका कर्मचारी बसेका घरबेटी कि घरमै बस्न कि अस्पतालमा नै बस्न दवाव दिन थालेका छन्।
जेठ १ गते कपिलवस्तुबाट उपचारका लागि आएकी सात वर्षीया बालिकालाई कोरोना पोजिटिभ आएपछि अस्पतालमा त्रास छाएको थियो।
अस्पतालमा कार्यरत चिकित्सक, नर्स, स्वास्थ्यकर्मीहरु र अन्य कर्मचारीलाई उनीहरुका घरबेटीले कोरोना संक्रमण सार्न सक्ने भन्दै शंका गर्न थालेका छन्। कति घरबेटीले त अस्पतालमै बस्न दबाब समेत दिएको अस्पतालका कर्मचारी बताउँछन्।
जेठ २ गते एक जना र कोरोनाबाट मृत्यु भएकी सिन्धुपाल्चोककी महिलाले शिक्षण अस्पतालमै बच्चा जन्माएको थाहा पाएपछि घरबेटी सशंकित बन्न थालेको उनीहरु बताउँछन्।
त्रिवि, महाराजगन्ज क्याम्पसको नेसनल रेजिडेन्ट डक्टर्स एसोसिएसनका अध्यक्ष डा अनुप उप्रेतीले १५ जना आवासिय चिकित्सकलाई घरबेटी यस्तो दबाव दिएको बताए। उनका अनुसार अस्पतालका अन्य कर्मचारीलाई पनि दबाब आइरहेको छ। कर्मचारीहरु ५/७ जनाले घरबेटीबाट दबाब आएको गुनासो गरेका छन्। अस्पतालमा अहिले ३ सय भन्दा बढी आवासिय चिकित्सकहरु छन्। जसमध्ये ६४ जनाले आवास सुविधा पाएका छन्।
उनले क्याम्पस र अस्पताल प्रशासनलाई यस विषयमा पटकपटक जानकारी गराउँदै अस्थायी आवासको व्यवस्था गरिदिन अनुरोध गरेको बताए।
उनले भने, ‘हामीले समस्यामा परेका आवासिय चिकित्सकलाई तत्काल अस्थायी आवासको व्यवस्था गरिदिन अनुरोध गरिरहेका छौं तर डीन निर्देशक लगायतबाट सुनुवाई भएको छैन। हाम्रा साथीहरुलाई ड्युटी आउन जान नै समस्या भयो।’
एमडी,एमएस तहमा अध्ययनरत चिकित्सकहरुलाई आवासको सुविधा दिनुपर्ने व्यवस्था छ। तर महाराजगन्ज क्याम्पसमा ४० चिकित्सकले मात्र आवासको सुविधा पाएका छन्। अन्य आवासीय चिकित्सक अस्पताल वरपरका घरमा भाडामा बस्दै आएका छन्।
आवासीय चिकित्सकहरुले क्याम्पस हाताभित्र रहेको २ प्रिफ्याब भवनमा तत्कालका लागि घरबेटीबाट समस्यामा परेका आवासिय र अन्य कर्मचारीलाई आवासको व्यवस्था गर्न अनुरोध गरेका छन्।
तर, डीन, क्याम्पस प्रमुखले अस्पताल निर्देशकलाई असहयोग गर्दै त्यस्तो व्यवस्था गर्न अस्वीकार गरेको आरोप चिकित्सकले लगाएका छन्।
‘क्याम्पस प्रशासनले चिकित्सकको आवासको व्यवस्था गर्ने जिम्मा हाम्रो होइन, अस्पतालले काम लगाएपछि व्यवस्थापन गर्ने जिम्मेवारी पनि अस्पतालको हो भनेर जवाफ दियो,’ एक आवासिय चिकित्सकले स्वास्थ्यखबरलाई बताए।
लकडाउन सुरु भएको केही समयपछि शिक्षण अस्पताल र कान्ति बाल अस्पतालमा कार्यरत २ जना आवासिय चिकित्सक प्रहरीबाट कुटिएका थिए।
अस्पतालभित्र आवासको व्यवस्था भएको भए त्यस्ता समस्या नहँने भन्दै यो समस्या लिएर उनीहरु स्वास्थ्य मन्त्री भानुभक्त ढकालकहाँ समेत पुगेका थिए।
स्वास्थ्यमन्त्री ढकालले २४ घण्टाभित्रै समस्या समाधान गरिदिने आश्वासन दिँदै उनीहरुलाई फर्काएका थिए। तर, आश्वासन दिएको दुई महिना बित्दा समेत समस्याको सुनुवाई हुन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
