अनावश्यक रेफरले बिपी प्रतिष्ठानमा बिरामीको चाप बढ्यो, डाक्टर भन्छन्- कोरोना फैलने सम्भावना बढ्यो

कोरोना अपडेट

विनय बाह्रकोटी बिहीबार, चैत २७, २०७६ १९:०८

इटहरी- कोरोना भाइरस (कोभिड १९) को संक्रमण नेपाल भित्रिएसँगै धेरै निजी अस्पताल बन्द भए। खुल्ला भएका अस्पतालले पनि अनावश्यक रेफर गरेर बिरामीको उपस्थिति घटाइरहेका छन्। सामान्य रोगका बिरामी समेत रेफर हुँदा धरानको बिपी कोइराला स्वास्थ्य विज्ञान प्रतिष्ठानमा बिरामीको चापसँगै कोरोना संक्रमणको जाखिम बढेको छ।

कोभिड-१९ संक्रमण फैलिन नदिन सरकारले सामाजिक दूरी कायम गर्नु भनेपनि प्रतिष्ठानमा बिरामी र बिरामी कुरुवाको अत्याधिक भिड बढिरहेको छ एक सातादेखि प्रतिष्ठानमा कोरोना परीक्षण गर्ने काम सुरु गरिएको छ। यसले गर्दा कोरोना संक्रमण फैलिन सक्ने भन्दै प्रतिष्ठानका डाक्टरहरुले चिन्ता व्यक्त गरेका छन्।

मौसमी रुघाखोकीदेखि सामान्य डेलीभरीका बिरामीसमेत रेफर हुने क्रम बढेसँगै व्यवस्थापनमा समस्या देखिन थालेको प्रतिष्ठानका निर्देशक डा. गौरीशंकर शाह बताउँछन्। सोही विषयमा शाहले यही चैत २४ गते सोमबार अनावश्यक रेफर रोक्न भन्दै प्रदेश १ समाजिक विकास मन्त्रालयमा पत्र नै पठाएका छन्। प्रदेश १ र २ का विभिन्न जिल्लाका निजी तथा सरकारी अस्पतालबाट सोही अस्पतालमा उपचार हुने बिरामी रेफर गरिएकोबारे पत्रमा ध्यानाकर्षण गराइएको छ।

सो पत्रमा अत्यधिक भिडभाडले गर्दा विश्वव्यापी महामारीको रुपमा फैलिएको कोभिड-१९ को संक्रमण बढ्न सक्ने भन्दै अनावश्यक रेफर रोक्न आग्रह गरिएको छ। साथै बिरामी रेफर गर्दा किन र के कारणले रेफर गर्नुपरेको हो भनी स्पष्ट खुलाएरमात्र रेफर गर्न सरकारले निर्देशन दिनुपर्ने पत्रमा उल्लेख गरिएको छ।

प्रतिष्ठानकै सहप्रवक्ता डा अशोक ऐरका अनुसार प्रदेश १ का विभिन्न क्षमतावान अस्पतालबाट सामान्य बिरामी समेत रेफर हुने गरेका छन्। जसको कारण प्रतिष्ठानमा कोरोना संक्रमणको जोखिम बढ्ने र अस्पतालमा उपलब्ध पिपिईलगायत सामान छिट्टै सकिने सम्भावना रहेको उनले बताए।

त्यस्तै स्त्री तथा प्रसुती रोग विशेषज्ञ डा एस. पी. रिमालका अनुसार आमा सुरक्षा कार्यक्रम लागू गरेका निजी तथा सरकारी अस्पतालसमेत बिरामीको अवस्था नबुझी रेफर गर्ने गरेका छन्। वडा स्तरका जनप्रतिनिधिदेखि प्राथमिक स्वास्थ्य केन्द्रले समेत यस विषयमा ध्यान दिनुपर्ने उनको भनाइ छ। धेरै भिडभाडमा कोरोना संक्रमण फैलने भएकोले सामान्य बिरामी भएको अवस्थामा प्रतिष्ठान नआउने उनले सुझाएका छन्।