काठमाडौं- सत्तारुढ दल नेपाल कम्युनिस्ट पार्टी (नेकपा)को सचिवालय बैठकअघि शक्ति प्रदर्शन गर्न दुवै पक्ष तीब्र रुपमा लागिपरेका छन्। बुधबार ५ बजे बैठक तय भएपछि प्रधानमन्त्री तथा अध्यक्ष केपी शर्मा ओलीका साथै अर्का अध्यक्ष पुष्पकमल दाहाल प्रचण्ड र वरिष्ठ नेता माधव नेपाल समूह शक्ति देखाउने होडमा लागेका हुन्।
सचिवालय बैठकअघि आफ्नो पक्षमा बलियो पकड रहेको देखाउन दुबै पक्षले हस्ताक्षर अभियान सुरु गरेका छन्। प्रधानमन्त्री ओलीले बालुवाटारमै सांसद बोलाएर सत्ता परिवर्तनको खेलमा नलाग्न निर्देशन समेत दिएका छन्। केही दिनदेखि हस्ताक्षरका विषयमा कुरा चलेपछि मंगलबार ओली पक्षले र एक दिनपछि प्रचण्ड–नेपाल समूह औपचारिक रुपमा अघि बढेका छन्।
सचिवालयमा हुने सम्भावित विवादलाई लक्षित गरी उनीहरुले शक्ति देखाउन लागेका हुन्। प्रधानमन्त्री ओलीलाई पार्टी अध्यक्ष र प्रधानमन्त्रीबाट राजीनामा दिन प्रचण्ड–नेपाल समूहले दबाब दिनेछ। उक्त दबाबको प्रतिउत्तरमा संसदीय दलको बैठक फेस गर्ने जवाफ दिने तयारी ओलीले गरेको बुझिएको छ। त्यसैको स्वरुप हस्ताक्षर अभियान चलेको हो।
बालुवाटारमा पुगेका प्रधानमन्त्री ओली निकट सांसद कृष्ण राईले प्रधानमन्त्रीको पक्षमा बहुमत पुगेको जानकारी दिए। प्रधानमन्त्री ओलीले दुबै पद नछोड्ने समेत आफू निकटलाई सुनाएका छन्। ओलीले आफू हट्ने अवस्था आए त्यसको परिणाम पार्टी र देशलाई अनुकुल नहुने बताए। प्रधानमन्त्रीको भनाई उद्घृत गर्दै सांसद राईले भने, ‘सरकार ढल्यो भने पार्टीलाई असर गर्छ। अर्को निर्वाचनमा मत परिणाम नेकपाको पक्षमा आउँदैन।’
कार्यकारी अध्यक्ष रहेका प्रचण्ड समूहले हस्ताक्षर अभियान बुधबार अघि नै सुरु गरेको प्रधानमन्त्री समूहको भनाई छ। प्रधानमन्त्री अल्पमतमा परेको सन्देश बाहिर प्रचार भएपछि ओली समूह पनि हस्ताक्षर गर्न लागेको थियो। राईले भने, ‘प्रधानमन्त्री अल्पमतमा भएको बाहिर आयो नि त। अल्पमतमा प्रधानमन्त्री हुनुहुन्न। प्रधानमन्त्री सेफ साइडमा बस्नु त पर्यो नि।’
प्रधानमन्त्रीको पक्षमा ८८ जना भन्दा बढी सांसद पुगेको बालुवाटारको दाबी छ। संसदमा नेकपाका १७२ सांसद छन्। वार कि पारको सन्देश दिने गरि बालुवाटार अघि बढेको त्यहाँ पुगेका सांसदहरुको दाबी छ। बालुवाटार पुगेका एक सांसदले भने, ‘मंगलबारसम्म मिडियामा गएको भन्दा फरक विषय बिहीबारबाट आउनेछ।’
मंगलबार ओली र प्रचण्डबीच भएको बैठक असहज भएको थियो। प्रचण्डले आफूलाई एक्लो अध्यक्ष बनाउने प्रस्ताव गरेका थिए।
प्रचण्डको प्रस्तावलाई अस्वीकार गर्दै ओलीले बहु अध्यक्षको प्रस्ताव गरेका थिए। वरिष्ठ नेता झलनाथ खनाल, नेताहरु नेपाल र रामबहादुर थापालाई समेत अध्यक्ष बनाई अध्यक्षमण्डलको संयोजक आफू हुनुपर्ने प्रस्ताव राखेका थिए। ओलीको प्रस्तावलाई प्रचण्डले ठाडै अस्वीकार गरे। विवाद चर्कंदै गएपछि कांग्रेस र मधेसवादी दललाई साथमा लिएर सरकार बनाउने चेतावनी ओलीलाई दिए। दुई नेताको दुरी मंगलबारबाट झनै टाढिएपछि ओली पक्षको तयारी बढ्यो।
