काठमाडौं- लकडाउन अवधिपछि ३ अर्ब १८ करोड रुपैयाँ बराबरको उत्पादित औषधि र औषधि बनाउनका लागि चाहिने कच्चा पदार्थ नेपाल आयात भएको छ।
उद्योग, वाणिज्य, तथा आपूर्ति मन्त्रालयको तथ्यांकअनुसार गत चैत ११ गतेदेखि जेठ २ गतेसम्ममा ५६ करोड २१ लाख ७३ हजार रुपैयाँ बराबरको औषधीको कच्चापदार्थ आयात भएको छ भने २ अर्ब ६१ करोड ८३ लाख ७४ हजार बराबरको तयारी औषधी आयात भएको छ।
यो अवधिमा तयारी औषधिभन्दा कच्चा पदार्थको आयातमा साढे ४ सय प्रतिशतसम्मको वृद्धि देखिएको छ। चैत पहिलो साताको तुलनामा औषधीको कच्चापदार्थको आयात ४३५ दशमलव २ प्रतिशत र तयारी औषधिको आयात ३३ दशमलव ४ प्रतिशतले बढेको छ।
मन्त्रालयको तथ्यांकअनुसार लकडाउन सुरु भएपछिको ५२ दिन अवधिमा १ लाख ७१ हजार मेट्रिक टन खाद्यान्न, र ४४ हजार ७ सय मेट्रिक टन दलहन आयात भएको छ। यही अवधिमा ६५ हजार ६६२ मेट्रिक टन तरकारी, २४ हजार ७३२ मेट्रिक टन फलफूल र ११ हजार १५१ मेट्रिक टन दुग्धजन्य पदार्थ आयात भएको छ।
मन्त्रालयका अनुसार लकडाउन सुरु भएपछि खाद्यान्नको आयात पनि क्रमशः बढेको छ। पहिलो हप्ताको तुलनामा सातौ हप्तामा खाद्यान्नको आयात ९३ दशमलव ४ प्रतिशत र दलहन तथा गेडागुडीको आयात २६ दशमलव २ प्रतिशतले बढेको छ। यसैगरी, तरकारी र फलफूलको आयात क्रमशः २५ प्रतिशत र ३६१ दशमलव ३ प्रतिशतले वृद्धि भएको छ।
यही अवधिमा दुग्धजन्य पदार्थको आयात ५१४ दशमलव ३ प्रतिशतले बढेको छ, लकडाउन सुरु भएको ७ हप्तामध्ये खाद्यान्न पाँचौं हप्तामा, दलहन तथा गेडागुडी, फलफूल र तयारी औषधी छैठौं हप्तामा र औषधीको कच्चापदार्थ सातौं हप्तामा सबैभन्दा बढी आयात भएको देखिन्छ। यसैगरी तरकारी र दुग्धजन्य पदार्थ चौथो हप्तामा सबैभन्दा बढी आयात भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
