इटहरी- बिपी कोइराला स्वास्थ्य विज्ञान प्रतिष्ठानले सय बेडको आइसोलेसन कक्ष तयार पारेको छ। कोरोना संक्रमितको उपचारको लागि भन्दै हाल पुनर्स्थापना केन्द्रको भवनलाई आइसोलेसन वार्ड बनाउन लागीएको हो। जसलाई कोभिड-१९ उपचार केन्द्रको रुपमा विकास गरिने भएको हो। केन्द्रमा १० बेडभन्दा बढी आइसियू रहने प्रतिष्ठानका उपकुलपति प्रा.डा.ज्ञानेन्द्र गिरीले बताए। यही वैशाख १२ देखि उपचार केन्द्र संचालनमा ल्याउने गरी तयारी थालिएको उनको भनाइ छ।
यसअघि प्रतिष्ठानभित्रै १० बेडको आइसोलेसन तयारी अवस्थामा छ। हाल शंकास्पद बिरामीहरुलाई कोरोना हेल्प डेस्कमा स्क्रिनिङ गर्ने र पेइङ वार्डलाई आइसोलेसन वार्डमा परिणत गरेर उपचार गराउने काम भइरहेको छ। उता माइक्रोबायोलोजी विभागले पिसिआर विधिबाट थ्रोट स्वाबको परीक्षण पनि गरिरहेको छ। प्रतिष्ठानको आकस्मिक कक्ष, बच्चाको आकस्मिक कक्ष र गाइनोबाट उपचार सेवा प्रवाह भइरहेको छ भने ओपिडी सेवाको काम ठप्प छ। कोरोना संक्रमितको लागि छुट्टै भवनबाट काम सुरु भएपछि रोकिएका विभागका कामहरु सुचारु हुने डा गिरीले बताए।
नवनियुक्त उपकुलपति प्रा.डा. गिरीले प्रतिष्ठानलाई प्रविधिमैत्री बनाउन लागिएको बताएका छन्। वैशाख १३ गतेभित्र अनलाइनबाट नै प्रतिष्ठानको विभिन्न सेवा प्रवाह गर्न मोबाइल एप्स पनि तयार भइरहेको उनले बताए। मोबाइल एप्स तयार भइरहको र केही दिनमै सेवा सुचारु हुने उनले जानकारी दिए। सेवा सुरु भएपछि प्रतिष्ठानमा पुर्जी काट्ने, बिल पेमेन्ट गर्ने र रिपोर्ट लिने काम अनलाइनबाटै हुने उनको दाबी छ।
हाल पुर्जी काट्ने र बिल तिर्ने ठाउँमा भिडभाड हुने गरेकोले यो व्यवस्था ल्याउन लागिएको हो। अनलाइन सेवा सञ्चालनमा आएपछि पुर्जी काट्न, बिल तिर्न र ल्याब रिपोर्ट लिन घण्टौं लाइनमा बस्नुपर्ने बाध्यता हट्ने प्रतिष्ठान प्रशासनको बुझाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1738557849.jpg)
-1764146706.png)
