काठमाडौं–जर्मन एसयुभी ब्रान्ड बगवार्डका सवारी अब नेपाली सडकमा गुड्ने तय भएको छ। मलेसियाका लागि बगवार्डको क्षेत्रीय उत्पादक तथा वितरक एसेम्ब्लर गो ब्रिमेन मोटर्सले बगवार्डको पहिलो ब्याच नेपाल पठाएको हो। यसका लागि कम्पनीले डिएसएम ग्लोबललाई नेपालका लागि आफ्नो डिलर नियुक्त गरेको थियो।
एसेम्ब्लरले डिएसएम ग्लोबललाई करिब एक वर्षअघि आधिकारिक बिक्रेता नियुक्त गरेको भए पनि पहिलो लटका गाडी भने अघिल्लो सातामात्र पठाएको हो।
‘काठमाडौंमा रहेको डिएसएम ग्लोबलसँग आबद्ध हुन पाउँदा हामी गर्व महसुस गरिरहेका छौं। हामीले डिएसएम ग्लोबललाई नेपालमा बगवार्ड अटोमोबाइलको सेल्स, सर्भिस, स्पेयर्स र एसेसोरिजको आयात तथा प्रबर्द्धन तथा विक्रीवितरणका लागि नियुक्त गरेका छौं,’ गो ब्रिमेन मोटर्सले उसको वेबसाइटमा भनेको छ,‘हामीलाई विश्वास छ, अटो क्षेत्रमा दुई दशकको अनुभव भएको डिएसएम ग्लोबलले आफ्टर सेल्सलाई पनि उत्तिकै प्राथमिकतामा राख्नेछ।’
गो ब्रिमेन मोटर्स मलेसिया र आसपासको क्षेत्रका लागि बगवार्ड ग्रुप एजी (जर्मनी र चीन)को उत्पादन तथा वितरण पार्टनर हो। गो ब्रिमेन मोटर्सले मलेसियाको केदाहमा बगवार्ड अटोमोबाइलको एसेम्बल प्लान्ट सञ्चालन गर्दै आएको छ भने उसले म्यान्मार, श्रीलंका, बंगलादेश, मरिसस र अन्य मुलुकमा बगवार्ड ब्रान्डका एसयुभी निर्यात गर्दै आएको छ।
बगवार्डको उदय र स्वर्णयुग
सन् १९१९ मा जर्मनीको ब्रिमेनमा कार्ल एफ डब्लु बगवार्डले स्थापना गरेको बगवार्ड जर्मनीको तेस्रो ठूलो अटोमोबाइल निर्माता र निर्यातकर्ता हो। यसको नवीनतम प्रविधि र डिजाइनका कारण यो ब्रान्ड युरोप, उत्तर अमेरिका, दक्षिण अमेरिका र एसियासहित विश्वमै फैलिएको छ। निरन्तर नवीनतम प्रविधिप्रति प्रतिबद्ध बगवार्डको लाइनअपमा सेडान, रेस कार, बस, वारुणयन्त्र, जहाज र हेलिकप्टरको समेत उत्पादन गर्छ। हाल भने कम्पनीले आफ्नो ध्यान एसयुभीमा केन्द्रित छ।
सन् १९४९ मा बगवार्डले हान्सा–१५०० सार्वजनिक गरेको थियो। युरोपकै पहिलो पोन्टुन–स्टाइल बडी डिजाइन रहेको यो गाडीले जर्मनीमा आर्थिक पुनर्जीवन दिएको बताइन्छ। त्यसैगरी, विश्वव्यापी रुपमा ड्रिम कार बन्न सफल बगवार्ड इसाबेलाको आगमन सन् १९५४ मा भयो। त्यसैगरी, १९५९ मा बगवार्डले पी–१०० बजारमा ल्याएको थियो जुन ‘सिट–न्युम्याटिक सस्पेन्सन’ सहितको पहिलो लक्जरी फेमिली सेडान हो।
त्यसपछि रेसिङ ट्रयाकमा बगवार्डले आफ्नो उपस्थिति देखाउन थाल्यो। सन् १९५५ देखि १९५८ सम्ममा बगवार्डले चर्चित २४ ह्युरिस ड्यु म्यान्स, नुर्बुरिङ १००० किमी, ला क्यारेरा पानामेरिकाना र एल’अटोड्रम डि मोन्टिहेरी जस्ता टाइटल जित्नुका साथै ५१ वटा विश्व रेकर्ड कायम गरेको थियो। बगवार्डले कमन रेल डाइरेक्ट इग्निसन (सीआरडीआई) प्रविधिको आविष्कार गर्नुका साथै युरोपमै पहिलो पटक अटोम्याटिक गियर ट्रान्समिसन भित्र्याएको थियो।
बगवार्डको वर्तमान
