कोरोना अपडेट

दुई जनामा संक्रमण देखिएपछि सप्तरीका दुई स्थानीय तह सिल

दिनेश शर्मा बुधबार, वैशाख ३, २०७७ १२:०४

राजविराज–र्‍यापिड डाइग्नोस्टिक टेस्ट (आरडीटी) का क्रममा दुई जनामा कोरोना संक्रमण देखिएपछि सप्तरीका दुई स्थानीय तह सिल गरिएको छ ।

जिल्ला सुरक्षा समितिको निर्णय अनुसार जिल्लाको खडक नगरपालिका र तिलाठी कोईलाडि गाउँपालिका सिल गरिएको जिल्ला प्रशासन कार्यालय सप्तरीले जनाएको छ। दुवै स्थानीय तहमा आवतजावत बन्द गरिएको जिल्ला प्रशासन कार्यालय सप्तरीका प्रशासकीय अधिकृत आनन्द ठाकुरले बताए।

‘त्यहाँका मान्छे बाहिर निस्कन नपाउने र बाहिरका मान्छे भित्र पस्न नपाउने निर्णय भएको छ’ उनले भने, ‘तर, अत्यावश्यक अवस्था आए स्थानीय स्तरमा खटिएका सुरक्षाकर्मीको समन्वयमा आवश्यक निर्णय गर्न सकिने छ ।’

गजेन्द्रनारायण सिंह अस्पताल राजविराजमा मंगलबार र्‍यापिड टेस्ट गर्दा खडक नगरपालिका ११ का ५१ वर्षीय र तिलाठी कोईलाडि गाउँपालिका १ का ५४ वर्षीय पुरुषमा कोराना पोजेटिभ देखिएको थियो। उनीहरुलाई अस्पतालको आईसोलेसनमा राखिएको छ । ७ जनामध्ये २ जनाको रिपोर्ट पोजेटिभ आएलगत्तै सुरक्षा समितिले दुवै ठाउँलाई सिल गर्ने निर्णय गरेको हो।

सात जनाकै स्वाबको नमुना संकलन गरी परीक्षण गर्न मंगलबारै धरानस्थित बिपी कोईराला स्वास्थ्य विज्ञान प्रतिष्ठान पठाइएको छ। उनीहरुको परिवारका सदस्यलाई होम क्वारेन्टाईनमा राखि निगरानी गर्न थालिएको प्रशासकीय अधिकृत ठाकुरले जानकारी दिए। ‘दुई जनामा कोरोनाको संक्रमण देखिएपछि हामीले उनीहरुको सम्पर्कमा आएकाहरुलाई पनि क्वारेन्टाईनमा राख्ने योजना वनाएका छौं’ उनले भने,‘कन्ट्याक टेसिङ्गको प्रकृया सुरु भएको छ।’

यसैगरी, दिल्लीको निजामुद्दीनस्थित तबलिगी जमातमा सहभागी भएका तथा भारत र अन्य मुलुकबाट हालै नेपाल फर्किएकाहरुको समेत स्थानीय प्रशासनले खोजी गरिरहेको छ। शंकास्पद ब्यक्तिलाई १४ दिन क्वारेन्टाईनमा राखेरमात्रै छाड्ने गरिएको ठाकुरले जानकारी दिए। वुधबार दिउँसोसम्म ५ महिलासहित २४७ जनालाई सप्तरीका विभिन्न क्वारेन्टाईनमा राखिएको उनले बताए। १४ दिन क्वारेन्टाईनमा वसेर फर्केकाहरुको संख्या पनि अझ धेरै रहेको ठाकुरको भनाइ छ।

प्रहरीले मंगलबारमात्रै जिल्लाका विभिन्न स्थानबाट ३५ जनालाई नियन्त्रणमा लिएर क्वारेन्टाइनमा पठाएको छ। दिल्लीको तबलिगी जमातमा सहभागी भएर फर्केका आठ जनालाई डिमनवाट ८ र खडक नगरपालिकाबाट २७ जनालाई प्रहरीले नियन्त्रणमा लिएर क्वारेन्टाईनमा राखिएको जिल्ला प्रहरी कार्यालय सप्तरीले जनाएको छ।

१० जनाको आरडिटि गरिदै

सप्तरीमा कोरोनाको आशंका गरिएका थप १० जनाको आरडिटि टेस्ट गर्ने तयारी गरिएको छ । टेस्टका लागि दुई जना अस्पतालमा आईसकेको र राजविराज माछा हटियाका ८ जना टेस्टका लागि आउँदै गरेकाले १० जनाको आरडिटि गरिने अस्पतालका प्रमुख मेडिकल सुपरिटेन्डेन्ट चुमनलाल दासले जानकारी दिए ।

हालसम्म जिल्लाका १२ जनाको आरडिटि गरिएको र १७ जनाको स्वाबको नमुना संकलन गरी परीक्षण गर्न धरान पठाईएको उनले वताए । जसमध्ये मंगलबार पठाईएका ७ जनाको रिपोर्ट आउन वाँकी छ ।