बुटवल- समाजवादी पार्टी रुपन्देहीले प्रधानमन्त्री केपी शर्मा ओलीले राजीनामा दिनुपर्ने माग गरेको छ। महोत्तरीका सांसद एवं पूर्वस्वास्थ्य राज्यमन्त्री डा. सुरेन्द्र यादवलाई समाजवादी पार्टी फुटाउने उद्देश्यले प्रधानमन्त्रीकै निर्देशनमा अपहरण गरेर काठमाडौं लगिएको र घटनामा संलग्नमाथि कारवाहीका लागि मुद्दा दर्ता गर्न जाँदा नगरिएको भन्दै राजीनामा माग गरिएको हो।
कोभिड १९ को महामारीका कारण देशव्यापी लकडाउन जारी रहेको र संसद नचलेका बेला प्रधानमन्त्री ओलीले दल फुटाउन सहज हुने अध्यादेश ल्याउनु अत्यन्त गैरजिम्मेवार, देशघाती, अराजनीतिक र अविवेकी कार्य भएकाले नैतिकताका आधारमा राजीनामा दिनुपर्ने पार्टीको माग छ।
‘झण्डै दुई तिहाई बहुमत हुँदाहुँदै आफ्नो र गुटको स्वार्थका लागि, सत्तामा टिकिरहन अन्य दल फुटाउने, सांसद किनबेच गर्ने र मुलुकलाई अस्थिरतामा धकेल्ने दुर्नियतका साथ ल्याइएको उक्त अध्यादेश विपक्षी दलहरु र आफ्नै पार्टीभित्रबाट चर्को विरोध भएपछि विरोधलाई थेग्न नसकेर बाध्य भई फिर्ता लिइनु सकारात्मक हो। तर प्रधानमन्त्रीको कदमको घोर विरोध एवं भत्र्सना गर्दछौं,’ समाजवादी पार्टीका रुपन्देही अध्यक्ष राम अवतार यादवद्वारा हस्ताक्षरित प्रेस विज्ञप्तिमा भनिएको छ, ‘प्रधानमन्त्री ओलीको सल्लाह र निर्देशनमा पूर्वप्रहरी प्रमुख र पार्टीका दुईजना सांसदलाई लकडाउनका बेलामा महोत्तरी पठाएर समाजवादी पार्टीका सांसद यादवको राजनीतिक अपहरण गरिनु र अपहरणमा संलग्न व्यक्तिमाथि प्रहरीले मुद्दा दर्ता नगर्नुले कानुनी राज्यको उपहास भएको छ। यी सबै घटनाक्रममा प्रधानमन्त्री ओली जोडिएकाले नैतिकताका आधारमा उहाँ पदमा रहिरहन मिल्दैन।’
सांसद यादवको अपहरणमा संलग्नमाथि कानुनी कारवाही गर्न समाजवादी पार्टीले माग गरेको छ। समाजवादी पार्टी र राष्ट्रिय जनता पार्टीबीच हालै भएकाे एकताले हिमाल, पहाड र तराईका सबै वर्ग, समुदायको पहिचान र अधिकार प्राप्तिका लागि भरपर्दो वैकल्पिक शक्ति निर्माण हुने विश्वास पलाएको विज्ञप्तिमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1700407943.jpg)
