काठमाडौं- कपिलवस्तुमा कोरोना संक्रमितको संख्या थपिने क्रम जारी रहेको छ। शनिबार बिहानै तीन जना थपिए। योसँगै कपिलवस्तुमा कोरोना संक्रमितको संख्या ४३ पुगेको छ। देशभर २९१ पुगेको छ।
शनिबार बिहान कपिलवस्तुको शिवराज नगरपालिकाका २५, ३४ र ४४ वर्षका पुरुषमा संक्रमण देखिएको पुष्टि भएको थियो। ३४ वर्षका पुरुष भने सोही शिवराजन नगरपालिका वडा नम्बर ११ का स्थायी बासिन्दा हुन् भने २५ र ४४ वर्षका पुरुष वडा नम्बर ८ का बासिन्दा हुन्।
वैशाख १९ गते पहिलो संक्रमित
कपिलवस्तुमा पहिलो कोरोना संक्रमित बिरामी बैसाख १९ गते फेला परेका थिए। त्यसको एक सातापछि २ जना थपिएको कोरोना अस्पताल बुटवलका डा सुर्दशन थापाले बताए।
‘वैशाखको अन्तिमपछि कोरोना संक्रमित देखापर्ने क्रम तीव्र भएको छ,’ डा थापाले भने, ‘अहिले पनि थपिइरहेको छ।’ कपिलवस्तुमा भारतसँग धेरै स्थानबाट सीमा जोडिएको छ। कृष्णनगर यहाँको मुख्य नाका हो। करिब ६० किलोमिटर भाग भारतसँग सीमाना जोडिएको छ। यी सबै खुल्ला सीमा हुन्। ६० किलो मिटरभित्र जुनसुकै स्थानबाट पनि नेपाल छिर्न सकिन्छ र अहिले केही स्थानमा भने सशस्त्र प्रहरीलाई राखिएको छ। कपिलवस्तुका ४३ जना संक्रमितमध्ये १ जना निको भएर घर फर्केका छन्।
सहायक प्रमुख जिल्ला अधिकारी गणेश नेपालीले स्थानीयमा नभई भारतबाट आएका व्यक्तिहरुबाट कोरोना संक्रमण भएको बताए। यसमध्ये अस्पतालमा कार्यरत रहेकी एक नर्स र एक सुरक्षाकर्मीमा पनि कोरोना सरेको नेपालीले बताए। यीबाहेक अन्य सवै भारतबाट नेपाल आएका व्यक्तिहरुको भएको उनले बताए।
अहिले ५ हजार ६ सय ९६ क्वारेनटाइनमा रहेको र ६६९ जनाको स्वाब संकलन गरिएको उनले बताए। शंकास्पद ६२५ जनाको परिक्षण भइरहेको उनले बताए। अस्पतालमा हाल ३६ जनाको स्वाव पुनः परिक्षणका लागि आइतवार पठाउने तयारीमा रहेको कोरोना अस्पतालका डा थापाले बताए।
संक्रमितहरुमध्ये कोरोना अस्पतालमा बुटवलमा स्थान अभाव भएपछि केहीलाई दाङ पठाइएको छ। यसरी भारतबाट आउनेमा कोरोना देखिएपछि जिल्ला प्रशासन र स्थानीय निकायले सीमा जोडिएका क्षेत्रमा कडाई गरिरहेको सहायक जिल्ला अधिकारी नेपालीले बताए। लकडाउन र मानिसहरूको हिँडडुलमा कडाए गरिनुका साथै केही परिवारको सम्पर्कमा पुगेका संक्रमितको क्षेत्र सिल गरेर मानिसहरुको ट्रेस गर्ने कार्य भइरहेको उनले बताए।
यसरी कपिलवस्तु छिर्ने सबै लकडाउनपछि भारतको मुम्बई, दिल्ली र अन्य सहरबाट सीमासम्म मालबाहक साधनमा आएका र चोरबाटो हुँदै यता छिरेका पाइएको छ। केही भने क्वारेनटाइनमा बसेका मानिसहरु रहेको छन्। उनीहरुको यात्रा विवरण भने फरक–फरक छ। ९ देखि १६ जनाको चिकित्सकीय टोली उपचारका लागि खटिएको छ। अस्पतालमा ५० बेड छन्।
कपिलवस्तुमा थप सुरक्षा र स्वास्थ्य सतर्कता अपनाउन भन्दै गत सोमबार देखि जेठ ५ गतेसम्मका लागि जिल्ला सिल गरिएको थियो। तर चोरबाटो हुँदै जिल्ला प्रवेश गर्नेहरु रोकिएका छैनन्।
खुला सीमा क्षेत्रमा सुरक्षाकर्मीले मात्र नेपाल छिर्नेलाई रोक्न नसकेपछि स्थानीय तहको अगुवाइमा स्वयंसेवक खटाउनेबारे छलफल गरेको थियो। तर यसरी खटाएका स्वयंसेवकमै कोरोनाको संक्रमणको उच्च जोखिमपछि उनीहरु पछि हटेका थिए।
