कुवेत सरकारले घोषणा गरेको आममाफी कार्यक्रममा सहभागी हुन कुवेतको महाबुल्ला क्षेत्रमा ट्राभल डकुेमन्टका लागि जम्मा भएका नेपाली कामदार। -तस्वीरः परदेशी खबर डटकम
काठमाडौं- सरकारले विदेशमा आममाफी पाएका कामदारहरु फर्काउने भएको छ। आममाफी अवैध नेपाली श्रमिकहरु स्वदेश फर्काउने अवसर पनि भएकाले यस्ता कामदारहरुलाई फर्काइने वैदेशिक रोजगार विभागका महानिर्देशक कुमार दाहालले बताए।
‘आममाफी भनेको हाम्रो लागि अवसर पनि हो। प्रत्येक देशहरुले दुई चार वर्षको अन्तरमा आममाफीको अवसर दिएका हुन्छन्। यो वर्ष कुवेतले आममाफी दिएको छ। बहराइन, साउदी, युएई लगायत अन्य मुलुकहरुले पनि आममाफी दिने तयारी गरेका छन्‚’ बुधबार वैदेशिक रोजगार पत्रकार समाजले गरेको भिडियो वार्तामा बोल्दै महानिर्देशक दाहालले भने।
आममाफी पाएका श्रमिकहरुलाई हामीले ल्याउने कि नल्याउने भनेर अलमल गर्नेभन्दा पनि अवसर पाएको बेला उनीहरुलाई स्वदेश फर्काउनुपर्ने महानिर्देशक दाहालको भनाइ छ।
‘गन्तव्य मुलुकले कतिपयलाई त डिपोर्ट नै गरेको अवस्था छ। तर अहिले अवैध रुपमा रहँदै आएका श्रमिकहरुलाई दण्ड जरिवाना समेत मिनाहा गरिदिने भएको छ। गन्तव्य मुलुकले नै उनीहरुलाई चार्टरको व्यवस्था गर्ने भनेका छन्‚’ महानिर्देशक दाहालले भने।
आममाफी पाएका श्रमिकहरुलाई उच्च सतर्कताका साथ स्वदेश फर्काउने तथा सुरक्षित व्यवस्थापनको तयारी भइरहेको उनको भनाइ छ।
तत्काल उद्धार गर्नुपर्ने अवस्थाका श्रमिक २ लाख बढी
विदेशबाट तत्काल उद्धार गर्नुपर्ने अवस्थाका दुई लाख १५ हजारभन्दा बढी श्रमिकहरु रहेको विभागका महानिर्देशक दाहालले बताए।
महानिर्देशक दाहालको संयोजकत्वमा गठन भएको कोभिड व्यवस्थापन समितिको प्रारम्भिक अध्ययनअनुसार दुई लाख १५ हजारभन्दा बढी श्रमिकहरु तत्काल उद्धार गनुपर्ने अवस्थाका छन्।
समितिले दूतावास, श्रम सहचारी, एनआरएन, म्यानपावर व्यवसायी, र रोजगारदाता कम्पनीहरुमार्फत समस्यामा परेका श्रमिकहरुको विवरण संकलन गरिरहेको जनाएको छ।
समितिले पहिलो चरणमा विदेशमा अप्ठ्यारोमा परेका श्रमिकहरुलाई राहत उपलब्ध गराएर सहजीकरण गरिरहेको जनाएको छ।
महानिर्देशक दाहाल भन्छन्, ‘देश पूर्ण रुपमा लकडाउनमा छ। अन्तर्राष्ट्रिय उडान ठप्प छन्। तत्काल उद्धार गर्न सक्ने अवस्था छैन। जसले गर्दा हामीले श्रमिकहरुको सहजीकरणका लागि राहत वितरण गरिरहेका छौं।’
लकडाउन खुकुलो हुँदै गएपछिमात्र अन्य समस्यामा परेका तथा स्वदेश फर्किन चाहने श्रमिकहरु स्वदेश फर्किन पाउने महानिर्देशक दाहालले बताए।
विज्ञहरुले समस्यामा परेका श्रमिकहरुलाई वर्गिकरण गरी सहजीकरण गर्न सुझाएका छन्। कानुनविद् सोम लुइँटेलले सरकारले विदेशमा नेपाली श्रमिकहरु कस्तो अवस्थामा छन्। ती समस्या पहिचान गरी स्वदेश ल्याउनैपर्ने अवस्थाका श्रमिकहरुको उद्धार गर्न सुझाएका छन्।
‘सबै श्रमिकहरु स्वदेश फिर्ता ल्याउनैपर्ने भनिएको होइन, सरकारले विदेशमा श्रमिकहरु के कस्तो अवस्थामा छन्, कतिले रोजगारी गुमाइसकेको अवस्था छ। जसलाई खान बस्न नै अप्ठ्यारो छ‚’ कानुनविद् लुईंटेलले भने, ‘त्यस्ता श्रमिकहरु पहिचान गरी सकेसम्म त्यहीँ रोजगारी दिलाउन पहल गर्ने नसके स्वदेश फर्काउने पहल गर्नुपर्छ।’
समस्यामा परी फर्किएका श्रमिकहरुलाई वैदेशिक रोजगार कल्याणकारी कोषमार्फत क्षतिपूर्ति दिलाइनुपर्ने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768221200.png)
-1764146706.png)
