एजेन्सी- अमेरिकी राष्ट्रपति डोनाल्ड ट्रम्पले विश्व स्वास्थ्य संगठन (डब्लुएचओ)लाई अमेरिकाले गर्दै आएको सहयोग रोक्न सक्ने चेतावनी दिएका छन्। मंगलबार ट्रम्पले विश्व स्वास्थ्य संगठन (डब्लूएचओ)ले कोरोना भाइरसको महामारीको विषयमा सही तथ्य बाहिर नल्याएको दाबी गर्दै संगठनलाई दिइने भनिएको सहयोग रद्द गर्ने चेतावनी दिएका हुन्।
ट्रम्पको उक्त वक्तव्यलाई लिएर संयुक्त राष्ट्रसंघले भने आपत्ति जनाएको छ। राष्ट्रसंघले विश्व स्वास्थ्य संगठनले आफ्नो अधिकारको सदुपयोग गर्दै आफूले सकेको गरिरहेको भन्दै ट्रम्पको अभिव्यक्तिप्रति आपत्ति जनाएको हो।
अमेरिकी राष्ट्रपति ट्रम्पले संगठनलाई पूर्वाग्रही भएको र कोरोनासँग सम्बन्धित चीनको डाटा लुकाउनलाई सहयोग गरेको आरोप लगाएका थिए। कोरोना संक्रमणबाट अहिले विश्वमा ८२ हजारभन्दा बढी मानिसको मृत्यु भइसकेको छ भने १४ लाखभन्दा बढी मानिस संक्रमित भएका छन्।
यसै सन्दर्भमा राष्ट्रपति ट्रम्पका सहयोगीले पनि विश्व स्वास्थ्य संगठनको विरोध गरिरहेका छन्। ट्रम्पका नजिकका सहयोगी रिपब्लिकन सिनेटर लिन्ड्से ग्रहमले पनि ट्रम्पको कुरोमा सहमत जनाउँदै संगठनलाई दिइने सहयोग रद्द हुनुपर्नेमा जोड दिए।
‘म विश्व स्वास्थ्य संगठनलाई गरिने सहयोगको विपक्षमा छु। संगठनले कोरोना भाइरसको सन्दर्भमा भ्रामक समाचारहरू बाहिर ल्याइरह्यो‚ सँधै नै चीनको कोरोना भाइरससम्बन्धी सही डाटा बाहिर ल्याउन चाहेन।’ फक्स न्यूजलाई दिइएको अन्तर्वार्तामा ग्रहमले भने।
गत साता रिपब्लिकन सिनेटरले मार्को र्युबियोले पनि विश्व स्वास्थ्य संगठनका नर्देशक टेड्रोस अधनम घ्रेब्रेयेससको राजीनामाको माग गरेका थिए। उनले भनेका थिए‚ ‘टेड्रोसले बेइजिङलाई विश्व स्वास्थ्य संगठन सुम्पिए‚ जसले विश्व नै दिग्भ्रमित भएको छ।’
संयुक्त राष्ट्रसंघका प्रवक्ता स्टेफेन डुजारिकले भने अमेरिकी राष्ट्रपति ट्रम्पको अभिव्यक्तिको खण्डन गरेका छन्।
‘डा टेड्रोसको नेतृत्वमा कोभिड-१९ सम्बन्धी विभिन्न देशहरूलाई सहयोग गर्नेदेखि विभिन्न स्वास्थ्य सामग्री उपलब्ध गराउने कार्यमा विश्व स्वास्थ्य संगठनले एकदमै राम्रो र विश्वसनीय काम गरेकोप्रति कुनै शङ्का छैन। उसले विभिन्न देशमा कोरोनासम्बन्धी विभिन्न तालिमहरू दिनेदेखि ग्लोबल गाइडलाइनसम्मको काम गरिरहेको छ। संगठनले आफ्नो क्षमताले भ्याएसम्म गरिरहेको छ‚’ उनले पत्रकारहरूसँग भने‚ ‘संगठनले केही दिन समयअघिमात्रै डेमोक्र्याटिक रिपब्लिक अफ कङ्गोमा आफ्ना स्टाफहरूलाई फ्रन्टलाइनमा राखेर इबोलाजस्तो डरलाग्दो रोगविरुद्धको अभियानमा सफलता पाएको थियो।’
विश्व स्वास्थ्य संगठनले कोरोना भाइरसको नियन्त्रणका लागि चीनले जे-जस्तो कदम उठायो उक्त कदमको प्रशंसा गरेको थियो। चिनियाँ सरकारले बाहिर ल्याएको डाटाभन्दा बढी संख्यामा कोरोना संक्रमणबाट मानिसको मृत्यु भएको विभिन्न तथ्य पनि आइरहेका छन्।
‘उनीहरूलाई थाहा हुनुपर्ने हो। शायद संगठनलाई यस विषयमा थाहा थियो पनि‚’ ट्रम्पले विश्व स्वास्थ्य संगठनलाई इङ्गित गर्दै भने।
अमेरिकाले विश्व स्वास्थ्य संगठनलाई सहयोग गरेको साढे १२ करोड अमेरिकी डलरमध्ये साढे ५ करोड रकम रद्द गर्ने घोषणा गरेको छ। कोरोना भाइरसम्बन्धी कार्यमा संगठनलाई दोष लगाउनु उचित नभएको भन्दै सेन्टर फर ग्लोबल डेभलपमेन्टका सिनियर पोलिसी फेलो जेरेमी कोनिन्डिकले भने‚ ‘सामान्यतः मलाई जहाँसम्म लाग्छ‚ कोरोना भाइरसको सन्दर्भमा विश्व स्वास्थ्य संगठनलाई अमेरिकी प्रशासनको भन्दा बढी नै जानकारी छ। त्यसकारणले यस विषयमा विश्व स्वास्थ्य संगठनलाई दोष लगाउनु उचित हुँदैन।’
बोर्डर बन्द गर्ने र यातायातमा प्रतिबन्ध लगाउने विषयमा संगठनले हालसम्म केही भनेको छैन। यद्यपि अमेरिकालगायतका देशहरूले यी सबै कार्य गर्दै आएका छन्।
अफ्रिकन यूनियनका प्रमुख मौसा फकिमहमतले अमेरिकी राष्ट्रपति ट्रम्पले विश्व स्वास्थ्य संगठनप्रति पोखेको आक्रोशप्रति चिन्ता प्रकट गरेका छन्।
‘अमेरिकी सरकारले विश्व स्वास्थ्य संगठनको वैश्विक नेतृत्वको विरुद्धमा चलाएको अभियानले अचम्म तुल्याएको छ‚’ उनले ट्वीट गर्दै भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791692981.webp)
-1786602170.png)
