समाचार

काठमाडौँमा अलपत्र दैलेखीको उद्धार

रासस आइतबार, वैशाख १४, २०७७ ०९:५८

दैलेख-लकडाउनमा काठमाडौँमा अलपत्र करिब ६ सय दैलेखीलाई उद्धार गरिएको छ। काठमाडौँमा अध्ययन गर्ने विद्यार्थी, उपचारका लागि गएका नागरिक र अन्य कामका सिलसिलामा गएका ११ वटै पालिकाका नागरिकको उद्धार भइरहेको नेकपाका केन्द्रीय सदस्य एवं विदेश विभाग उपप्रमुख विष्णु रिजालले जानकारी दिए।

नेकपा दैलेखका अध्यक्ष एवं सङ्घीय सांसद रवीन्द्र शर्माका अनुसार कोठाभाडामा बसेका विद्यार्थीलाई खाना समस्या र मजदूरको गुनासो पनि तीव्र भएपछि नेकपाका नेता, प्रदेशसभा सदस्य, सङ्घीय सांसद र दैलेखी सेवा समाज काठमाडौंँको पहलमा उद्धार सुरु गरिएको हो।

दैलेखका ११ वटै स्थानीय तहका मानिस काठमाडौँमा अलपत्र भएपछि यसको उद्धारका लागि विभिन्न व्यक्तिलाई जिम्मेवारी प्रदान गरिएको थियो। सोही आधारमा उद्धार गर्दा लागेको खर्च सम्बन्धित स्थानीय तहले तिर्ने सहमतिअनुसार गाडीमा ६ सयभन्दा बढी नागरिक शनिबारसम्म यहाँ ल्याइएको छ।

गुराँस गाउँपालिकाले देशभरि अलपत्र १६० नागरिकलाई उद्धार गरिएको जनाएको छ। काठमाडौँँका ३८, पर्वतमा ज्यालादारी काम गर्दै आएका १४, सुर्खेतमा अलपत्र परेका ४३ र अन्य विभिन्न स्थानमा रहेका १६० जनालाई ल्याइएको गाउँपालिकाका अध्यक्ष खेमराज ओलीले बताए।

दुल्लु नगरपालिकामा एक सय जना विभिन्न स्थानबाट आइसकेको बताइएको छ। ठाँटीकाँध गाउँपालिकामा ७० जना उद्धार गरेर ल्याइएको गाउँपालिका अध्यक्ष धीरबहादुर शाहीले जानकारी दिए। पालिकामा ७२ जनालाई क्वारेन्टाइनमा राखिएको छ।

दैलेखी समाजले लकडाउन अवधिभरि विभिन्न काममा आएर समस्यामा परेकालाई स्वास्थ्य सामग्रीलगायत राहत वितरण गर्दै आइरहेको अध्यक्ष प्रताप शाहीले बताए।

नारायण नगरपालिकाका ७३ जनालाई दुई बसमा सङ्घीय सांसद पार्वती बिशुन्केलगायतले जिल्ला पठाएका छन्। सवारी साधनको भाडा बैठक बसेर निर्णय गरिने नारायण नगरपालिका प्रमुख रत्नबहादुर खड्काले जानकारी दिए।

काठमाडौँमा रहेका दैलेखका नागरिकको उद्धारमा भैरवीका लागि नेकपाका केन्द्रीय सदस्य रिजाल, गुराँसका लागि टोपबहादुर बिसी, भगवतीमाई तथा डुंगेश्वरका लागि धर्मराज रेग्मी र हिक्मत थापा खटिएका थिए। यस्तै नारायणका लागि विशुन्के, महाबुका लागि रवीन्द्रराज शर्मा र नन्द विष्ट, नौमूलेका लागि नरबहादुर हमाल र प्रताप शाही, दुल्लुका लागि विनोदकुमार शाह, चामुण्डाका लागि शेरबहादुर रावत, ठाँटिकाँध तथा आठबीसका लागि सुस्मिता सिंह, राजबहादुर बुढा, तर्कबहादुर शाही उद्धार टोलीमा थिए।

नेता रिजालले सङ्कटका अवस्थामा राजधानीमा पढ्न गएका विद्यार्थी र अन्य कामको सिलसिलामा गएका मानिसलाई आफ्नै जिल्लामा पठाउन पाइएकामा सन्तोष व्यक्त गर्दै अन्यलाई पनि त्यस्तो सहयोगका लागि आग्रह गरे।रासस