बालुवाटारले प्रचण्डप्रति विश्वास गरिहाल्न सकेको थिएन। मधेशवादी दल जुटाउनमा प्रचण्डकै भूमिका भएको बालुवाटारको बुझाइ छ। उक्त बुझाइलाई मंगलबारको प्रचण्डको अभिव्यक्तिले प्रधानमन्त्री थप सशंकित बने। पार्टीमा समस्या थप बढ्ने आंकलन गरेका प्रधानमन्त्रीले आफू निकटका सांसदहरुलाई जुटाए। तीन दिन अघि पनि केही सांसदलाई प्रधानमन्त्रीले बालुवाटार बोलाएका थिए। विपक्षी पार्टीहरुलाई अघि बढाएर अविश्वासको प्रस्ताव ओली विरोधी खेमाले ल्याउने आशंका बालुवाटारको छ।
ओलीलाई ८८ सांसद नपुग्ने बाहिरी प्रचार भएसँगै प्रधानमन्त्री ओलीको समूह तातिएको थियो। पूर्व माओवादी नेताहरुलाई तान्नसमेत सकिने ओली पक्षको ठहर छ। ओली पक्षका नेताले भने, ‘प्रचण्डको झुण्डमा नेपाल पक्षका सबै पनि जाँदैनन्। प्रचण्ड पक्षका भनिएका पनि जाँदैनन्।’
नेपाललाई अघि सारेर प्रचण्ड आफै प्रधानमन्त्री बन्ने लाइनमा रहेको ओली समूहको बुझाइ छ। ‘पावर शेयरिङ’को मुद्दा उठाएका नेता नेपाललाई अध्यक्ष सुम्पिदा वरियतामा उनीभन्दा माथि रहेका झलनाथ खनालले समेत स्वीकार्ने देखिँदैन। नेपाललाई अध्यक्ष बनाउँदा खनालको विरोध हुने ओली पक्षलाई हेक्का छ।
पार्टी एकीकरण पश्चात अध्यक्ष ओलीबाट ‘अपहेलित’ भएको महशुस गरेका नेता नेपालले दुई पदमा एक पद छोड्न प्रधानमन्त्रीमाथि दबाब बढाउँदै लगेका छन्। तर, ओली दुबै पद छोड्ने पक्षमा देखिएका छैनन्। ओली निकट राई भन्छन्, ‘प्रधानमन्त्रीले पावर शो गर्नुहुन्छ। पावर शेयर हुँदैन।’
महाधिवेशनबाट बनेको अध्यक्षलाई महाधिवेशनबाट मात्रै हटाउनु पर्ने तर्क ओली पक्षको छ।
बैठक बोलाउन पटक-पटक प्रयास
नेकपा सचिवालय र स्थायी कमिटी बैठक बोलाउन नेताहरुले लामो समयदेखि प्रयास गर्दै आएका छन्। वैशाख १० गते अध्यक्ष प्रचण्ड समूह र माधव नेपाल समूहका २० स्थायी कमिटी नेताहरु तत्काल स्थायी कमिटी र केन्द्रीय कमिटी बैठक बोलाउन माग गरेका थिए। पार्टीमा विवाद बढ्दै गएकाले आफ्ना कुरा राख्न तत्काल बैठक बोलाउनु पर्ने माग उनीहरुको थियो।
प्रधानमन्त्री ओली र नेपाल समूहको गत सोमबार कोटेश्वरको एक सरकारी भवनमा बसेको बैठकले तत्काल सचिवालय र स्थायी कमिटी बैठक बोलाउने समझदारी भएको थियो। तर, समझारी अनुसार गत मंगलबार सचिवालय बैठक विवादका कारण बस्न सकेन। लगत्तै मंगलबार बैठक बोलाउने विषयमा ओली प्रचण्डबीच वालुवाटारमा समझदारी भयो।
भेटपछि बुधबार बेलुका सचिवालय बैठक बस्ने तयारी छ। आज सचिवालय बैठकमा प्रधानमन्त्री ओलीको राजीनामा आउन सक्ने देखिएपछि गुटका नेताहरु संसादको हस्ताक्षर गर्ने अभियानमा लागेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