मुम्बईबाट आएकालाई गाउँले बाटोमै रोके
वैशाख २६ गते विद्यालयको क्वारेनटाइनमा बसेका दुई जनामा कोरोना पोजेटिभ देखिएको थियो। उनीहरु भारतको महाराष्ट्रबाट छिरेका थिए भने कपिलवस्तुका दोस्रो संक्रमित थिए।
गाउँपालिकाले निर्माण गरेको क्वारेन्टाइनमा रहेका ६५ जनाको स्वाब परीक्षण गर्दा दुई जनाको रिपोर्ट पोजेटिभ देखिएको थियो।
भारतको महाराष्ट्रस्थित मुम्बईबाट आएका उनीहरु दुवै तीर्थादेवी छत्रपाली माध्यमिक विद्यालय पकडीमा निर्माण गरिएको क्वारेन्टाइनमा बसेका थिए। मुम्बईबाट आउँदै गरेको जानकारी पाएपछि स्थानीयवासीले गाउँमा प्रवेश गर्न नदिने गरी बाटामै रोकेर क्वारेन्टाइनमा पठाएका थिए।
नर्समा पनि कोरोना बैसाख १९ गतेवाट शुरु भएको कोरोनाको बिरामीबाट बैसाख ३० गते एक नर्समा सरेको देखियो। स्वास्थ्यकर्मीको परिक्षण गर्दा कोरोना संक्रमित विरामीको उपचारमा खटिएकी नर्समा देखिएको थियो। बैसाख ३० गते ८ जनामा एकै पटक कोरोना संक्रमण पुष्टि भएको थियो। संक्रमण देखिएका ८ जना मध्ये एकजना २५ वर्षीया स्टाफ नर्स सरेको पाइएको थियो।
ती नर्स जिल्ला अस्पताल तौलिहवामा कार्यरत थिइन्। अस्पतालका केही स्वास्थ्यकर्मीको स्वाब लिएर परीक्षणका लागि पठाइएकोमा उनको मात्र संक्रमण पुष्टि भएको थियो। बैसाख ३० गते दिउसो कोरोना संक्रमण पुष्टि भएका सबै कपिलवस्तु नगरपालिकाका थिए। त्यस्तै सुरक्षाका लागि खटिएका एक सुरक्षाकर्मीलाई पनि कोरोन पुष्टि भएको थियो। उनको पनि कोरोना अस्पताल मा उपचार भइरहेको छ।
अस्पतालमा बेड छैन
बुटवल धागो कारखानाको भवनमा रहेको कोरोना अस्थायी अस्पतालमा बेड अभाव भएको। गत मंगलबार एकै दिन रुपन्देहीमा ९ जना र कपिलवस्तुमा ८ जना संक्रमित भएपछि उनीहरुलाई राख्न अस्पतालमा बेड अभाव भएको थियो। यो संख्या अहिले बढेर ४३ पुग्दा बिरामीलाई दाङ पठाउन थालिएको डा थापाले बताए।
दुवै जिल्लामा कोरोना संक्रमित थपिन थालेपछि कोरोना अस्पतालमा बेड असम्भव भएको अस्पतालका कन्सलटेन्ट डा. सुदर्शन थापाले बताए। ‘भएका बेडमा बिरामी छन् अन्य अस्पतालहरुमा पनि भरिएका छन्,’ थापाले भने, ‘अब थपिने बिरामी अन्य ठाउँमा पठाउनुको विकल्प छैन।’
रुपन्देही र कपिलवस्तुमा दिनप्रतिदिन कोरोना संक्रिमित बढिरहेका छन्। २ जिल्लाका संक्रमितलाई उक्त अस्पतालमा राखिएको छ। कोरोना अस्थायी अस्पतालको आइसोलेसनमा ३६ र आइसियुतर्फ थप ८ वटा बेड छन्। अब कोरोना अस्पतालमा आइसोलेसनतर्फ कुनै पनि वेड नभएको उनले बताए। आइसीयुमा अहिलेसम्म कसैलाई भर्ना गर्न नपरेको उनले बताए।
गम्भीर अवस्थाका बिरामीलाई मात्र राख्नुपर्ने भएकाले र अहिलेसम्म सबैको अवस्था सामान्य रहेकाले आइसोलेनमआ मात्र राखिएको उनले बताए। भैरहवामा भीम अस्पतालमा कोरोना संक्रमण देखिएका बिरामीलाई राख्न २२ वटा आइसोलेसन बेड रहेको छन्। थप ५ वटा आइसीयु छ। संख्या वृद्धि भएपछि कोरोना अस्पतालले त्यहाँ राख्न पठाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