सन् २००८ मा यो कम्पनीको पुनःस्थापना बगवार्ड ग्रुप एक्जिामाका रुपमा भयो र जर्मन डिजाइन तथा इन्जिनियरिङमा पारम्परिक एसयुभी निर्माण थाल्यो। अहिले यसमा चीन र जर्मनीको आधा–आधा लगानी छ। अर्को दशकमा विश्वकै नेतृत्वदायी विद्युतीय गाडी निर्माताका रुपमा विस्तार हुने उसको लक्ष्य छ। उसले बीएक्सआई–७ र जिटी एसयुभी बीएक्स–६ जस्ता इलेक्ट्रिक गाडी सार्वजनिक गरिसकेको छ। बगवार्डले २०१९ देखि लगातार डाकार र्यालीमा सहभागिता जनाउँदै आएको छ।
सन् १९१९ मा जर्मनीमा स्थापना भएको बगवार्डसँग चीन र ब्रिमेन स्टुटगार्ट जर्मनीमा म्यानुफ्याक्चरिङ प्लान्ट छन्। बगवार्डले ‘बि-जि-डब्लु’ नीति अबलम्बन गर्दै आएको छ जसको पूर्ण रुप ‘ब्रान्ड हेरिटेज’ (ब्रान्ड सम्पदा), जर्मन इन्जिनियरिङ र ‘वर्ल्डवाइड डिस्ट्रिब्युसन’ (विश्वव्यापी वितरण) हो। यो नीतिबाट निर्मित कुशल, गुणस्तरीय एसयुभीहरुले बगवार्ड ब्रान्डलाई जर्मनी र युरोपमा मात्र उठाउने छैन बरु एसिया, मध्यपूर्व र दक्षिण अमेरिकामा पनि उपस्थितिलाई बढाउने विश्वास कम्पनीको छ। हाल बगवार्ड लाइनअपमा बिएक्स-३, बिएक्-५, बिएक्स-६, बिएक्स-७, बिएक्स-७ आईटिएस (इलेक्ट्रिक) र बिएक्सटिएस–७ लिमिटेड एडिसन रहेका छन्। यसको तुलना जर्मन ब्रान्ड उडी, बिएमडब्लु र मर्सिडिजसँग हुने गर्छ।
पहिलो चरणमा आउँदैछ बगवार्ड बिएक्स-५
डिएसएम ग्लोबलले पहिलो चरणमा बगवार्ड बिएक्स–५ नेपाल ल्याउँदै छ। बिएक्स(५ दुई वटा पावरट्रेन अप्सनमा उपलब्ध छ।
४.४ मिटर लामो, १.८ मिटर चौडा र १।६ मिटर अग्लो यो फाइभ–सिटर एसयुभीमा १.४ लिटरको फोर सिलिन्डर टर्बो इन्जिन रहेको छ। जसले ५ हजार ५ सय आरपिएममा १ सय ५० पिएस पावर र ४ हजार ५ सय आरपिएममा २ सय ५० एनएम टर्क उत्पादन गर्छ। त्यस्तै अर्को २.० लिटर टर्बो इन्जिनले ५ सय ५ सय आरपिएममा २ सय २४ पिएस र ४ हजार ५ सय आरपिएममा ३ सय एनएम टर्क उत्पन्न गर्छ।
दुवै इन्जिनमा ६ स्पिड अटोमेटिक ट्रान्समिसन छ भने २।० लिटर इन्जिन अल ह्विल ड्राइभमा उपलब्ध छ।
यसमा एसईडी डिआरएलसहितका अटोमेटिक हेलोजिन हेडल्याम्प, एलईडी टेललाइट, किलेस इन्जिन, ८ इन्चको टचस्क्रिन इन्फोटेनमेन्ट सिस्ट, डुअलजोन एअर कन्डिसनिङ, ४.२ इन्चको इन्स्ट्रयुमेन्ट क्लस्टर डिस्प्ले र क्र्युज कन्ट्रोल रहेका छन्।
दुवै भेरियन्टमा ६ वटा एयरब्याग, भेहिकल स्ट्याबिलिटी कन्ट्रोल, एबिएस, इबिडी, ब्रेक असिस्ट, इलेक्ट्रोनिक पार्किङ ब्रेक, टायर प्रेसर मनिटरिङ सिस्टम, हिल स्टार्ट असिस्ट र इलेक्ट्रोनिक डिफेरेन्सियल सिस्टम र हिल डिसेन्ट कन्ट्रोल रहेका छन्।
यी एसयुभीको नेपाली बजार मूल्य भने कम्पनीले खुलाइसकेको छैन। सवारी आउने क्रममा रहेकाले नेपाल भित्रिएपछि मात्र मूल्य यकिन हुने कम्पनीले जनाएको छ। तर पनि यी एसयुभीको मूल्य करिब ८० लाख रूपैयाँ पर्ने अनुमान गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787643624.jpg)
-1786602170.png)
-1786513116.png)
