काठमाडौं– कोरोना भाइरस (कोभिड–१९)को संक्रमण विश्वव्यापी भइरहेका बेला विभिन्न देशमा रहेका नेपालीको सुरक्षाबारे परराष्ट्र मन्त्रालयले चासो लिएको छ। मन्त्रालयले विभिन्न क्षेत्रमा रहेका नेपाली कूटनीतिक नियोगका प्रमुखहरुसँग ‘भिडियो कन्फ्रेन्स’मार्फत् छलफल गर्दै त्यहाँ रहेका नेपालीको अवस्थाबारे जानकारी लिने थालेको हाे।
श्रम, रोजगार तथा सामाजिक सुरक्षामन्त्री रामेश्वर राय यादवको उपस्थितिमा परराष्ट्रमन्त्री प्रदीप ज्ञवालीले सोमबार मध्यपूर्व तथा अफ्रिकास्थित नेपाली नियोगका प्रमुखहरूसँग छलफल गरेका थिए। बुधबार पनि मन्त्री ज्ञवालीले श्रम मन्त्रीसहित इजराइल, दक्षिण अफ्रिका, मलेसिया, जापान, दक्षिण कोरियामा रहेका नेपाली नियोग प्रमुखसँग भिडियो कन्फ्रेन्समार्फत छलफल गरेका हुन्।
आजको छलफलमा ती देशमा कुनै पनि नेपालीलाई कोरोना संक्रमण नभएको नेपाली राजदूत तथा नियोग प्रमुखहरुले जानकारी दिएका थिए।
संक्रमित भइहालेको अवस्थामा पनि विश्व स्वास्थ्य संगठनको मापदण्डअनुसार नै त्यहाँ नेपालीहरुलाई उपचारमा विभेद नभएको जानकारी उनीहरुले गराएको परराष्ट्रमन्त्रीका प्रेस सल्लाहाकार सुधन ज्ञवालीले जानकारी दिए।
राजदूतहरुसँगको छलफलपछि मन्त्री ज्ञवालीले अप्ठ्यारो परेका बेला अभिभावक साथमै रहेको छ भन्ने महसुस गराउन निर्देशन दिएका थिए। ‘नेपालीहरुलाई परेको हरेक अप्ठ्यारोमा हाम्रो अभिभावक, देशको प्रतिनिधि यहाँ छ भन्ने महसुस हुने गरी काम गर्न भनेर मन्त्रीज्यूले त्यहाँका कूटनीतिक नियोग प्रमुखहरुलाई निर्देशन दिनुभयो,’ ज्ञवालीले नेपाल लाइभसँग भने।
त्यस्तै नेपाली दूतावास, त्यहाँका कर्मचारीहरुलाई २४ घण्टा हटलाइनमा बस्न, नेपालीहरुले खोजेको बेलामा तत्कालै उपलब्ध हुन र कुनै नेपालीलाई केही अप्ठ्यारो भयो भने कहाँ, कसरी सेटल गर्न सकिन्छ त्यो व्यवस्था मिलाउन पनि निर्देशन दिइएको परराष्ट्र मन्त्रालयले जानकारी दिएको छ।
भिडियो कन्फ्रेन्समा राजूतहरुले नेपालीहरु घर फर्किन खोज्ने र भिसाको समयअवधि सकिने समस्या रहेको मन्त्रीलाई जानकारी गराएका थिए। यसबारे मन्त्री ज्ञवालीको के निर्देशन थियो भन्ने बारे प्रेस सल्लाहाकार ज्ञवालीले भने, ‘नेपालीहरुको गुनासो भनेको घर आउने हो, त्यो अवस्था अहिले छैन। भिसाको समस्या भएकालाई हामीले ती देशसँग अनुरोध गरेर भिसा अवधि थप्ने पहल गर्ने, नेपालमा पनि कुनै देशका नागरिक अलपत्र पर्ने वा उनीहरुलाई भिसाको समस्या हामीले पर्न दिएका छैनौं। त्यही हिसाबले त्यहाँ हुने हाम्रा नागरिकलाई पनि अप्ठ्यारो नहोस् भनेर ती देशसँग समन्वय गर्न पनि मन्त्रीज्यूले निर्देशन दिनुभयो।’
सोमबार मध्यपूर्व र अफ्रिकामा रहेका १० नेपाली दूतावासका राजदूतहरुलाई परराष्ट्रमन्त्री र श्रममन्त्रीले नेपाल सरकारले संक्रमण नियन्त्रणका लागि चालेका कदमहरूको बारेमा जानकारी दिँदै नियोग प्रमुखहरुलाई आफू प्रमाणीकृत मुलुकहरुमा भएका संक्रमणसम्बन्धी नियमित रूपमा प्रतिवेदन गर्ने, नेपालीहरुको स्वास्थ्य, सुरक्षा तथा रोजगारसम्बन्धमा रोजगारदाता कम्पनी तथा सरकारसँग निकट सम्पर्कमा रही आवश्यक कार्य गर्ने, नेपालीहरुलाई स्थानीय सरकारले जारी गरेको सुरक्षासम्बन्धी निर्देशन पालना गर्ने बारेमा सुसूचित गराउने तथा नेपाली समुदाय र दूतावास परिवारसमेत संक्रमण बारेमा जागरूक रही सुरक्षाका आवश्यक उपायहरू अवलम्बन गर्न निर्देशन दिएका थिए।
सरकारले विदेशमा रहेका नेपालीलाई सम्बन्धित मुलुकमै सुरक्षित राख्ने र अप्ठ्यारो परेको खण्डमा नेपाली दूतावासमार्फत् त्यहाँका सरकारसँग अनुरोध गरेर त्यहीं उपचारको व्यवस्था मिलाउने नीति लिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768391713.png)
-1768388267.png)
-1768388032.png)
-1764146706.png)
-1768288990.png)
