कोरोना अपडेट

तिलोत्तमामा राहत संकलन गर्न ‘खाद्य बैंक’

दीपक घिमिरे बिहीबार, वैशाख ४, २०७७ ०७:०५

भैरहवा–लकडाउनका कारण खाद्यान्न संकट भोगेका परिवारलाई राहत दिन रुपन्देहीको तिलोत्तमा नगरपालिकामा ‘खाद्य बैंक’ स्थापना गरिएको छ। उद्योगी, व्यवसायी, नगरबासी, सहयोगी जो कसैले स्वेच्छिक रूपमा खाद्य सामग्री जम्मा गर्न सक्ने गरी खाद्य बैंकको अवधारणा ल्याइएको हो। नगरपालिकाले यसअघि नैं नगद संकलनका लागि बैंक खाता खोलेको थियो।

खाद्य बैंकमा दाताहरुले चामल, दाल, नुन, तेल सङ्कलन गर्न सक्ने नगर प्रमुख बासुदेव घिमिरेले जानकारी दिए। खाद्य बैंकको प्रधान कार्यालय नगरपालिकाको कार्यालयमा रहेको छ भने शाखा कार्यालयको रुपमा वडा कार्यालयहरु रहेका छन्।

कोरोना महामारीको कारण गरिएको लकडाउनबाट प्रभावित परिवारलाई गरिने खाद्य सहयोग कार्यक्रममा सहभागिता जनाउन चाहनेहरुले आ–आफ्नो वडा वा नगरपालिका कार्यालयमा खाद्यान्न सहयोग गर्न सक्नेछन्।

राहत कोषमा सहयोग गर्न चाहने कुनै व्यक्तिसँग नगद रकम नहुने तर जिन्सी खाद्यवस्तु हुन सक्ने भएकाले उनीहरुको सहयोगलाई एकीकृत गर्न खाद्य बैंकको अवधारणा ल्याइएको नगर उपप्रमुख एवं खाद्य व्यवस्थापन समिति संयोजक जागेश्वरी चौधरीले बताइन्।

खाद्य बैंकमा संकलन भएको खाद्यवस्तु आवश्यकता र औचित्यका आधारमा टोल विकास संस्थामार्फत् खाद्य अभाव भएका परिवारलाई वितरण गरिनेछ। सरकारले लिएको राहत वितरणका लागि एकद्वार नीतिमा नगरवासीका साथै सहयोगी सबैलाई सामेल गराउन यो अवधारणाले सहयोग पु¥याउने नगर प्रमुख घिमिरेको भनाइ छ।

खाद्य बैंकको अवधारणाले चामल पर्याप्त मात्रामा संकलन हुने नगरपालिकाको अपेक्षा छ । तिलोत्तमाका अधिकांश स्थायी बासिन्दाले आफूलाई वर्षभरि चाहिने चामल अग्रिम जोहो गरेका हुन्छन्। यहाँ झण्डै ६० प्रतिशत जग्गामा खेती हुने गर्छ। न्यून आय भएका परिवार तथा सबै प्रकारका मजदूरलाई प्राथमिकतामा राखी राहत दिन खाद्य बैंकले टेवा पु¥याउने नगरपालिकाको विश्वास छ।