काठमाडौ–भक्तपुर नगरपालिकाले गरिब, विपन्न र ज्यालामजदूरी गर्ने परिवारलाई घरघरमै पुगेर राहत उपलब्ध गराएको छ। लकडाउनपछि दैनिक जीवन चलाउन कठिन भएपछि भक्तपुर नगरपालिकाले सम्बन्धित व्यक्तिकै घरमा पुगेर राहत उपलब्ध गराएको हो।
पहिलो चरणमा नगरपालिकाभित्रका १० वटै वडाका २ हजार ६ सय ५३ जनालाई राहत उपलब्ध गराईसकेको भक्तपुर नगरपालिकाका मेयर सुनील प्रजापतिले बताए। नगरपालिकाले आफ्नै गाडीमा सम्बन्धित व्यक्तिसम्म राहत उपलब्ध गराएको छ। पहिलो चरणको राहत वितरण कार्य सकिएकाले आवश्यक परेमात्रै दोस्रो चरणको राहत दिइने प्रजापतिले बताए।
नगरपालिकाले राहत उपलब्ध गराउँदा आफ्नै खालको मापदण्ड बनाएको छ। ‘हामीले बनाएको मापदण्डमा सम्बन्धित व्यक्तिको बैंक र सहकारीमा पैसा नभएको र घरमा अन्न नभएको हुनुपर्ने बनाएका थियौं,’ प्रजापतिले भने, ‘राहत पाउने व्यक्तिले आफ्नो सबै विवरण भरेपछि घरबेटीले समेत प्रमाणित गरेपछि मात्रै राहत दियौं ।’ राहत वितरणलाई व्यवस्थित बनाएपछि कतिपय फाराम भएका व्यक्तिसमेत लिन नआएको प्रजापतिले बताए।
राहतमा २ जनासम्म परिवार हुनेलाई १० किलो चामल दिइएको छ भने २ भन्दा धेरै हुने परिवारलाई २० किलो चामल उपलब्ध गराइएको छ। अरु राहतमा १ किलो दाल, एक किलो नुन,आधा लिटर तेल र साबुन उपलब्ध दिइएको छ।
टोल–टोलमा पानी ट्याङकी र साबुन
आम उपभोक्ताका लागि लक्षित गर्दै नगरपालिकाले टोल–टोलमा पानी ट्यांकी र साबुनको व्यवस्था गरेको छ। लकडाउनपछि दैनिक उपभोग्य सामाग्री खरिद गर्न आउने क्षेत्रमा पानी ट्याक्की र साबुन राखिएको छ। नगरपालिकाका करिब १२ स्थानमा ट्याकी र साबुनको व्यवस्था गरिएको प्रजापतिले बताए। साबुन पानीले नियमित हात धुँदा कोरोना भाईरसको जोखिम कम हुने भएकाले सबैको घरमा एक–एक वटा साबुनसमेत उपलब्ध गराइएको छ।
यस्तै स्वास्थ्य उपचार,दैनिक उपभोग्य सामग्री खरिद गर्न बजार जानु पर्ने भएकाले नगरपालिकाले २० हजार जनालाई सवारी पास उपलब्ध गराएको छ। किसानलाई तरकारी बिक्री गर्नका लागि बिहान ५ बजेदेखि ८ बजेसम्म र वेलुका ५ बजेदेखि ७ बजेसम्म खुला गर्ने निर्णय गरेको छ। तरकारी खरिदका लागि निश्चित स्पटको व्यवस्था गरिएको छ । त्यहाँ गएर किसानले बिक्री गर्ने र उपभोक्ताले खरिद गरेर ल्याउने प्रबन्ध गरिएको छ ।
लकडाउनको पालना गराउन स्वयंसेवक
लकडाउनका बेला अनावश्यक रुपमा सर्वसाधारण बाहिर आउन सक्ने भएकाले नगरपालिकाले स्वयंसेवक खटाएको छ। प्रहरीलाई नै सहयोग गर्नेगरी नगरपालिकाका प्रतिनिधि र पार्टीका कार्यकर्तालाई स्वयंसेवकका रुपमा खटाएको छ। नगरपालिकाभित्र ५०–५० जना स्वयंसेवक खटाएर लकडाउनको पालना गराउनुका साथै कोरोना भाईरसबारे जनचेतना फैलाउने गरेको प्रजापतिले बताए। ‘अहिले विस्केट जात्राको समय हो। यो बेला हजारौ हजारको संख्यामा मान्छे जम्मा भएर जात्रा मनाउने गर्थे,’ प्रजापतिले भने, ‘यो बेला मान्छेहरु निस्केर जात्रामा जान नपाउन् भनेर स्वयंसेवकले कडाइ गरेका छन्।’ यस्तै कोरोना संक्रमण फैलिएमा उपचार गर्ने अस्पतालको प्रबन्ध र एम्बुलेन्सलाई तयारी अवस्थामा राखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
