काठमाडौं– नेपाल पर्यटन बोर्डका कार्यकारी प्रमुख डा. धनञ्जय रेग्मीले २०७७ बैशाख १८ मा भारतका पर्यटन संघसंस्थाका प्रमुसखहरुसँग नेपाल–भारत पर्यटनलाई कोरोना संकटपछि नयाँ गति दिने विषयमा अनलाइन छलफल गरेका छन्।
छलफलमा भारतीय पर्यटनका अगुवाहरु भारतीय ट्राभल एजेण्टस एसोसियनका अध्यक्ष ज्योति मयल, भारतीय आन्तरिक पर्यटन टुर अपरेटर एसोसिएसनका अध्यक्ष पिपि खन्ना, भारतीय एड्भेन्चर टुर अपरेटर एसोसिएसनका अध्यक्ष क्याप्टेन स्वदेश कुमार, भारतीय ट्राभल एजेण्टस फेडेरेसनका अध्यक्ष प्रदीप लुल्ला, र भारतीय आउट बाउण्ड टुर अपरेटर्स एसोसिएसनका निर्वतमान अध्यक्ष महेन्द्र भखारिया सहभागी थिए। बज भारतीय ट्राभलका प्रमुख सञित जैनले छलफलको समन्वय गरेका थिए।
बोर्डका कार्यकारी प्रमुख डा. रेग्मीले उक्त छलफलमा बोर्डले वर्तमान संकटका समयमा नेपालमा भएका पर्यटकलाई आफ्नो देश फर्किन गरिएको कामका बारेमा, नेपाली पर्यटन उद्योगको क्षति विवरणका लागि सर्भेक्षण गरिरहेको, नेपाल सरकारसँग पर्यटन उद्योगलाई राहत प्याकेजका लागि गरिरहेको पहलकदमी, नेपाली पर्यटन उद्योगलाई आगामी दिनमा आवश्यक हुने हाइजिन स्यानिटेशनको व्यवस्था, भारतीय बजार लक्षित हिलस्टेशन र मझौला पहाडी भागमा नयाँ पर्यटकीय गन्तव्यकाे विकासका साथै ती स्थानहरुमा मनोरञ्जनका आयामका लागि बोर्डले गरिरहेको पहलहरुका बारेमा जानकारी गराएका थिए।
छलफल कोरोनापछिका दिनमा भारतीय पर्यटकहरुको नेपाल भ्रमणका लागि चाहिने आत्मविश्वासका लागि गरिनुपर्ने विविध अभियानका बारेमा बढी केन्द्रित थियो। सबै सहभागी भारतीय पर्यटनका शीर्ष व्यक्तिहरुले संकट पश्चात भारतीय पर्यटकहरु भ्रमणमा सामाजिक दूरी र सुरक्षाका विषयमा बढी सचेत हुने बताउँदै नेपालले गन्तव्यहरुमा यसको प्रवर्द्धन गर्न अनुरोध गरे।
नेपालको यो संकटमा हालसम्म शून्य मृत्युको अवस्थाले आगामी दिनमा भारतीय बजारहरुमा छुट्टै स्थान बनाउने र नेपाल प्रतिको विश्वास अझ बढाउने सहभागीहरुले बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।